ଭବାନୀପାଟଣା,୩।୮(ଡି.ଏନ.ଏ.):
କଳାହାଣ୍ଡି ଜିଲା ଲାଞ୍ଜିଗଡ଼ ବ୍ଲକ ସଦରନୁ ୧୪ କି.ମି. ଦୂରେ ରହିଛେ ତ୍ରିଲୋଚନପୁର ପଁଚେତ୍ ଅଧୀନ କୁଦେଲପଟା ଗଁା। ଗଁାଟା ନିୟମଗିରି ପାଡାଡ଼ ଅଂଚଲରେ ରହିଥିଲାବେଲେ ଗଁାର ବଡ଼ଭାଗି ଲୋକ ଡଙ୍ଗରିଆ କଁଧ୍ ସମାଜର। ସେନ୍ତା ଗଁାରେ ଅନେକ ସିକକା ବଉଁଶିଆ ଆଦିବାସୀ ଲୋକ୍ ବି ରହୁଛନ୍। ଆଏଜ୍ବି ଇ ଡଙ୍ଗରିଆ କଁଧ୍ ସମାଜ ନିଜର ପାରମ୍ପରିକ ଜୀବନ୍ ଶଇଲିରେ ଚଲିଆସୁଛନ୍। ଏହେଦେ ଇ ଗଁାରେ ୨୦ରୁ ଅଧ୍କା ଡଙ୍ଗରିଆ କଁଧ୍ ପରିବାର ବାସ କରୁଛନ୍। ଗଁାର ବଡ଼ଭାଗି ଲୋକ୍ ଝୁନ୍ଗା, କଁାଦୁଲ, ମାଡ଼ିଆ, ପୋଡୁଚାଷ କରୁଥିଲାବେଲେ ଜଂଗଲ ଜାତ ଦରବ୍ ଠୁଲେଇ ବିକାଭଂଗା କରି ଚଲୁଛନ୍। ଇ ଆଦିବାସୀ ପରିବାରମାନେ ବହୁତ୍ ବଛର ହେଲା ଜଂଗଲରେ ରହି ଆସୁଛନ୍। ହେଲେ ଆଏଜ୍ତକ ରାଏଜ୍ ସରକାରକଁର ୨୦୦୬ ଜଂଗଲ ଜମି ଆଇନ ଅନସାରେ ଜମି ପଟ୍ଟା ନାଇଁ ପାଇପାରି। ଏନ୍ତା କି ଗଁାଟା ଆଏଜ୍ ବି ରାଜସ୍ବ ଗଁାର ମାଏନ୍ତା ପାଏବାରୁ ବଁଚିତ୍ ହେଇ ରହିଛେ। ଗଁାକେ ଯିବାର ଆଏବାର ଲାଗି ଫିଦିନିଅଁା ରାସ୍ତା ଖଁଡ଼େ ନଁାଇଁନ। ଗଁାବାସୀ ଜଂଗଲ ଭିତରେ ପାଦ୍ ଚଲା ରାସ୍ତାରେ ଯିବାର ଆଏବାର କରୁଛନ୍। ସେନ୍ତା ଗଁାରେ କାହାକେ ଜରତପ୍ ହେଲେ କି ଗରଭବତୀ, ପ୍ରସୂତି ମହିଲାମାନକୁ ଦୁଲା ଫଁାଦି ଡାକ୍ତରଖାନା ନେଉଛନ୍। ଅନେକ ସମିଆରେ ରୁଗୀକେ ଡାକ୍ତରଖାନା ପୁହୁଁଚଉନ୍ ପୁହୁଁଚଉନ ବାଟେ ଜୀବନ୍ ପଲେଇଯାଉଥିବାର ଗଁାବାସୀ ଅଭିଯୋଗ କରିଛନ୍। ସଚେତନତା ଅଭାବ ସଂଗେ ବାଟଘାଟ ଅସବିଧାର ଲାଗି ଗଁାବାସୀ ଦିହିପା ଖରାପ ହେଲେ ଗୁଣିଗାରେଡି, ଚେରମୂଲି ଉଷୋକଷା ଉପରେ ନିରଭର କରୁଛନ୍। ସେନ୍ତା ଗଁାରେ ବଡ଼ଭାରି ପିଇବାର ପାଏନ୍ର ଅସ୍ବିଧା ଥିଲାବେଲେ ପାସେ ବୁହିଯାଉଥିବାର ଝରନା ଆର ନାଲର ପାଏନ୍କେ ଗଧାବୁଡ଼ା, ଖିଆପିଆରେ ବେଭାର କରୁଛନ୍। ଗଁାବାସୀକର ଲାଗି ଆଏଜ୍ ବି ଇନ୍ଦିରା ଆବାସ, ମୋ କୁଡ଼ିଆ, ବିଜୁ ପକ୍କାଘର ସତେ ଯେନ୍ତା ସାତ୍ସପନ ହେଇ ରହିଛେ। ଗଁାରେ ପ୍ରାଥମିକ ସ୍କୁଲ ନାଇଁଥିବାର ଲାଗି ଗଁାର ପିଲାମାନେ ୩ କି.ମି. ଦୂରିଆ ସାପ ଚଞ୍ଚରା ଗଁାକେ ପଢ଼ବାକେ ଯାଉଛନ୍। ନିରବାଚିତ ଜନପରତିନିଧି, ରାଜନେତା ଆର ପରଶାସନର ଅବହେଲାର ଲାଗି କୁଦେଲପଟା ଗଁା ଆଏଜ୍ ବି ରାଜସ୍ବ ଗଁାର ମାଏନ୍ତା ପାଏବାରୁ ବଁଚିତ୍ ହେଇଛେ। ସବୁ ପରକାର ମଉଲିକ୍ ସୁବିଧା ସୁଯୋଗରୁ ବଁଚିତ୍ ଇ ଆଦିବାସୀ ପରିବାରମାନେ ଆଏଜ୍ ବି ଜଂଗଲ ଭିତରେ ଆଦିମାନବର ଜୀବନ୍ ବିତଉଛନ୍। ରାଏଜ୍ ସରକାର, ଜିଲା ପରଶାସନ ଇ ଗଁାକେ ରାଜସ୍ବ ଗଁାର ମାଏନ୍ତା ଦେବାର ସଂଗେ ଆଦିବାସୀକୁ ତାକର ହକ୍, ମଉଲିକ ସୁବିଧା ସୁଯୋଗ ଯୁଗେଇ ଦେବାକେ ଗଁାବାସୀ ଦାବି କରିଛନ୍।
