ଇସଲାମାବାଦ,୪।୧୧: ପାକିସ୍ତାନରେ ପୁଣି ଜଣେ ପୂର୍ବତନ ପ୍ରଧାନମନ୍ତ୍ରୀଙ୍କ ଉପରେ ଆକ୍ରମଣ ହେବା ପରେ ରାଜନେତାଙ୍କ ସୁରକ୍ଷାକୁ ନେଇ ପ୍ରଶ୍ନ ଉଠିଛି। ସାଧାରଣ ଲୋକ ତ ଦୂରର କଥା ଏହି ଦେଶ ରାଜନେତା ଏବଂ ପୂର୍ବ ପ୍ରଧାନମନ୍ତ୍ରୀଙ୍କ ପାଇଁ ସୁରକ୍ଷିତ ନୁହେଁ ବୋଲି ଚର୍ଚ୍ଚା ହେଉଛି। ବିଗତ ଦିନରେ ଘଟିଥିବା ସେଭଳି କିଛି ଘଟଣା ଏହାର ପ୍ରମାଣ।
ପାକିସ୍ତାନର ପ୍ରଥମ ପ୍ରଧାନମନ୍ତ୍ରୀ ଲିଆକତ ଅଲି ଖାଁଙ୍କୁ ଗୁଳି କରି ହତ୍ୟା କରାଯାଇଥିଲା। ସେ ରାଓ୍ବଲପିଣ୍ଡିର କମ୍ପାନୀ ବାଗରେ ରାଲି କରୁଥିବା ବେଳେ ତାଙ୍କ ଛାତିରେ ତିନୋଟି ଗୁଳି ବାଜିଥିଲା। ପରେ ଏହି କମ୍ପାନୀ ବାଗ୍ର ନାମ ବଦଳାଇ ଲିଆକତ ବାଗ୍ ରଖିଦିଆଯାଇଥିଲା।
ଏହି ଲିଆକତ ବାଗ୍ରୁ ପୂର୍ବତନ ପ୍ରଧାନମନ୍ତ୍ରୀ ବେନଜିର ଭୁଟ୍ଟୋଙ୍କ ରାଲି ଯାଉଥିବାବେଳେ ତାଙ୍କୁ ହତ୍ୟା କରାଯାଇଥିଲା। ତାଙ୍କ ବ୍ୟତିତ ଅନ୍ୟ ୨୫ ଲୋକଙ୍କ ମୃତ୍ୟୁ ହୋଇଥିଲା। ୧୫ବର୍ଷୀୟ ବିଲାଲ ତାଙ୍କୁ ହତ୍ୟା କରିବା ଲାଗି ମାନବ ବୋମା ସାଜି ନିଜ ଜୀବନ ମଧ୍ୟ ନେଇଥିଲେ।
୧୦-୧୧ ନଭେମ୍ବର ୧୯୭୪ ଅଧାରାତିରେ ଲାହୋରର ଏକ ଗାଡି ଉପରେ ଆତତାୟୀମାନେ ଚାରିଆଡୁ ଗୁଳିଚାଳନା କରିଥିଲେ। ଏହି କାରକୁ ଅହମ୍ମଦ ରଜା କସୁରୀ ଚଳାଉଥିଲେ। ସାଙ୍ଗରେ ତାଙ୍କର ବାପା ଏବଂ ସ୍ତ୍ରୀ ଥିଲେ। ଆକ୍ରମଣରେ ବାପାଙ୍କର ମୃତ୍ୟୁ ହୋଇଥିବା ବେଳେ ଅନ୍ୟମାନେ ଆହତ ହୋଇଥିଲେ। ଏହି ଘଟଣାରେ ରଜା କସୁରୀ ତତ୍କାଳିନ ପ୍ରଧାନମନ୍ତ୍ରୀ ଜୁଲ୍ଫିକାର ଅଲି ଭୁଟ୍ଟୋଙ୍କ ଉପରେ ମାମଲା ରୁଜୁ କରିଥିଲେ। ପରେ ଜୁଲ୍ଫିକାରଙ୍କୁ ଦୋଷୀ ସାବ୍ୟସ୍ତ କରାଯାଇ ଫାଶି ଦିଆଯାଇଥିଲା।
