ଭୁବନେଶ୍ୱର,୧୦ା୩(ବ୍ୟୁରୋ):ମିଲରଙ୍କ ଅଘୋଷିତ କଟ୍ନି ଛଟନିର ପ୍ରତିବାଦ ସହ ପେନ୍ସନ ବାବଦରେ ଚାଷୀଙ୍କୁ ୫ହଜାର ଟଙ୍କା ପ୍ରଦାନ ଓ ଅନ୍ୟାନ୍ୟ ଦାବି ନେଇ କୃଷକମାନେ ଆସନ୍ତା ୨୦ ତାରିଖରେ ବିଧାନସଭା ଘେରାଉ କରିବେ। ଏ ସମ୍ପର୍କରେ ନବ ନିର୍ମାଣ କୃଷକ ସଂଗଠନର ରାଷ୍ଟ୍ରୀୟ ସଂଯୋଜକ ଅକ୍ଷୟ କୁମାର ଓ ରାଜ୍ୟ ସଂଯୋଜକ ଶେଷଦେବ ନନ୍ଦ ଗୁରୁବାର ସାମ୍ବାଦିକ ଭବନରେ ଆୟୋଜିତ ଖବରଦାତା ସମ୍ମିଳନୀରେ ସୂଚନା ଦେଇ କହିଛନ୍ତି, ରାଜ୍ୟ ସରକାରଙ୍କ ବଜେଟରେ ଚାଷୀଙ୍କ ପାଇଁ କିଛି ନାହିଁ। ଧାନ ଉପରେ ବୋନସ୍ କିମ୍ବା ଚାଷୀଙ୍କ ପାଇଁ ପେନସନ୍ ନାହିଁ। ଅନ୍ୟପଟେ ଟାଟା ପାଓ୍ବାର ବିଦ୍ୟୁତ୍ ଦର ବୃଦ୍ଧି କରି ଲୋକଙ୍କ ଉପରେ ଅତ୍ୟାଚାର ବଢ଼ୁଛି। ଏହାର ପ୍ରତିବାଦରେ ସଂଗଠନ ଆନ୍ଦୋଳନକୁ ଓହ୍ଲାଇବ। ସରକାରଙ୍କ ଏତେ ବଡ଼ ପ୍ରଶାସନ ଓ ବିଶ୍ୱସ୍ତରୀୟ ଯୋଜନା ଚାଲୁଥିବାବେଳେ ବିଦ୍ୟୁତ୍କୁ କାହିଁକି ଟାଟା ହାତକୁ ଟେକି ଦିଆଗଲା ବୋଲି ସଂଗଠନର ରାଜ୍ୟ ସହ ସଂଯୋଜକ ଉମାକାନ୍ତ ଭାରତ, ନିମାଇଁ ରାୟ, ରଶ୍ମୀ ରଞ୍ଜନ ସ୍ବାଇଁ, ନବ ନିର୍ମାଣ ଯୁବ ଛାତ୍ର ରାଜ୍ୟ ସଂଯୋଜକ ଏମ୍ଡି ମନଓ୍ବାର ଅଲ୍ଲୀ ପ୍ରମୁଖ ପ୍ରଶ୍ନ କରିଛନ୍ତି।
