ବରଗଡ଼,୨।୭(ପ୍ରେମାନନ୍ଦ ଖମାରୀ)- ବରଗଡ଼ ଜିଲାରେ ଗତମାସ ୩୦ତାରିଖରୁ ଖରିଫ୍ ଧାନ ସଂଗ୍ରହ ପ୍ରକ୍ରିୟା ସରିଯାଇଛି। କିନ୍ତୁ ବିଭାଗୀୟ ଅବ୍ୟବସ୍ଥା ଯୋଗୁ ଏପର୍ଯ୍ୟନ୍ତ ଧାନ କିଣାବିକାରେ ଚାଷୀଙ୍କ ଦୁଃଖ ଶେଷ ହୋଇନାହିଁ। କାଗଜ, କଲମରେ କ୍ରୟ ହୋଇ ସାରିଥିବା ବେଳେ ଏବେ ମଧ୍ୟ ଜିଲାର ବିଭିନ୍ନ ମଣ୍ଡିରେ ଲକ୍ଷାଧିକ ବସ୍ତା ଧାନ ପଡ଼ି ରହିଛି। ମଣ୍ଡିରୁ ତାକୁ ଉଠାଯାଇ ନାହିଁ କି ରାଇସ୍ ମିଲ୍କୁ ନିଆଯାଇ ନାହିଁ। ଅପରପକ୍ଷେ ବିଭିନ୍ନ ସ୍ଥାନରେ ଧାନବସ୍ତାରୁ ଗଜା ବାହାରିଥିବା ଦେଖିବାକୁ ମିଳିଛି। ବରପାଲି ବ୍ଲକ ତୁଲଣ୍ଡି ଭଳି କେତେକ ମଣ୍ଡିରେ ପଡ଼ି ରହିଥିବା ଧାନବସ୍ତାରୁ ଗଜା ବାହାରିଛି। ଏଭଳି ସ୍ଥିତିରେ ବର୍ଷା ଆସୁଥିବାରୁ ମଣ୍ଡିରେ ପଡ଼ିଥିବା ଧାନର ସୁରକ୍ଷା ନେଇ ଚାଷୀମାନଙ୍କର ଚିନ୍ତା ବଢ଼ିଛି। କେବଳ ସେତିକି ନୁହେଁ, ସେହି ଧାନକୁ କିଣାଯାଇଥିବା କୁହାଯାଉ ଥିଲେ ସୁଦ୍ଧା ଅନେକ ଚାଷୀଙ୍କୁ ବର୍ତ୍ତମାନ ପର୍ଯ୍ୟନ୍ତ ବିକ୍ରିଧାନର ପ୍ରାପ୍ୟ ମିଳିପାରି ନାହିଁ। ଫଳରେ ଆଗକୁ ବର୍ଷା ପ୍ରଭାବରେ କ୍ଷତିଗ୍ରସ୍ତ ହେଲେ ଏବଂ ମଣ୍ଡିରୁ ରାଇସ୍ ମିଲ୍କୁ ଧାନ ନେବାବେଳେ ମିଲର୍ସ ପୁଣି କଟନୀଛଟନୀ ଆଳ ଦେଖାଇବେ ଏବଂ ଏଥିପାଇଁ ସେମାନଙ୍କୁ ହଇରାଣ ହରକତ ହେବା ସହିତ କ୍ଷତି ସହିବାକୁ ପଡ଼ିପାରେ ବୋଲି ଚାଷୀମାନେ ଆଶଙ୍କା ପ୍ରକାଶ କରିଛନ୍ତି।
ଜିଲାରେ ଗତ ମେ ମାସ ୧୧ତାରିଖରୁ ଖରିଫ ଧାନ ସଂଗ୍ରହ ପ୍ରକ୍ରିୟା ଆରମ୍ଭ ହୋଇଥିଲା। ଜିଲାର ୧୮୩ ମଣ୍ଡିରେ ଧାନ କିଣାବିକା ଚାଲିଥିଲା। ଆରମ୍ଭରୁ ଅବ୍ୟବସ୍ଥା ପରିଲକ୍ଷିତ ହୋଇଥିଲା। ଟୋକନ ତୃଟିଠାରୁ ଆରମ୍ଭ କରି ଟାର୍ଗେଟ୍ ଅଭାବ, ମିଲର୍ସଙ୍କ ଇଚ୍ଛାରେ ଧାନ ଉଠାଣ ଭଳି ସମସ୍ୟାରେ ଚାଷୀମାନେ ଛନ୍ଦି ହୋଇ ପଡ଼ିଥିଲେ। ଗତମାସ ୩୦ତାରିଖରୁ ଜିଲାରେ ଧାନ ସଂଗ୍ରହ ପ୍ରକ୍ରିୟାକୁ ବନ୍ଦ କରି ଦିଆଯାଇଛି। କିନ୍ତୁ ଚାଷୀଙ୍କ ଧାନ କିଣାବିକା ସମସ୍ୟା ଅସମାହିତ ହୋଇ ରହିଛି। ଦୀର୍ଘଦିନ ଧରି ଧାନ ପଡ଼ି ରହିବା ପରେ ଶେଷ ପର୍ଯ୍ୟାୟରେ ଜିଲାର ଅନେକ ମଣ୍ଡିରେ କାଗଜ, କଲମରେ ଧାନ କିଣାଯାଇଛି। ହେଲେ ବିକ୍ରିଧାନର ପ୍ରାପ୍ୟ ଚାଷୀଙ୍କୁ ଏପର୍ଯ୍ୟନ୍ତ ମିଳିପାରି ନ ଥିବା ଅଭିଯୋଗ ହୋଇଛି।
ଜିଲାର ରେଶମ ମଣ୍ଡିରେ ପ୍ରାୟ ୨୫ହଜାର ବସ୍ତା ଧାନ ପଡ଼ି ରହିଥିବା ଚାଷୀମାନେ କହିଛନ୍ତି। ସେମାନଙ୍କ ସେହି ଧାନକୁ କିଣାଯାଇଛି, କିନ୍ତୁ ଏପର୍ଯ୍ୟନ୍ତ ବିକ୍ରିଧାନର ପ୍ରାପ୍ୟରାଶି ମିଳିପାରି ନାହିଁ ବୋଲି ଚାଷୀମାନେ ପ୍ରକାଶ କରିଛନ୍ତି। ଉକ୍ତ ମଣ୍ଡିରେ ଧାନ ପକାଇଥିବା ଅମ୍ବିକା ପ୍ରଧାନ, ଅଲେଖ ଶିକା, କ୍ଷେତ୍ର ବଢ଼େଇ, ଅଶୋକ କୁମାର ଭୋଇଙ୍କ ସମେତ ଅନେକ ଚାଷୀଙ୍କ ଧାନ ଏଭଳି ଅବସ୍ଥାରେ ଏବେ ମ୍ଯଯ ପଡ଼ି ରହିଥିବା ସେମାନେ କହିଛନ୍ତି। ଗୋଟିଏ ପଟେ ସମ୍ପୃକ୍ତ ଚାଷୀମାନେ ଏପଯର୍ୟନ୍ତ ବିକ୍ରିଧାନର ପ୍ରା୍ଯଯ ପାଇ ପାରି ନାହାନ୍ତି, ଅ୍ଯଯପଟେ ବର୍ଷା ଲାଗି ରହିଛି। ଫଳରେ ଧାନର ସୁରକ୍ଷା ନେଇ ନିୟମିତ ସେମାନେ ମଣ୍ଡିକୁ ଆସୁଥିବା ଚାଷୀମାନେ କହିଛନ୍ତି।
ସେହିପରି ସଂଯୁକ୍ତ କୃଷକ ସଂଗଠନର ଉପଦେଷ୍ଟା ରମେଶ ମହାପାତ୍ର କହିଛନ୍ତି, ବରଗଡ଼ ଜିଲାର ବିଭିନ୍ନ ମଣ୍ଡିରେ ଏବେ ମଧ୍ୟ କିଣା ହୋଇଥିବା ୪ଲକ୍ଷ ପକେଟ୍ରୁ ଅଧିକ ଧାନ ପଡ଼ି ରହିଛି। ଧାନ ସଂଗ୍ରହ ପ୍ରକ୍ରିୟାରେ ସରକାରୀ ବ୍ୟବସ୍ଥା କେତେ ଜଟିଳ ଏବଂ ନିରୁତ୍ସାହିତ, ତାହା ସହଜରେ ଅନୁମେୟ ବୋଲି ସେ କହିଛନ୍ତି। ମହାପାତ୍ର ଆହୁରି କହିଛନ୍ତି, ଜିଲାରେ ଗତବର୍ଷ ତୁଳନାରେ ୧୦ହଜାର ଚାଷୀ ଅଧିକ ଧାନ ବିକିଥିବା ସତ, କିନ୍ତୁ ପୂର୍ବଥର ଅପେକ୍ଷା କ୍ରୟଧାନ ୫ଲକ୍ଷ ୩୬ହଜାର ୬୩୨ କୁଇଣ୍ଟାଲ କମ୍ ରହିଛି। ଗତବର୍ଷ ୯୦ହଜାର ୬୪୩ ଚାଷୀ ୬୨ଲକ୍ଷ ୬୩ହଜାର ୯୯୪ କୁଇଣ୍ଟାଲ ଧାନ ବିକିଥିଲେ ଅର୍ଥାତ୍ ଚାଷୀଙ୍କ ପ୍ରତି ହାରାହାରି ୬୯କୁଇଣ୍ଟାଲ ଧାନ କିଣାଯାଇଥିଲା। କିନ୍ତୁ ଏଥର ୯୯ହଜାର ୯୯୮ ଚାଷୀଙ୍କଠାରୁ ୫୮ଲକ୍ଷ ୨୭ହଜାର ୩୬୨କୁଇଣ୍ଟାଲ ଧାନ କିଣାଯାଇଛି, ଯାହାକି ଚାଷୀଙ୍କ ପ୍ରତି ହାରାହାରି ୫୮କୁଇଣ୍ଟାଲ ସଂଗ୍ରହ ହୋଇଛି। ସେହିପରି ଟୋକନ ତୃଟି ଯୋଗୁ ଜିଲାର ୫ହଜାରରୁ ଊର୍ଦ୍ଧ୍ୱ ଚାଷୀ ସେମାନଙ୍କ ଅମଳ ଧାନ ବିକ୍ରି କରି ପାରି ନ ଥିବା ମହାପାତ୍ର କହିଛନ୍ତି।
