ଅଭିନେତ୍ରୀ ଜାକଲିନ ଫର୍ନାଣ୍ଡିଜଙ୍କ ପ୍ରେମରେ ଏକପ୍ରକାର ଦିଓ୍ବାନା ହୋଇଯାଇଛନ୍ତି ମହାଠକ ସୁକେଶ ଚନ୍ଦ୍ରଶେଖର। ଜେଲରୁ ଅନେକ ଥର ତାଙ୍କୁ ଚିଠି ଲେଖିଛନ୍ତି। ଏହି ଚିଠିଗୁଡ଼ିକରେ ଜ୍ୟାକଲିନଙ୍କ ପ୍ରତି ତାଙ୍କର ପ୍ରେମ ସ୍ପଷ୍ଟ ଦେଖାଯାଏ। ବର୍ତ୍ତମାନ ସୁକେଶ ଏପରି କିଛି କରିଛନ୍ତି, ଯାହା ସହଜେ ବିଶ୍ୱାସ କରି ହେବନି। କାରଣ ଜ୍ୟାକଲିନଙ୍କ ଇନଷ୍ଟାଗ୍ରାମ ଫଟୋରେ କମେଣ୍ଟ ଦେବାରୁ ପ୍ରସିଦ୍ଧ ଗାୟକ-ସଂଗୀତଜ୍ଞ ମିକା ସିଂଙ୍କୁ ଏକ ଆଇନଗତ ନୋଟିସ ପଠାଇଛନ୍ତି ସୁକେଶ।
ନିକଟରେ ଜାକଲିନ ହଲିଉଡ ଅଭିନେତା ଜିନ କ୍ଲାଉଡ ୱାନ ଡାମଙ୍କ ସହ ଏକ ଫଟୋ ପୋଷ୍ଟ କରିଥିଲେ। ଏହି ଫଟୋରେ ମିକା ସିଂ କମେଣ୍ଟ ଦେଇ ଲେଖିଛନ୍ତି, ତୁମେ ବହୁତ ସୁନ୍ଦର ଦେଖାଯାଉଛ …, ସେ ସୁକେଶଙ୍କ ଅପେକ୍ଷା ବହୁତ ଭଲ …। ଏହି ବିବାଦୀୟ ମନ୍ତବ୍ୟର କିଛି ସମୟ ପରେ ମିକା ସିଂ ତାଙ୍କ କମେଣ୍ଟକୁ ଡିଲିଟ କରିଦେଲେ। ତେବେ ସେତେବେଳକୁ ମିକା ସିଂଙ୍କ ଏହି ପୋଷ୍ଟ ଭାଇରାଲ ହୋଇଯାଇଥିଲା।
ମିକା ସିଂଙ୍କୁ ଜେଲରେ ଥିବା ସୁକେଶ ଚନ୍ଦ୍ରଶେଖର ଚେତାବନୀ ଦେଇଛନ୍ତି ଏବଂ ଏକ ଆଇନଗତ ନୋଟିସ ମଧ୍ୟ ପଠାଇଛନ୍ତି। ସୁକେଶଙ୍କ ଓକିଲ ଅନନ୍ତ ମଲିକ ଏହି ନୋଟିସରେ କହିଛନ୍ତି, ଆପଣଙ୍କ ବିବୃତ୍ତି ସୁକେଶଙ୍କ ଚରିତ୍ର ଏବଂ ବ୍ୟକ୍ତିତ୍ୱକୁ ନେଇ ଜନ ଆଲୋଚନାର କାରଣ ହୋଇଛି, ଯେଉଁଥିପାଇଁ ତାଙ୍କୁ ଗଣମାଧ୍ୟମର ପ୍ରଶ୍ନର ସମ୍ମୁଖୀନ ହେବାକୁ ପଡିବ। ଏହା କେବଳ ତାଙ୍କ ଭାବମୂର୍ତ୍ତିକୁ କ୍ଷତି ପହଞ୍ଚାଇ ନାହିଁ ବରଂ ତାଙ୍କ ବ୍ୟକ୍ତିଗତ ଏବଂ ବୃତ୍ତିଗତ ଜୀବନ ଉପରେ ମଧ୍ୟ ପ୍ରତିକୂଳ ପ୍ରଭାବ ପକାଇଛି। ସୁକେଶଙ୍କୁ ବିନା ସର୍ତ୍ତରେ କ୍ଷମା ମାଗିବାକୁ ନୋଟିସରେ ନିର୍ଦ୍ଦେଶ ଦିଆଯାଇଛି।
