କେନ୍ଦ୍ରାପଡ଼ା ଅଫିସ,୪।୯: କେନ୍ଦ୍ରାପଡ଼ା ଜିଲା ମହାକାଳପଡା ତହସିଲ ଅଞ୍ଚଳରେ ଜମି ଥାଇ ମଧ୍ୟ ଭୂମିହୀନ ଯୋଜନାରେ ସାମିଲ ହେଉଛନ୍ତି। ଏପରି ଅଭିଯୋଗର ବିଚାର ପାଇଁ ରାମନଗର ଗ୍ରାମର ଅମିତାଭ ଚାନ୍ଦ ଉଚ୍ଚ ନ୍ୟାୟାଳୟଙ୍କ ଆଶ୍ରୟ ନେଇଥିଲେ। ଉଚ୍ଚ ନ୍ୟାୟାଳୟ ଏହି ସମସ୍ୟାକୁ ୪ ମାସ ମଧ୍ୟରେ ସମାଧାନ ପାଇଁ ଗତ ଜାନୁୟାରୀରେ ନିର୍ଦ୍ଦେଶ ଦେଇଥିଲେ ମଧ୍ୟ ଅଦ୍ୟାବଧି ସମାଧାନ ହୋଇନାହିଁ। ଏହି ପରିପ୍ରେକ୍ଷୀରେ ଅଭିଯୋଗକାରୀ ଚାନ୍ଦ ଆର୍ଡିସିଙ୍କ ବିରୋଧରେ ଏକ କଣ୍ଟେପ୍ଟ କେସ୍ (ନଂ ୩୨୬୦/୨୦) କରିଛନ୍ତି। ଅଭିଯୋଗକାରୀ ଚାନ୍ଦ କୁହନ୍ତି, ଜନସାଧାରଣଙ୍କ ବାସସ୍ଥାନ ପରି ମୌଳିକ ଆବଶ୍ୟକତାକୁ ପୂରଣ ପାଇଁ ଭୂମିହୀନଙ୍କୁ ସ୍ଥାନ ଚିହ୍ନଟ ସହ ପଟ୍ଟା ଯୋଗାଇ ଦେଉଛନ୍ତି। ତେବେ ମହାକାଳପଡା ତହସିଲ ଅଞ୍ଚଳରେ ଏହାର ଦୁରୁପଯୋଗ ହେଉଛି। ଖରିନାସୀ ମୌଜା ଖାତା ନଂ.୬୭/୩୭ରେ ଦିଆଯାଇଥିବା ହିତାଧିକାରୀଙ୍କର ୨୦ ଏକରରୁ ଅଧିକ ସମ୍ପତ୍ତି ଅଛି। ଏଥିସହିତ ଏହି ପରିବାରର ରାମନଗର ଅଞ୍ଚଳରେ ବହୁତାଲା ବିଶିଷ୍ଟ ଘର, ଲେଦ୍ ବ୍ୟବସାୟ, ରାଶନ ବ୍ୟବସାୟ ସହିତ ଚାରିଚକିଆ ଗାଡି ଅଛି। ଏସବୁ ସୂଚନା ଅଧିକାର ଆଇନ ବଳରେ ଜାଣିବାକୁ ମିଳିଛି। ଏହି ପରିବାର ପରି ବହୁ ବ୍ୟକ୍ତିଙ୍କୁ ଭୂମିହୀନ ଦର୍ଶାଇ ଘର ପାଇଁ ପଟ୍ଟା ଦିଆଯାଉଥିବାରୁ ଉଚ୍ଚ ନ୍ୟାୟାଳୟଙ୍କ ଆଶ୍ରା ଲୋଡିଥିଲି।
