ନୂଆଦିଲ୍ଲୀ,୧୨।୩ : ଆର୍ଥିକ ସଙ୍କଟ ଦେଇ ଗତି କରୁଥିବା ଶ୍ରୀଲଙ୍କାର ୪୦ ଲକ୍ଷରୁ ଅଧିକ ପିଲାଙ୍କୁ ଭାରତ ଦେଇଥିବା ଆର୍ଥିକ ସାହାଯ୍ୟରେ ପାଠ୍ୟ ପୁସ୍ତକ ଯୋଗାଇ ଦିଆଯାଇଛି। ଶ୍ରୀଲଙ୍କାରେ ଅବସ୍ଥାପିତ ଭାରତର ହାଇ କମିଶନର ଏନେଇ ସୂଚନା ପ୍ରଦାନ କରିଛନ୍ତି। ସେ କହିଛନ୍ତି ଯେ ଛାତ୍ରଙ୍କ ପାଇଁ ପାଠ୍ୟ ପୁସ୍ତକ ଛାପିବା ପାଇଁ ଭାରତ ଦେଇଥିବା ଶ୍ରୀଲଙ୍କା ୧ ବିଲିୟନ ଡଲାର ମଧ୍ୟରୁ ୧ କୋଟି ଡଲାର ବ୍ୟବହାର କରିଛି। ଗତ ବର୍ଷ ଶ୍ରୀଲଙ୍କାକୁ ଭାରତ ପ୍ରାୟ ତିନି ବିଲିୟନ ଡଲାର ଦେଇଥିଲା। ଏହି ସହାୟତାରେ ନଗଦ ୧ ବିଲିୟନ ଡଲାର ଋଣ ମଧ୍ୟ ଅନ୍ତର୍ଭୁକ୍ତ ହୋଇଛି ।
ଭାରତୀୟ ବହିର୍ବ୍ୟାପାର ମନ୍ତ୍ରଣାଳୟର ମୁଖପାତ୍ର ଅରିନ୍ଦମ ବାଗଚି କହିଛନ୍ତି ଯେ ସମସ୍ତ ପ୍ରକାର କଠିନ ପରିସ୍ଥିତିରେ ଭାରତ ଶ୍ରୀଲଙ୍କା ସହିତ ଛିଡା ହୋଇଛି। ଖାଦ୍ୟ, ଇନ୍ଧନ, ଔଷଧ, ଶିଳ୍ପର କଞ୍ଚାମାଲ ଇତ୍ୟାଦି ଆମଦାନୀ ପାଇଁ ଭାରତ ଶ୍ରୀଲଙ୍କାକୁ ଏହି ଋଣ ଦେଇଥିଲା। ଏହି ଋଣ ରାଶି ସହିତ ଭାରତରୁ କାଗଜ ଏବଂ ମୁଦ୍ରଣ ସାମଗ୍ରୀ କ୍ରୟ କରି ଶ୍ରୀଲଙ୍କା ବିଦ୍ୟାଳୟର ୪୦ଲକ୍ଷରୁ ଅଧିକ ଛାତ୍ରଛାତ୍ରୀଙ୍କ ପାଇଁ ପୁସ୍ତକ ମୁଦ୍ରଣ କରିଛି। ଭାରତ ଏପର୍ଯ୍ୟନ୍ତ ଶ୍ରୀଲଙ୍କାକୁ ମୋଟ ଋଣ ସୁବିଧା ୪ ବିଲିୟନ ଡଲାରକୁ ବୃଦ୍ଧି କରିଛି। ଏହା ଅନ୍ତର୍ଗତ ଶ୍ରୀଲଙ୍କା ଭାରତରୁ ପେଟ୍ରୋଲିୟମ, ସାର ଏବଂ ଅନ୍ୟାନ୍ୟ ଜରୁରୀ ସାମଗ୍ରୀ କିଣିଛି।
