ବିନିକା,୧୨।୬(ଡି.ଏନ୍.ଏ.): ସୁବର୍ଣ୍ଣପୁର ଜିଲା ବିନିକା ବ୍ଲକ ବାବୁପାଲି ପଞ୍ଚାୟତ ଅଧୀନ ପଲସାପାଲି ଗାଁରେ ଚାଷଜମିରେ ଲଗାଯାଇଥିବା ନିଆଁ ଧାନ ଖଳାକୁ ବ୍ୟାପି ଗୋରୁ ମଇଁଷି ପୋଡି ଯିବା ସହ ବହୁ ପରିମାଣର କ୍ଷୟକ୍ଷତି ହୋଇଥିବା ଅଭିଯୋଗ ହୋଇଛି।
ପଲସାପାଲି ଗ୍ରାମର ଚୈତନ୍ୟ ମେଲ୍ଲୀ, ସୁଦର୍ଶନ ମେଲ୍ଲୀ, କୃପା ମେଲ୍ଲୀ, ବଲି ମେଲ୍ଲୀ, କଲି ମେଲ୍ଲୀ ଓ ଅଷାଡୁ ମେଲ୍ଲୀ ତାଙ୍କ ଖଳାରେ ଗୁହାଳ ଓ ଘର ତିଆରି କରି ଗାଈ, ମଇଁଷି ପାଳନ କରୁଛନ୍ତି। ଏହା ସହ ଧାନ, ଗାଈଗୋରୁଙ୍କ ପାଇଁ ପୁଆଳ, ଚାଷ ବ୍ୟବହୃତ ସାମଗ୍ରୀ ତଥା ଅନ୍ୟାନ୍ୟ ସାମଗ୍ରୀ ରଖିଥିଲେ। ସୋମବାର ମଧ୍ୟାହ୍ନରେ କାମ ସାରି ଘରକୁ ଯାଇଥିବାବେଳେ ନିକଟସ୍ଥ ଚାଷଜମିରେ କେହି ଜଣେ ନିଆଁ ଲଗାଇ ଦେଇଥିଲେ। ସେହି ନିଆଁ ଖଳାକୁ ଚାଲିଆସି ଘର ଗୁହାଳ ପୋଡିଯିବା ସହ ଦଶଟି ଗାଈମଇଁଷି ପୋଡି ମୃତ୍ୟୁବରଣ କରିଥିଲେ। ଆମ୍ବ, ପଣସ, କଦଳୀ, ନଡ଼ିଆ ଇତ୍ୟାଦି ମୂଲ୍ୟବାନ ଗଛ ପୋଡି ଲକ୍ଷାଧିକ ଟଙ୍କାର କ୍ଷୟକ୍ଷତି ହୋଇଥିବା ଅଭିଯୋଗ ହୋଇଛି।
ଖବରପାଇ ବିନିକା ବ୍ଲକ ଅଧ୍ୟକ୍ଷାଙ୍କ ପ୍ରତିନିଧି ଅଶୋକ ନନ୍ଦ, ବାବୁପାଲି ସମିତିସଭ୍ୟ ସତ୍ୟନାରାୟଣ ସୁନା, ବିଜୟ ପଧାନ ଅଗ୍ନିଶମ ବାହିନୀକୁ ଫୋନ କରି ଜଣାଇଥିଲେ। ଅଗ୍ନିଶମ ବାହିନୀ ଘଟଣାସ୍ଥଳକୁ ପହଞ୍ଚିବା ବେଳକୁ ସବୁ ଧ୍ୱଂସ ହୋଇଥିଲା। ସେମାନେ ଜଳୁଥିବା ନିଆଁକୁ ଆୟତ୍ତ କରିଥିଲେ। କ୍ଷତିଗ୍ରସ୍ତ ଚାଷୀମାନେ ଆବଶ୍ୟକ ତଦନ୍ତ କରି ନିଆଁ ଲଗାଇଥିବା ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ବିନିକା ଥାନାରେ ଏତଲା ଦେଇଛନ୍ତି। ନିକଟରେ ଥିବା ଚାଷୀ ଜଗଦୀଶ ପଧାନ, ମୁରଳି ମେଲ୍ଲୀଙ୍କ ସହ ଅନ୍ୟ ଚାଷୀଙ୍କ ମଧ୍ୟ କ୍ଷୟକ୍ଷତି ହୋଇଛି। ଅଞ୍ଚଳରେ ପ୍ରତ୍ୟହ ଚାଷଜମିରେ ନିଆଁ ଲଗାଯାଉଥିବା ବେଳେ ଗଛଲତା ପୋଡି ଯାଇ କ୍ଷୟକ୍ଷତି ହେଉଛି ଏବଂ ତାପମାତ୍ରା ମଧ୍ୟ ବୃଦ୍ଧି ପାଉଛି। ପୋଲିସ ପ୍ରଶାସନ ପକ୍ଷରୁ ଘଟଣା ତଦନ୍ତ କରି ଦୋଷୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ଗରିବ କ୍ଷତିଗ୍ରସ୍ତମାନଙ୍କୁ କ୍ଷତିପୂରଣ ପ୍ରଦାନ କରାଯିବାକୁ ଦାବି ହୋଇଛି।
