ମୁମ୍ବାଇ,୨୧ ।୨: ବଲିଉଡ ରାଇଟର ଜାଭେଦ ଅଖତର ନିକଟରେ ପାକିସ୍ତାନ ଯାଇ ସେଠାରେ ହିଁ ତାକୁ ଆଇନା ଦେଖାଇଛନ୍ତି । ସେ ସେଠାରେ ଏକ କାର୍ଯ୍ୟକ୍ରମରେ ମନେପକାଇ ଦେଇଛନ୍ତି କି ୨୬/୧୧ ଆତଙ୍କବାଦୀ ଆକମ୍ରଣର ଅଭିଯୁକ୍ତ ଏବେବି ଖୋଲା ଖୋଲି ବୁଲୁଛନ୍ତି । ସୂଚନାଯୋଗ୍ୟ, ନିକଟରେ ପାକିସ୍ତାନରେ ନାମୀଦାମୀ ଉର୍ଦ୍ଧୁ ଶାୟର ଫୈଜ ଅହମ୍ମଦ ଫୈଜଙ୍କ ସ୍ମୃତିରେ ଆୟୋଜିତ ଏକ ସମାରୋହରେ ସାମିଲ ହେବାକୁ ଜାଭେଦ ଅଖତର ସେଠାରେ ପହଞ୍ଚିଥିଲେ ।
ଜଣେ ବ୍ୟକ୍ତି ଜାଭେଦଙ୍କୁ ପ୍ରଶ୍ନ କରିଥିଲେ, ଆପଣ ତ ଅନେକ ଥର ପାକିସ୍ତାନ ଯାଉଛନ୍ତି, ଯେତେବେଳେ ଆପଣ ସ୍ୱଦେଶ ଫେରନ୍ତି ସେତେବେଳେ ଆପଣ ଆପଣଙ୍କ ଲୋକଙ୍କୁ କୁହନ୍ତି କି ସେମାନେ ଭଲ ଲୋକ, ସେମାନେ କେବଳ ଆମ ଉପରେ ବୋମା ବର୍ଷଣ କରୁ ନାହାନ୍ତି ବରଂ ଆମକୁ ଭଲପାଇବା ସହ ଶୁଭେଚ୍ଛା ବି ଦେଉଛନ୍ତି । ଏହାର ଜବାବରେ ୨୬/୧୧ ମୁମ୍ବାଇ ଆତଙ୍କବାଦୀ ଆକ୍ରମଣ କଥା ମନେପକାଇ ଜାଭେଦ ଅଖତର କହିଥିଲେ, ଆସନ୍ତୁ ଆମେ ପରସ୍ପରକୁ ଦୋଷ ଦେବା ନାହିଁ, ଏହାଦ୍ୱାରା କୌଣସି ପ୍ରସଙ୍ଗର ସମାଧାନ ହୋଇ ନ ଥାଏ । ଜୋ ଗରମ ହେ ଫିଜା, ଓ କମ ହୋନା ଚାହିଏ । ଆମ ଉପରେ ଆକ୍ରମଣ ହୋଇଛି, ଆମେ ତ ମୁମ୍ବାଇ ଲୋକ । ଆମେ ଦେଖିଛୁ ସେଠାରେ କେମିତି ଆକ୍ରମଣ ହୋଇଛି । ସେମାନେ ନା ନରୱେରୁ ଆସିଥିଲେ ନା ମିଶ୍ରରୁ । ସେହି ଲୋକେ ଆଜିବି ଆପଣଙ୍କ ଦେଶରେ ଖୋଲା ଖୋଲି ବୁଲୁଛନ୍ତି । ଆଉ ଯଦି ଏହି ଅଭିଯୋଗ ହିନ୍ତୁସ୍ତାନୀଙ୍କ ହୃଦୟରେ ରହିଛି ତେବେ ଆପଣ ଏହାକୁ ଭୁଲ ବୁଝିବା ଉଚିତ ନୁହେଁ । କାରଣ ଏବେବି ୨୬/୧୧ ଆତଙ୍କବାଦୀ ଆକ୍ରମଣର ଅଭିଯୁକ୍ତ ଆପଣଙ୍କ ଦେଶରେ ବୁଲୁଛନ୍ତି । ତେଣୁ ଯଦି କୌଣସି ଭାରତୀୟ ଏହାକୁ ନେଇ ଅଭିଯୋଗ କରନ୍ତି ତେବେ ଆପଣ ଭୁଲ ବୁଛିବା କଥା ନୁହେଁ ।
