ବଲାଙ୍ଗୀର/ଟିଟିଲାଗଡ଼,୨୯ା୩ (ବୀରେନ୍ଦ୍ର କୁମାର ଝାଙ୍କର/ଶରତ ମିଶ୍ର): ବଲାଙ୍ଗୀର ଜିଲା ଟିଟିଲାଗଡ଼ ସହରରେ ଶୁକ୍ରବାର ଶ୍ରୀରାମ ନବମୀ ଉତ୍ସବ ଶୋଭାଯାତ୍ରାରେ ଫୁଟିଛି ଗୁଳି। ଆଉ ଏହି ଗୁଳି ଚଳାଇଛନ୍ତି ସ୍ଥାନୀୟ ବିଧାୟକ ନବୀନ ଜୈନ। ନବୀନ ଏକାଧିକ ସ୍ଥାନରେ ଫାଙ୍କା ଗୁଳିଚାଳନା କରିବାର ଭିଡିଓ ସାମାଜିକ ଗଣମାଧ୍ୟମରେ ଭାଇରାଲ ହେବା ପରେ ଘଟଣା ଚର୍ଚ୍ଚାର ବିଷୟ ହୋଇଛି। ପୋଲିସ ଉପସ୍ଥିତିରେ ସେ କିଭଳି ଫାଙ୍କା ଗୁଳିଚାଳନା କଲେ ବୋଲି ବିଜେଡି ପ୍ରଶ୍ନ କରିବା ସହ ଏନେଇ ବିଧାୟକଙ୍କୁ କଡ଼ା ସମାଲୋଚନା କରିଛି। ଅନ୍ୟପଟେ ଜୈନ ଏଭଳି ଅଭିଯୋଗକୁ ଖଣ୍ଡନ କରି ବନ୍ଧୁକ ନୁହେଁ, ଏହା ଖେଳଣା ବନ୍ଧୁକ ଥିଲା ବୋଲି କହିଛନ୍ତି। ରାମନବମୀ ରାଲିରେ ଲୋକେ ଖୁସି ମନାଉଥିଲେ। ଏଠାରେ କେହି ଜଣେ ତାଙ୍କୁ ଖେଳଣା ବନ୍ଧୁକ ଦେବାରୁ ସେ ଚଳାଇଥିଲେ ବୋଲି କହି ବିଜେଡିକୁ ସମାଲୋଚନା କରିଛନ୍ତି। ଅତିରିକ୍ତ ଏସ୍ପି ହିଂସାଶୁ ଶେଖର ବେହେରା କହିଛନ୍ତି, ବିଧାୟକ ଏବଂ ତାଙ୍କ ପିଏସ୍ଓଙ୍କ ବିରୋଧରେ ପୋଲିସ ଏକ ମାମଲା ରୁଜୁ କରିବା ସହ ଉକ୍ତ ବନ୍ଧୁକକୁ ଜବତ କରାଯାଇଛି। ଜବତ ବନ୍ଧୁକ(.୩୨ ବୋର୍) ଇଣ୍ଡିଆନ ଅର୍ଡିନାଂଶ ଫ୍ୟାକ୍ଟ୍ରିରେ ନିର୍ମିତ ହୋଇଥିବାବେଳେ ଏହାର ଲାଇସେନ୍ସ ବିଧାୟକଙ୍କ ନାମରେ ରହିଛି। ବନ୍ଧୁକରୁ ୩ରାଉଣ୍ଡ ଗୁଳି ବ୍ଲାଙ୍କ ଫାୟାରିଂ ହୋଇଥିବା ଜଣାଡ଼ିଛି। ଏହି ଘଟଣାରେ ବିଧାୟକଙ୍କ ପିଏସ୍ଓ ପ୍ରେମଚାନ୍ଦ ନାଗଙ୍କୁ ନିଲମ୍ବିତ କରାଯାଇଥିବା ବେହେରା କହିଛନ୍ତି। ଏହା ଏକ ସମ୍ବେଦନଶୀଳ ଘଟଣା ହୋଇଥିବାରୁ ଉତ୍ତରାଞ୍ଚଳ ଆଇଜି ହିମାଂଶୁ ଲାଲ ବଲାଙ୍ଗୀର ଗସ୍ତକରି ମାମଲାର ଛାନ୍ଭିନ୍ କରିଛନ୍ତି।
ମିଳିଥିବା ସୂଚନା ଅନୁସାରେ, ଶ୍ରୀରାମ ନବମୀ ଉପଲକ୍ଷେ ଠିକାଦାରପଡ଼ା ରାଧାକୃଷ୍ଣ ମନ୍ଦିରରୁ ଏକ ଆଧ୍ୟାତ୍ମିକ ଶୋଭାଯାତ୍ରା ଟିଟିଲାଗଡ଼ ସହର ପରିକ୍ରମା କରିଥିଲା। ଏହି ଶୋଭାଯାତ୍ରାରେ କୁନି କୁନି ପିଲାମାନେ ଶ୍ରୀରାମ, ଲକ୍ଷ୍ମଣ, ସୀତା ଏବଂ ହନୁମାନ ଭୂମିକାରେ ସଜେଇ ହୋଇ ସୁସଜ୍ଜିତ ରଥରେ ପରିକ୍ରମା କରୁଥିଲେ। ଏହି ଶୋଭାଯାତ୍ରାରେ ସହରର ଶତାଧିକ ମହିଳା, ପୁରୁଷ ଶ୍ରଦ୍ଧାଳୁ ସାମିଲ ହୋଇଥିଲେ। ଶାନ୍ତିଶୃଙ୍ଖଳା ରକ୍ଷା ପାଇଁ ପୋଲିସ ବି ମୁତୟନ ହୋଇଥିଲେ। ସହରର ଶାସ୍ତ୍ରୀ ଛକରେ ଶୋଭାଯାତ୍ରା ପହଞ୍ଚତ୍ବା ପରେ ବିଧାୟକ ଏଥିରେ ସାମିଲ ହୋଇଥିଲେ। ସେଠାରେ ବିଧାୟକ ଏକ ପିସ୍ତଲ (ବନ୍ଧୁକ) ଉପରମୁହାଁ କରି ଫାଙ୍କା ଗୁଳିଚାଳନା କରିଥିଲେ। ଗୁଳି ଫୁଟାଇବା ପରେ ଏହାକୁ ବିଧାୟକ ପ୍ୟାଣ୍ଟ ଭିତରେ ଭରି ଦେଉଥିତ୍ବା ଭିଡିଓରେ ଦେଖିବାକୁ ମିଳିଛି। ଏହି ସମୟରେ ତାଙ୍କ ପିଏସ୍ଓ ଏବଂ ଅନ୍ୟ ପୋଲିସ ମଧ୍ୟ ଉପସ୍ଥିତ ଥିଲେ। ଶତାଧିକ ଶ୍ରଦ୍ଧାଳୁଙ୍କ ଉପସ୍ଥିତିରେ ଏବଂ ଶ୍ରୀରାମ ନବମୀ ଭଳି ଆଧ୍ୟାତ୍ମିକ ଶୋଭାଯାତ୍ରାରେ ବିଧାୟକଙ୍କ ଏଭଳି ଫାଙ୍କା ଗୁଳିଚାଳନାକୁ ପୂର୍ବତନ ମନ୍ତ୍ରୀ ତଥା ବରିଷ୍ଠ ବିଜେଡି ନେତ୍ରୀ ଟୁକୁନି ସାହୁ କଡ଼ା ସମାଲୋଚନା କରିଛନ୍ତି। ସର୍ବସାଧାରଣ ସ୍ଥାନରେ ଗୁଳି ଫୁଟାଇବା ଏକ ଅପରାଧ। ଏ ନେଇ ଗୃହବିଭାଗ ଦାୟିତ୍ୱରେ ଥିବା ମୁଖ୍ୟମନ୍ତ୍ରୀ ସ୍ପଷ୍ଟ କରିବା ଉଚିତ୍ ବୋଲି ସେ କହିଛନ୍ତି। ବିଜେଡି ପକ୍ଷରୁ ରବିବାର ଟିଟିଲାଗଡ଼ ଥାନାରେ ବିଧାୟକଙ୍କ ବିରୋଧରେ ଅଭିଯୋଗ କରାଯିବ ବୋଲି ସେ କହିଛନ୍ତି। ଏଭଳି ପ୍ରତିକ୍ରିୟା ପରେ ଜୈନ କହଛନ୍ତି , ରାଲିରେ ସେ ଖେଳଣା ବନ୍ଧୁକ ଫୁଟାଇଛନ୍ତି। ଟିଟିଲାଗଡ଼ର ବିକାଶ କଥା ଛାଡ଼ି ଏଭଳି ପ୍ରସଙ୍ଗକୁ ଧରି ବିଜେଡି ଅପପ୍ରଚାର କରିବାକୁ ଚେଷ୍ଟା କରୁଛି। ତେବେ ବିଧାୟକ ନବୀନ ଖେଳନା ବନ୍ଧୁକ ଧରିଥିବା କହୁଥିବାବେଳେ ପୋଲିସ ଲାଇସେନ୍ସପ୍ରାପ୍ତ ବନ୍ଧୁକକୁ ଜବତ କରିଥିବା କହିବା ଘଟଣା ଏବେ ଆଲୋଚନାର ବିଷୟ ପାଲଟିଛି।
