ମୋରଡ଼ା,୧ା୪(ସ୍ମାରକ ମାଜୀ): ନିଜ ଖୁଡ଼ୀକୁ ଡାହାଣୀ ସନ୍ଦେହ କରି ଜୀବନରୁ ମାରିଦେବାକୁ ପୁତୁରା ଉଦ୍ୟମ କରିଥିବା ଘଟଣା ଦେଖିବାକୁ ମିଳିଛି ମୟୂରଭଞ୍ଜ ଜିଲା ରାସଗୋବିନ୍ଦପୁର ଥାନା ଅଧୀନ ସଂସା ଗ୍ରାମରେ।
ସୂଚନା ଅନୁଯାୟୀ, ଉକ୍ତ ଗ୍ରାମର ସୋମବାରୀ ହାଁସଦା ତାଙ୍କ ପରିବାର ଲୋକଙ୍କ ସହିତ ମଙ୍ଗଳବାର ରାତିରେ ଶୋଇଥିବା ସମୟରେ ରାତି ପ୍ରାୟ ୧୨ଟା ସମୟରେ ଶୋଇଥିବା ଅବସ୍ଥାରେ ନିଜ ପୁତୁରା ଶ୍ୟାମସୁନ୍ଦର ହାଁସଦା ଘର ଲାଇନ କାଟି ଚତୁରତାର ସହିତ ଏକ ପଥର ସାହାଯ୍ୟରେ ସୋମବାରୀଙ୍କୁ ଆକ୍ରମଣ କରିଥିଲେ। ତେବେ ସୋମବାରୀ ମଶାରୀ ଟାଙ୍ଗି ଶୋଇଥିବାରୁ ସୋମବାରୀ ଅଳ୍ପକେ ବର୍ତ୍ତି ଯାଇଥିଲେ ମଧ୍ୟ ଶ୍ୟାମସୁନ୍ଦର ତାଙ୍କୁ ଜୀବନରୁ ମାରି ଦେବାକୁ ଉଦ୍ୟମ କରିଥିଲେ। ସୋମବାରୀ ପାଟି କରିବାରୁ ପରିବାର ଲୋକେ ଓ ଗ୍ରାମବାସୀ ଦୌଡ଼ି ଆସି ସୋମବାରୀଙ୍କୁ ଉଦ୍ଧାର କରିଥିଲେ। ଘଟଣାସ୍ଥଳରୁ ପୁତୁରା ଶ୍ୟାମସୁନ୍ଦର ଫେରାର ହୋଇଯାଇଛନ୍ତି। ଗୁରୁତର ସୋମବାରୀଙ୍କୁ ରାସଗୋବିନ୍ଦପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି। ଖବର ପାଇ ଆଜି ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।
ସୂଚନାଯୋଗ୍ୟ ଯେ, ପାରିବାରିକ କଳହ ଏବଂ ସୋମବାରୀଙ୍କୁ ଡାହାଣୀ ସନ୍ଦେହ କରି ପୁତୁରା ଶ୍ୟାମସୁନ୍ଦର ଘର ଛାଡ଼ି ବାହାରେ ରହୁଛନ୍ତି ଏବଂ ଗତକାଲି ଡାହାଣୀ ସନ୍ଦେହରେ ଜୀବନରୁ ମାରି ଦେବାକୁ ଚେଷ୍ଟା କରିଛନ୍ତି ବୋଲି କହିଛନ୍ତି ସୋମବାରୀଙ୍କ ପୁଅ ବୋହୂ କାଜଲ ହାଁସଦା।
