ଦିଗପହଣ୍ଡି,୩।୪(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି-ଘୋଡ଼ାହାଡ଼ ଡ୍ୟାମ ରାସ୍ତାର ସନ୍ଥ ଅରକ୍ଷିତ ଛକରେ ଥିବା ପୋଖରୀରୁ କୈବର୍ତ୍ତମାନେ ଶୁକ୍ରବାର ସକାଳେ ମାଛ ଧରୁଥିବା ବେଳେ ଜାଲରେ ମାଛ ସହ ଏକ କୁମ୍ଭୀର ଛୁଆ ମିଳିଥିଲା। ଏ ନେଇ ଦିଗପହଣ୍ଡି ବନ ବିଭାଗକୁ ସୂଚନା ମିଳିବା ପରେ ରେଞ୍ଜର ଦିବ୍ୟ ରଞ୍ଜନ ସାହୁଙ୍କ ନିର୍ଦ୍ଦେଶକ୍ରମେ ଫରେଷ୍ଟର ସନ୍ତୋଷ ବିଷୋୟୀ ରତ୍ନ, ଫରେଷ୍ଟାଗାର୍ଡ ପ୍ରଦୀପ ସ୍ବାଇଁ ଘଟଣାସ୍ଥଳରେ ପହଞ୍ଚି କୁମ୍ଭୀର ଛୁଆକୁ ସୁରକ୍ଷିତ ଅବସ୍ଥାରେ ଉଦ୍ଧାର କରି ଘୋଡ଼ାହାଡ଼ ଡ଼୍ୟାମରେ ଛାଡିଥିବା ଜଣାପଡ଼ିଛି। ରବି ଫସଲ ପାଇଁ କିଛିଦିନ ପୂର୍ବେ ଡ୍ୟାମରୁ କେନାଲ ଯୋଗେ ପାଣି ଛଡାଯାଇଥିଲା। କୁମ୍ଭୀର ଛୁଆଟି ଡ୍ୟାମରୁ କେନାଲ ପାଣିରେ ଭାସି ଆସି ପୋଖରୀକୁ ଆସିଥିବା ସନ୍ଦେହ କରାଯାଇଛି। ଉଦ୍ଧାର କୁମ୍ଭୀରର ବୟସ ୪/୫ ମାସ ହେବ ବୋଲି ଫରେଷ୍ଟର କହିଛନ୍ତି। ଚଳିତବର୍ଷ ଘୋଡ଼ାହାଡ଼ ଡ଼୍ୟାମରେ ଭରପୁର ପାଣି ମହଜୁଦ ଥିବା କାରଣରୁ କୁମ୍ଭୀର ପ୍ରଜନନ ସଂଖ୍ୟା ଦ୍ରୁତଗତିରେ ବୃଦ୍ଧି ପାଉଛି। ଗତ ଜାନୁୟାରୀ ୧୦ ତାରିଖରେ ବନବିଭାଗ ପକ୍ଷରୁ କୁମ୍ଭୀର ଗଣନା କରାଯାଇଥିଲା। ଡ଼୍ୟାମରେ ପୂର୍ବବର୍ଷ ମାନଙ୍କ ତୁଳନାରେ ଚଳିତବର୍ଷ ୬୩ କୁମ୍ଭୀର ଥିବା ଗଣନା ରିପୋର୍ଟରୁ ଜଣାପଡ଼ିଛି। ବିଗତ ୪ ବର୍ଷରେ ବ୍ରହ୍ମପୁର ବନଖଣ୍ଡ ଅଧୀନ ଏହି ଡ୍ୟାମ ଓ ଡ୍ୟାମ ସଂଲଗ୍ନ ବିଭିନ୍ନ ଗ୍ରାମର ପୋଖରୀମାନଙ୍କରେ କୁମ୍ଭୀରଙ୍କ ସଂଖ୍ୟା ୭୬ରୁ ବୃଦ୍ଧି ପାଇ ୯୫ରେ ପହଞ୍ଚିଥିବା ଜଣାପଡ଼ିଛି । ରାଜ୍ୟ ସରକାରଙ୍କ ଜଙ୍ଗଲ ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗ ବ୍ରହ୍ମପୁର ବନଖଣ୍ଡ ଅଧୀନ ଦିଗପହଣ୍ଡି ବନବିଭାଗ ରେଞ୍ଜ କାର୍ଯ୍ୟାଳୟ ପକ୍ଷରୁ ନିୟମିତ ଏହାର ସୁରକ୍ଷା ପାଇଁ ନିଆଯାଉଥିବା ପଦକ୍ଷେପ କାରଣରୁ କ୍ରମଶଃ ଏଠାରେ କୁମ୍ଭୀରଙ୍କ ସଂଖ୍ୟା ବୃଦ୍ଧି ପାଉଥିବା ଜଣାପଡ଼ିଛି।
