ନୂଆଦିଲ୍ଲୀ , ୨ା୪:ଆଇଟି କ୍ଷେତ୍ରରେ କାର୍ଯ୍ୟ କରୁଥିବା କର୍ମଚାରୀ ଏବଂ ପେସାଦାରଙ୍କ ପାଇଁ ଏବେ କୃତ୍ରିମ ବୁଦ୍ଧିମତ୍ତା (ଏଆଇ) ସବୁଠୁ ବଡ଼ ଚ୍ୟାଲେଞ୍ଜ ସୃଷ୍ଟି କରିଛି। ବର୍ତ୍ତମାନ ଅନ୍ତର୍ଜାତୀୟ ସ୍ତରରେ ପ୍ରାୟ ସମସ୍ତ ପ୍ରମୁଖ କମ୍ପାନୀ ଏଆଇ ଏବଂ କ୍ଲାଉଡ୍ ଭିତ୍ତିଭୂମି ପ୍ରତିଷ୍ଠା ଲାଗି ପର୍ଯ୍ୟାପ୍ତ ମାତ୍ରାରେ ପୁଞ୍ଜିନିବେଶକରି ସେହି ଅନୁଯାୟୀ କାର୍ଯ୍ୟ ଢାଞ୍ଚା ପ୍ରସ୍ତୁତି ଆରମ୍ଭ କରିଥିବାରୁ ବିଭିନ୍ନ କମ୍ପାନୀରୁ ବିପୁଳ ସଂଖ୍ୟାରେ କର୍ମଚାରୀ ଛଟେଇ ଆରମ୍ଭ ହୋଇଛି। ଏହି କ୍ରମରେ ଓରାକଲ୍ଠାରୁ ଆରମ୍ଭକରି ଆମାଜନ୍ ପର୍ଯ୍ୟନ୍ତ ହଜାର ହଜାର ସଂଖ୍ୟାରେ କର୍ମଚାରୀଙ୍କୁ ଚାକିରିରୁ ବିଦା ହେବାକୁ ପଡ଼ୁଛି। ଏହି ଧାରାର ପ୍ରଭାବ ଭାରତ ଉପରେ ମଧ୍ୟ ପଡ଼ିଛି। ଭାରତ ସମେତ ବିଶ୍ୱର ବିଭିନ୍ନ ଭାଗରେ ହଜାର ହଜାର ଆଇଟି ପେସାଦାର କାର୍ଯ୍ୟ କରୁଛନ୍ତି। କିନ୍ତୁ ବର୍ତ୍ତମାନ ଯେଭଳି ଛଟେଇ ଆରମ୍ଭ ହୋଇଛି ତଦ୍ଦ୍ବାରା ଅଧିକାଂଶ ଭାରତୀୟ ନିଯୁକ୍ତି ହରାଇବା ଆଶଙ୍କା ବଢ଼ିବାରେ ଲାଗିଛି। ଅନ୍ତର୍ଜାତୀୟ ସ୍ତରର ଏକ ସ୍ବତନ୍ତ୍ର ପ୍ଲାଟ୍ଫର୍ମ ‘ଲେଅଫସ୍ ଡଟ୍ ଏଫ୍ଓ୍ବାଇଆଇ’ ରିପୋର୍ଟ ଅନୁସାରେ ଗତ ବର୍ଷଠାରୁ ଏଆଇ ପ୍ରଭାବରେ ବୈଷୟିକ ଏବଂ ଆଇଟି କ୍ଷେତ୍ରରେ ଛଟେଇ ଆରମ୍ଭ ହୋଇଥିଲା। କେବଳ ୨୦୨୫ରେ ବୈଶ୍ୱିକ ସ୍ତରରେ ୨୧୮ କମ୍ପାନୀରୁ ୧,୧୨,୭୩୨ କର୍ମଚାରୀ ଛଟେଇ ହୋଇଥିଲେ। ଏହି ଧାରାରେ ଚଳିତ ବର୍ଷ ମଧ୍ୟ ବିଭିନ୍ନ କମ୍ପାନୀ ସେମାନଙ୍କ କର୍ମଚାରୀ ସଂଖ୍ୟାରେ ବ୍ୟାପକ ହ୍ରାସ କରିଛନ୍ତି।
ଆମେରିକାର ଅନ୍ୟତମ ପ୍ରମୁଖ ଆଇଟି ଉଦ୍ୟୋଗ ଓରାକଲ୍ କର୍ପୋରେଶନ ବିଶ୍ୱସ୍ତରରେ ୩୦ ହଜାର କର୍ମଚାରୀଙ୍କୁ ଛଟେଇ କରିଛି। କମ୍ପାନୀର ଆର୍ଥିକ ସ୍ଥିତି ଭଲ ରହିବା ସହ ଆୟ ଅଭିବୃଦ୍ଧି ଯଥେଷ୍ଟ ରହିଥିଲେ ମଧ୍ୟ କମ୍ପାନୀ ଉକ୍ତ ସଂଖ୍ୟାରେ କର୍ମଚାରୀଙ୍କୁ ବିଦା କରିଛି। ଏହି କ୍ରମରେ ସପ୍ତାହକ ମଧ୍ୟରେ ଭାରତରେ ଓରାକଲ୍ରେ କାର୍ଯ୍ୟ କରୁଥିବା ୨୫୦୦ ଆଇଟି ପେସାଦାର ନିଯୁକ୍ତି ହରାଇଛନ୍ତି। ଏହାକୁ ମିଶାଇ ବର୍ତ୍ତମାନ ସୁଦ୍ଧା ୧୨୦୦୦ ଭାରତୀୟ ଓରାକଲ୍ରୁ ବିଦା ହୋଇସାରିଲେଣି। ଛଟେଇ ହୋଇଥିବା କର୍ମଚାରୀମାନଙ୍କୁ କର୍ମାବସାନଜନିତ କ୍ଷତିପୂରଣ ଦେବାକୁ ମଧ୍ୟ ଓରାକଲ୍ ଘୋଷଣା କରିଛି। ବର୍ତ୍ତମାନ କମ୍ପାନୀ କୃତ୍ରିମ ବୁଦ୍ଧିମତ୍ତା(ଏଆଇ) ଏବଂ ଡାଟା ସେଣ୍ଟର ସମେତ କ୍ଲାଉଡ୍ ଭିତ୍ତିଭୂମି ପ୍ରତିଷ୍ଠା ଦିଗରେ ଅଧିକ ନିବେଶ କରୁଥିବାରୁ ଆର୍ଥିକ ଚାପ ହ୍ରାସ କରିବା ପାଇଁ କର୍ମଚାରୀ ସଂଖ୍ୟା ହ୍ରାସ କରିବାକୁ ନିଷ୍ପତ୍ତି ନେଇଥିବା କୁହାଯାଉଛି। ଏଆଇ କ୍ଷେତ୍ରରେ କାର୍ଯ୍ୟ କରୁଥିବା ଓପନ୍ ଏଆଇ ଏବଂ ଓରାକଲ୍ ମଧ୍ୟରେ ଆଗାମୀ ୫ ବର୍ଷ ମଧ୍ୟରେ ୩୦୦ ବିଲିୟନ ଡଲାରର କାରବାର ପାଇଁ ଚୁକ୍ତି ସ୍ବାକ୍ଷରିତ ହୋଇଛି। ୨୦୨୫-୨୬ ଆର୍ଥିକ ବର୍ଷର ତୃତୀୟ ତ୍ରୈମାସରେ କମ୍ପାନୀର କାରବାର ୨୨ ପ୍ରତିଶତ ଅଭିବୃଦ୍ଧିରେ ୧୭. ୨ ବିଲିୟନ ଡଲାର ରହିଥିଲେ ହେଁ ଋଣ ବୋଝ ବଢ଼ି ଚାଲିଥିବାରୁ ଓରାକଲ୍ ବିଭିନ୍ନ କ୍ଷେତ୍ରରେ ଖର୍ଚ୍ଚ କାଟ କରିବାକୁ ବାଧ୍ୟ ହୋଇଥିବା କୁହାଯାଇଛି।
Dharitri – Odisha’s No.1 Odia Daily
