ଦିଗପହଣ୍ଡି,୧୧।୧୦(ଅଶେଷ ନାଥ ମିଶ୍ର): ଗଞ୍ଜାମ ଜିଲାର ମନ୍ଦିର ମାଳିନୀ ସହର ଭାବେ ପରିଗଣିତ ଦିଗପହଣ୍ଡି ସମେତ ଆଖପାଖ ଗ୍ରାମାଞ୍ଚଳ ଶକ୍ତିପୀଠମାନଙ୍କରେ ରବିବାର ଠାରୁ ନବରାତ୍ରୀ ପୂଜା ଆରମ୍ଭ ହୋଇଯାଇଛି । ମା’ ଜଗତଜନନୀଙ୍କ ଧରା ପୃଷ୍ଠକୁ ଅବତରଣ ନିମନ୍ତେ ଆବାହନ କରାଯିବା ପରେ ବିଭିନ୍ନ ସାହି ବସ୍ତିମାନଙ୍କରେ ଥିବା ଦୂର୍ଗାଙ୍କ ପୂଜା ମଣ୍ଡପ ଏବଂ ଅଧିଷ୍ଠାତ୍ରୀ ଦେବୀଙ୍କ ପୀଠରେ ଶାରଦୀୟ ନବରାତ୍ରୀ ପୂଜା ଆରମ୍ଭ ହୋଇଥିବା ଜଣାପଡିଛି ।
ଦିଗପହଣ୍ଡି ସହରର ବଡବ୍ରାହ୍ମଣ ସାହି, ପୁଞ୍ଜିକୟାଁ ଛକ, ଗଡ଼ଚୈତନ୍ୟପୁର ଶାସନ ସାହିର ଦୂର୍ଗାପୂଜା ମଣ୍ଡପ ବରିଷ୍ଠ ପଣ୍ଡିତ ମାନଙ୍କ ମନ୍ତ୍ର ଧ୍ବନିରେ ପ୍ରକମ୍ପିତ ହୋଇଥିଲା। ଦିଗପହଣ୍ଡି ବଡ଼ବ୍ରାହ୍ମଣସାହି ଦୂର୍ଗାପୂଜା କମିଟି ପକ୍ଷରୁ ଚଳିତ ବର୍ଷ ୬୧ ତମ ନବରାତ୍ରି ଦୂର୍ଗାପୂଜା ଅନୁଷ୍ଠିତ ହୋଇଯାଇଛି । ସକାଳୁ ମା’ ଦୂର୍ଗାଙ୍କ ପୂଜା ନିମନ୍ତେ କଳସ ଯାତ୍ରା ହୋଇଥିଲା । ସନ୍ଧ୍ୟାରେ ପୂଜା ମଣ୍ଡପରେ ନବରାତ୍ରି ପୂଜାର ପ୍ରଥମ ଦିନରେ ମା ‘ଙ୍କୁ ଶୈଳପୁତ୍ରୀ ବେଶ କରାଯିବା ସହ ହୋମଯଜ୍ଞ ଆୟୋଜନ କରାଯାଇଥିଲା। ପୂଜା କମିଟିର ସଦସ୍ୟ ବୃନ୍ଦ ଉପସ୍ଥିତ ଥିଲେ ।
ସେହିପରି ଦିଗପହଣ୍ଡି ବ୍ଳକ ବି. ତୁରୁବୁଡ଼ି ଗ୍ରାମ ନିକଟ କେରାଣ୍ଡିମାଳ ପର୍ବତ ଶୀର୍ଷରେ ଥିବା ଆରାଧ୍ୟା ଦେବୀ ମା’ ନିଜ ବାଙ୍କେଶ୍ୱରୀ , ମରେଇବାଡି ଗ୍ରାମରେ ପୂଜା ପାଉଥିବା ମା’ ଖେମୁଣ୍ଡି କାଳୁଆ , ଦିଗପହଣ୍ଡି ସହରର ଚାଙ୍ଗୁଡି ଦେଇ ପର୍ବତ ଉପରେ ଥିବା ମା’ ଚାମୁଣ୍ଡେଶ୍ବରୀ , ଆସିକା ରୋଡ଼ ର ମା’ ଅଞ୍ଚଳେଶ୍ବରୀ, ଗୋଲଣ୍ଡା ଗ୍ରାମ ପର୍ବତ ଶିଖରରେ ଥିବା ମା’ ଟିକାଚନ୍ଦ୍ରୀ ପ୍ରମୁଖ ଶକ୍ତିପୀଠମାନଙ୍କରେ ମଧ୍ୟ ମହାଆଡମ୍ବର ସହକାରେ ନବରାତ୍ରୀ ପୂଜା ପାଳନ ହୋଇଥିବା ଜଣାପଡିଛି ।
