ଭଞ୍ଜନଗର,୧୫।୮(ଡି.ଏନ.ଏ): ଭଞ୍ଜନଗର ଅଞ୍ଚଳରେ ଆଜକୁ ପ୍ରାୟ ଏକ ସପ୍ତାହ ହେବ ମଝିରେ ମଝିରେ ଲଗାଣ ବର୍ଷା ହେଉଛି। ଏହାଦ୍ୱାରା ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି । ଲୋକେ ଘରୁ ବାହାରି ପାରୁନାହାନ୍ତି। କେତକ ସ୍ଥାନରେ ଝାଟିମାଟି ଘର ଭୁଶୁଡ଼ି ପଡ଼ିଛି । ଭଞ୍ଜନଗର ବ୍ଲକ ଗାଲେରୀର ଜନ୍ମେଜୟ ଗୌଡ଼ଙ୍କ ଚାଳ ଛପର ଘର ଏହି ଲଗାଣ ବର୍ଷାରେ ଭୁଶଡ଼ି ପଡ଼ିଛି । ବିଦ୍ୟୁତ୍ ସେବା ମଧ୍ୟ ପ୍ରଭାବିତ ହୋଇଛି। ବ୍ଲକର ଅନେକ ଗ୍ରାମକୁ ଏ ବେବି ପକ୍କା ରାସ୍ତା ହୋଇପାରିନାହିଁ । ବର୍ତ୍ତମାନ ଲଗାଣ ବର୍ଷା ଯୋଗୁ ଲୋକେ ଉକ୍ତ ମାଟି ରାସ୍ତାରେ ଯାତାୟାତ ସମୟରେ ଘୋର ଅସୁବିଧାର ସମ୍ମୁଖିନ ହେଉଛନ୍ତି। ବାଇବାଲି ପଞ୍ଚାୟତର ଅନେକ ଗ୍ରାମରେ ଥିବା ମାଟି ରାସ୍ତା ଗୁଡ଼ିକୁ ମଧ୍ୟ ଠିକ୍ ଭାବେ ମରାମତି କରାଯାଉନାହିଁ । ମୁଖ୍ୟ ସଡ଼କରୁ ବରଗାଁ ମାଟି ରାସ୍ତାଟିକୁ ବହୁଦିନ ହେବ ମରାମତି କରାଯାଇନାହିଁ । ଉକ୍ତ ଗ୍ରାମରେ ୫୦ରୁ ଊର୍ଦ୍ଧ୍ୱ ପରିବାର ବସବାସ କରୁଛନ୍ତି । ବର୍ତ୍ତମାନ ବର୍ଷା ଯୋଗୁ ଲୋକେ ଯାତାୟାତରେ ଘୋର ଅସୁବିଧାର ସମ୍ମୁଖିନ ହେଉଛନ୍ତି । ପଞ୍ଚାୟତ କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ଦେଉନାହାନ୍ତି । ଏ ନେଇ ବରଗାଁ ଗ୍ରାମବାସୀଙ୍କ ମଧ୍ୟରେ ଦିନକୁ ଦିନ ଅସନ୍ତୋଷ ବୃଦ୍ଧି ପାଉଛି। ଆଗାମୀ ଦିନରେ ଏ ନେଇ ବରଗାଁ ଗ୍ରାମବାସୀ ଆନ୍ଦୋଳନ କରିବା ପାଇଁ ସଜବାଜ ହେଉଥିବା ଜଣାପଡ଼ିଛି । ବାଇବାଲି ପଞ୍ଚାୟତ ବ୍ଲକର ପଛୁଆ ଅଞ୍ଚଳ ଭାବେ ପରିଚିତ । ସେହିଭଳି ଭଞ୍ଜନଗର ସହରତଳି ଲାଲସିଂ ପଞ୍ଚାୟତର ଅନେକ ରାସ୍ତା ମାଟି ରାସ୍ତା ଅଛି । ମାଟି ରାସ୍ତା ଗୁଡ଼ିକ ଖାଲ ଢ଼ିପରେ ଭରି ରହିଥିବା ବେଳେ ବର୍ତ୍ତମାନ ବର୍ଷା ଯୋଗୁ ଉକ୍ତ ଖାଲ ଗୁଡ଼ିକରେ ପାଣି ଭରି ରହିଛି । ଲୋକେ ଯାତାୟାତ ସମୟରେ ଅସୁବିଧାର ସମ୍ମୁଖିନ ହେଉଛନ୍ତି । ଦୌନନ୍ଦିନ ଉକ୍ତ ମାଟି ରାସ୍ତା ଗୁଡ଼ିକରେ ଦୁର୍ଘଟଣା ମଧ୍ୟ ଘଟୁଛି। ଏ ନେଇ ପଞ୍ଚାୟତ କର୍ତ୍ତୃପକ୍ଷ ଦୃଷ୍ଟିଦେଇ ଆବଶ୍ୟକ ପଦକ୍ଷେପ ନେବାପାଇଁ ଦାବି ହୋଇଛି। ଅପରପକ୍ଷେ ଲଗାଣ ବର୍ଷା ଯୋଗୁ ଲୋହରାଖଣ୍ଡି, ବଡ଼ନଦୀରେ ଜଳସ୍ତର ସାମାନ୍ୟ ବୃଦ୍ଧି ପାଇଛି । କିନ୍ତୁ ଉପରମୁଣ୍ଡ କନ୍ଧମାଳରେ ବର୍ଷା କମ୍ ଯୋଗୁ ବର୍ତ୍ତମାନ ବନ୍ୟା ପରିସ୍ଥିତି ଉପୁଜିନାହିଁ। ଆଗକୁ ଆହୁରି ଦୁଇଦିନ ବର୍ଷା ଅଛି । ତେଣୁ ଯେ କୌଣସି ପରିସ୍ଥିତିର ମୁକାବିଲା ପାଇଁ ଜଳସମ୍ପଦ, ରାଜସ୍ବ ସମେତ ପ୍ରମୁଖ ବିଭାଗ ପ୍ରସ୍ତୁତ ହୋଇଛି ।
