ଇନ୍ଦୋର,୧୧ା୧୦: ଅଭିଷେକ ଶର୍ମାଙ୍କ ବିସ୍ଫୋରକ ଅର୍ଦ୍ଧଶତକ ପରେ ଅର୍ଶଦୀପ ସିଂଙ୍କ ଘାତକ ବୋଲିଂ ବଳରେ ଏଠାରେ ରବିବାର ଅନୁଷ୍ଠିତ ତୃତୀୟ ଟି୨୦ ମ୍ୟାଚ୍ରେ ଭାରତ ୧୪ ରନରେ ଓ୍ବେଷ୍ଟଇଣ୍ଡିଜ୍କୁ ପରାସ୍ତ କରିଛି। ଏହି ବିଜୟ ସହ ୫ ମ୍ୟାଚ୍ ବିଶିଷ୍ଟ ସିରିଜ୍ରେ ଭାରତ ୨-୧ରେ ଆଗୁଆ ହୋଇଛି। ଏହି ମ୍ୟାଚ୍ରେ ଅଭିଷେକ ଅନ୍ତର୍ଜାତୀୟ ଟି୨୦ କ୍ୟାରିୟରରେ ୨ ହଜାର ରନ ପୁରଣ କରିଛନ୍ତି। ଏଥିସହିତ ଗୋଟିଏ ବର୍ଷରେ ଅନ୍ତର୍ଜାତୀୟ ଟି୨୦ କ୍ରିକେଟରେ ସର୍ବାଧିକ ସଂଖ୍ୟକ ଛକା ମାରିବାରେ ସେ ପୂର୍ବତନ ଅଧିନାୟକ ସୂର୍ଯ୍ୟକୁମାର ଯାଦବଙ୍କ ସମକକ୍ଷ ହୋଇଛନ୍ତି। ସିରିଜ୍ର ଚତୁର୍ଥ ମ୍ୟାଚ୍ ଆସନ୍ତା ୧୪ରେ ହାଇଦ୍ରାବାଦରେ ଖେଳାଯିବ।
ଭାରତ ଆରମ୍ଭରୁ ସଞ୍ଜୁ ସାମସନ(୩)ଙ୍କ ଉଇକେଟ ହରାଇଥିଲା। ଅଭିଷେକ ଓ ଇଶାନ କିଷନ ବିସ୍ଫୋରକ ବ୍ୟାଟିଂ କରି ଦ୍ୱିତୀୟ ଉଇକେଟରେ ୪୦ ବଲରେ ୧୦୮ ରନ ଯୋଡ଼ିଥିଲେ। ଏହାପରେ ଦଳ ୨୦ ରନ୍ ମଧ୍ୟରେ ୪ ଉଇକେଟ ହରାଇଥିଲା। ଏକଦା ୮.୧ ଓଭର ସୁଦ୍ଧା ୧୧୫/୧ ସ୍କୋର କରିଥିବା ଭାରତ ୧୦.୫ ଓଭର ସୁଦ୍ଧା ୫ ଉଇକେଟ ହରାଇ ୧୩୫ ରନ କରିଥିଲା। ଇଶାନ ୧୮ ବଲରେ ୩୭ (୬ ଚୌକା ଓ ୧ ଛକା) ଓ ଅଭିଷେକ ୩୦ ବଲରେ ୬୯ (୬ ଚୌକା ଓ ୫ ଛକା) ରନ କରିଥିବା ବେଳେ ଅଧିନାୟକ ଶ୍ରେୟସ ଆୟାର (୧) ଓ ନମନ ଧିର (୧୦) ଫେଲ ମାରିଥିଲେ।
ଏହିଠାରୁ ନୀତୀଶ କୁମାର ରେଡ୍ଡୀ (୨୧ ରନ, ୩ ଚୌକା) ଓ ତିଲକ ବର୍ମା (୨୮ ରନ, ୪ ଚୌକା) ଷଷ୍ଠ ଉଇକେଟରେ ୩୪ ରନ ଯୋଡ଼ିଥିଲେ। ଶେଷ ଆଡ଼କୁ ଅକ୍ଷର ପଟେଲ ୨୦ (୨ ଚୌକା) ରନ କରିବାରୁ ଭାରତ ନିର୍ଦ୍ଧାରିତ ୨୦ ଓଭରରେ ୨୨୩ ରନରେ ଅଲଆଉଟ୍ ହୋଇଯାଇଥିଲା।
ଜବାବରେ ଓ୍ବେଷ୍ଟଇଣ୍ଡିଜ୍ ଆରମ୍ଭରୁ ଅଧିନାୟକ ଶାଇ ହୋପ(୫)ଙ୍କ ଉଇକେଟ ହରାଇଥିଲା। କମିଲ ପୁରାନ (୪୨ ରନ, ୩ ଲେଖାଏ ଚୌକା ଓ ଛକା) ଓ ଶିମରନ ହେଟମାୟର (୪୩ ରନ, ୬ ଚୌକା ଓ ୨ ଛକା) ଦ୍ୱିତୀୟ ଉଇକେଟରେ ୬୦ ରନ ଯୋଡ଼ିଥିଲେ। ହେଲେ ଏହିଠାରୁ ଭାରତୀୟ ବୋଲରମାନେ କ୍ରମାଗତ ବ୍ୟବଧାନରେ ଉଇକେଟ ନେଇ ଭ୍ରମଣକାରୀ ଦଳକୁ ବ୍ୟାକ୍ଫୁଟ୍କୁ ଠେଲି ଦେଇଥିଲେ। ଶେଷ ଆଡ଼କୁ ଶାମର ସ୍ପ୍ରିଙ୍ଗରଙ୍କର ୧୧ ବଲରେ ବିସ୍ଫୋରକ ୩୫ (୨ ଚୌକା ଓ ୪ ଛକା) ରନର ଇନିଂସ ସତ୍ତ୍ୱେ ଓ୍ବେଷ୍ଟଇଣ୍ଡିଜ୍ ୨୦ ଓଭରରେ ୭ ଉଇକେଟ ହରାଇ ୨୦୯ ରନ କରିଥିଲା। ଭାରତ ପାଇଁ ଅର୍ଶଦୀପ ସିଂ ୩ ଓ ନମନ ଧିର ୨ ଉଇକେଟ ନେଇଥିଲେ।
