ନୀଳଗିରି,୧୬ା୧୨(ସ୍ବ.ପ୍ର.): ଟିଟାନସ୍ ଇଞ୍ଜେକ୍ସନ ବଦଳରେ କୁକୁର କାମୁଡ଼ା ଇଞ୍ଜେକ୍ସନ ଦେବା ନେଇ ନୀଳଗିରି ଉପଖଣ୍ଡ ହସ୍ପିଟାଲରେ ଉତ୍ତେଜନା ପ୍ରକାଶ ପାଇଛି।
ସୂଚନାନୁଯାୟୀ, ବାଲେଶ୍ୱର ଜିଲା ନୀଳଗିରି ଥାନା ଅଧୀନ ବାଉଁଶବଣିଆ ପଞ୍ଚାୟତ ଛୋଟ କାନପୁର ଗ୍ରାମର ଗଣେଶ୍ୱର ସେଠୀ(୪୫)ଙ୍କ ୧୨ ବର୍ଷର ପୁଅ ଗୁରୁବାର ରାତିରେ ହାତ କଟି ଯାଇଥିବାରୁ ଶୁକ୍ରବାର ସକାଳେ ନୀଳଗିରି ଉପଖଣ୍ଡ ହସ୍ପିଟାଲକୁ ଆସି ଟିକେଟ କାଟି ଡାକ୍ତରଙ୍କୁ ଦେଖାଇଥିଲେ। ହେଲେ ଫାର୍ମାସିଷ୍ଟ ଟିଟାନସ୍ ବଦଳରେ କୁକୁର କାମୁଡ଼ା ଇଞ୍ଜେକ୍ସନ ଦେଇଥିଲେ। ପରେ ବାପା ଗଣେଶ୍ୱର ଜାଣିବାକୁ ପାଇଲେ ଆହୁରି ଦୁଇଟି ଇଞ୍ଜେକ୍ସନ ଦେବାର ଅଛି। ପଚାରି ବୁଝିଲେ କ’ଣ ପାଇଁ ଆହୁରି ଦୁଇ ଥର ଇଞ୍ଜେକ୍ସନ ନେବେ। ଉତ୍ତରରେ ଜାଣିବାକୁ ପାଇଲେ ପୁଅ ନେଇଥିବା ଇଞ୍ଜେକ୍ସନ କୁକୁର କାମୁଡ଼ା ପାଇଁ।
ଟିଟାନସ୍ ବଦଳରେ କୁକୁର କାମୁଡ଼ା ଇଞ୍ଜେକ୍ସନ ଦେବାକୁ ନେଇ ମେଡ଼ିକାଲର କିଛି ସ୍ବାସ୍ଥ୍ୟ କର୍ମୀ ନିଜର ଭୁଲ୍ ବୁଝି ଗଣେଶ୍ୱରଙ୍କଠାରୁ ପୁରୁଣା ଟିଟି ଇଞ୍ଜେକ୍ସନର ପ୍ରେସ୍କ୍ରିପ୍ଶନ ଛଡ଼ାଇ ନେଇ ନୂଆ ପ୍ରେସ୍କ୍ରିପ୍ଶନ ଧରାଇ ଦେଇଥିଲେ। ଏହି ଘଟଣାକୁ ନେଇ କିଛି ସମୟ ପାଇଁ ହସ୍ପିଟାଲ ପରିସରରେ ଉତ୍ତେଜନା ଲାଗି ରହିଥିଲା। ତେବେ ସେଠାରେ ଉପସ୍ଥିତ ଥିବା ଶିଶୁ ବିଶେଷଜ୍ଞ କୁକୁର କାମୁଡ଼ା ଭ୍ୟାକ୍ସିନ କିଛି ଖରାପ କରିବ ନାହିଁ ବୋଲି ମତପ୍ରକାଶ କରିଥିଲେ।
