ବରଗଡ଼,୧୮।୨(ପ୍ରେମାନନ୍ଦ ଖମାରୀ) – ବରଗଡ଼ ଅଗ୍ରଗାମୀ ଯୁବକ ସଂଘ ଅଧିନରେ ରହିଥିବା ସ୍ଥାନୀୟ ସରକାରୀ ଡ଼ାକ୍ତରଖାନା ସମ୍ମୁଖସ୍ଥ ବାଲୁଙ୍କୀ ଦାଶ ସ୍କୃତି ପାଠାଗାର ଜମିକୁ ବୁଧବାର ଜିଲା ପ୍ରଶାସନକୁ ହସ୍ତାନ୍ତର କରାଯାଇଛି। ଉକ୍ତ ସ୍ଥାନରେ ଏକ ପାଠାଗାର କିମ୍ବା ସର୍ବସାଧାରଣଙ୍କ ସୁବିଧାରେ ଲାଗୁଥିବା ଅନୁଷ୍ଠାନ ତିଆରି କରି ତାର ରକ୍ଷଣାବେକ୍ଷଣ ଦାୟିତ୍ବ ବରଗଡ଼ ପୌର ପରିଷଦକୁ ଦିଆଯିବା ସହ ନୂତନ ଭବନକୁ ବାଲୁଙ୍କୀ ଦାଶଙ୍କ ସ୍ମୃତିରକ୍ଷା ପାଇଁ ତାଙ୍କ ନାମରେ ନାମିତ କରାଯିବା ପାଇଁ ନିବେଦନ କରାଯାଇଛି ।
ଅଗ୍ରଗାମୀ ଯୁବକ ସଂଘର ସଭାପତି ତଥା ପୂର୍ବତନ ବିଧାୟକ ଦେବେଶ ଆଚାର୍ଯ୍ୟ ଏକ ପ୍ରେସ ବିବୃତିରେ ଜଣାଇଛନ୍ତି, ୧୯୪୬ ମସିହାରେ ତତ୍କାଳୀନ ବରଗଡ଼ର ଭଦ୍ରବ୍ୟକ୍ତିମାନେ ସହରରେ ଏକ ପାଠାଗାରର ଆବଶ୍ୟକତା ଅନୁଭବ କରି ମାଫିଦାର ଏବଂ ଗୌନ୍ତିଆମାନଙ୍କୁ ଜଣାଇବାରୁ ସେମାନେ ସ୍ଥାନୀୟ ସରକାରୀ ଡ଼ାକ୍ତରଖାନା ସମ୍ମୁଖ ଉକ୍ତ ୮ ଡ଼େସିମିଲ ଜମିଦାନ କରିଥିଲେ ଏବଂ ସେଠାରେ ବାଲୁଙ୍କୀ ଦାଶ ସ୍ମୃତି ପାଠାଗାର ନିର୍ମିତ ହୋଇଥିଲା । ଏହା ପାର୍ଶ୍ୱସ୍ଥ ଜମିକୁ ଭଡ଼ା ଦିଆଯାଇ ସେଥିରେ ପାଠାଗାର ରକ୍ଷଣାବେକ୍ଷଣ ହେଉଥିଲା। ପରବର୍ତ୍ତୀ ସମୟରେ ସହରର ଯୁବକମାନେ ଅଗ୍ରମାମୀ ଯୁବକ ସଂଘ ଗଠନ କରି ସେହି ଭବନରେ ଏକତ୍ରିତ ହେଉଥିଲେ । ୧୯୭୫ ମସିହାରେ ଅଗ୍ରମାମୀ ଯୁବକ ସଂଘର ନିଜସ୍ୱ ଭବନ ସ୍ଥାପନ ହେବା ପରେ ସେଠାରେ ଯୁବକ ସଂଘ ତରଫରୁ ବାଲୁଙ୍କୀ ଦାଶ ସ୍ମୃତି ପାଠାଗାରକୁ ନିୟମିତ ପରିଚାଳନା କରାଯାଉଥିଲା। କାଳକ୍ରମେ ଉକ୍ତ ଭବନଟି ମରାମତି ଅଭାବରୁ ବିପଦ ଶଙ୍କୁଳ ଅବସ୍ଥାକୁ ଆସିଯିବାରୁ ୨୦୧୦ ମସିହାରୁ ସେଠାରେ ଆଉ ପାଠାଗାର ଚାଲୁ ନ ଥିଲା। ଉକ୍ତ ଭବନର ପୁନରୁଦ୍ଧାର କିମ୍ବା ପୁନଃ ନିର୍ମାଣ ପାଇଁ ଯୁବକ ସଂଘର ଆର୍ଥିକ ସମ୍ବଳ ନ ଥିଲା । ସହରର ବିଭିନ୍ନ ଅନୁଷ୍ଠାନ, ଭଦ୍ରବ୍ୟକ୍ତି ତଥା ଗୌନ୍ତିଆ ଏବଂ ମାଫିଦାରମାନଙ୍କ ବଂଶଧରଙ୍କ ସହ ପରାମର୍ଶ ପରେ ଉକ୍ତ ସ୍ଥାନଟିକୁ ଜନ କଲ୍ୟାଣ ପାଇଁ ଜିଲା ପ୍ରଶାସନକୁ ହସ୍ତାନ୍ତରିତ କରିବା ପାଇଁ ସର୍ବସମ୍ମତିକ୍ରମେ ନିଷ୍ପତ୍ତି ନିଆଯାଇଥିଲା।
