ଭୁବନେଶ୍ୱର,୧୦ା୩(ବ୍ୟୁରୋ):ରାଜ୍ୟରେ ଜଙ୍ଗଲ ନିଅଁା ଆୟତ୍ତରେ ନାହିଁ। କେବଳ ବର୍ଷା ହି ଭରସା। ଗତ ନଭେମ୍ବରରୁ ରାଜ୍ୟରେ ବର୍ଷା ହୋଇନାହିଁ। ଅନ୍ୟପଟେ ତାପମାତ୍ରା ମଧ୍ୟ ବଢ଼ିଚାଲିଛି। ଗତ କିଛି ସପ୍ତାହ ହେବ ରାଜ୍ୟର ଅଧିକାଂଶ ଜଙ୍ଗଲରେ ନିଆଁ ଲାଗିଛି। କୋରାପୁଟରୁ କନ୍ଧମାଳ, ଗଞ୍ଜାମରୁ ରାୟଗଡ଼ା ସବୁଠି ଜଙ୍ଗଲ ନିଆଁ ବ୍ୟାପୁଛି। ସମଗ୍ର ଦେଶର ୫୭୦ଟି ସ୍ଥାନରେ ନିଆଁ ଲାଗିଥିବା ବେଳେ ଓଡ଼ିଶାରେ କେବଳ ୧୪୨ ସ୍ଥାନରେ ନିଅଁା ଲାଗିଛି। ଓଡ଼ିଶାରେ ଲାଗିଥିବା ନିଆଁକୁ ଆୟତ୍ତ କରିବାରେ ରାଜ୍ୟ ବନ ବିଭାଗ ବିଫଳ ହୋଇଛି। କେବଳ ଚଳିତ ବର୍ଷ ନୁହେଁ, ରାଜ୍ୟରେ ଲଗାତର ନିଆଁ ଲାଗି ଅନେକ ଜଙ୍ଗଲ ସମ୍ପଦ ନଷ୍ଟ ହୋଇଛି। ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗରୁ ମିଳିଥିବା ସୂଚନା ଅନୁସାରେ ୨୦୧୮ରୁ ଏ ପର୍ଯ୍ୟନ୍ତ ମୋଟ ୧,୫୩,୫୫୯ ବନାଗ୍ନି ବ୍ୟାପି ୬୧,୫୩୧ ହେକ୍ଟର ଜଙ୍ଗଲ ଧ୍ୱଂସ ହୋଇଛି। ୨୦୧୮ରେ ୩୧,୬୮୦ଟି ଜଙ୍ଗଲ ନିଆଁରେ ୯୭୩୦.୦୭ ହେକ୍ଟର ଜଙ୍ଗଲ ଜଳିପୋଡି ଯାଇଥିବା ବେଳେ ୨୦୧୯ରେ ୧୯୭୮୭ଟି ଜଙ୍ଗଲ ନିଆଁରେ ୭୧୭୪.୯୫ ହେକ୍ଟର, ୨୦୨୦ରେ ୧୧୦୮୮ଟି ନିଆଁରେ ୬୦୭୦.୨୫ ହେକ୍ଟର, ୧୦୨୧ରେ ୫୭୩୩୯ଟି ଜଙ୍ଗଲ ନିଅଁାରେ ୨୮୬୫୩. ୧୭ ହେକ୍ଟର,୨୦୨୨ରେ ୨୯,୧୯୯ଟି ଜଙ୍ଗଲ ନିଆଁରେ ୮୪୫୦. ୩୯ ହେକ୍ଟର ଏବଂ ୨୦୨୩ ଫେବୃୟାରୀ ଶେଷ ବେଳକୁ ରାଜ୍ୟରେ ୧୪୪୫.୧୧ ହେକ୍ଟର ଜଙ୍ଗଲ ନିଆଁ ଯୋଗୁ ନଷ୍ଟ ହୋଇଛି। ତେବେ ଚଳିତ ବର୍ଷ ରାଜ୍ୟର ବିଭିନ୍ନ ବନଖଣ୍ଡରେ ଲାଗିଥିବା ଜଙ୍ଗଲ ନିଆଁର ୯୩ ପ୍ରତିଶତ ଆୟତ୍ତ କରାଯାଇଛି। ବର୍ଷା ହେଲେ ହିଁ ଜଙ୍ଗଲ ନିଆଁକୁ ଆୟତ୍ତ କରାଯାଇ ପାରିବ ବୋଲି ଜଙ୍ଗଲ ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି।
