ଭଞ୍ଜନଗର,୯ା୪(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଥାନା ଅନ୍ତର୍ଗତ କୋଟିବିରାଡ଼ି ନିକଟରେ ଏକ କଲଭର୍ଟରେ ମର୍ମନ୍ତୁଦ ସଡ଼କ ଦୁର୍ଘଟଣା । ବୁଧବାର ବିଳମ୍ବିତ ରାତିରେ ଏକ ବାଇକ୍ ଦୁର୍ଘଟଣାଗ୍ରସ୍ତ ହୋଇଛି। ଏଥିରେ ଶ୍ରମିକ ସଞ୍ଜୟ ପ୍ରଧାନ ଘଟଣାସ୍ଥଳରେ ମୃତ୍ୟୁବରଣ କରିଥିବା ବେଳେ ବାବୁ ମଲିକ୍ ଗୁରୁତର ଭାବେ ଆହତ ହୋଇଥିଲେ । ବାବୁଙ୍କୁ ଅଧିକ ଚିକିତ୍ସା ପାଇଁ ବ୍ରହ୍ମପୁର ବଡ ମେଡିକାଲରେ ଭର୍ତ୍ତି କରାଯାଇଛି । ଏହି ଦୁଃଖଦ ଘଟଣା ପରେ ସଂପୃକ୍ତ ଅଞ୍ଚଳରେ ଶୋକର ଛାୟା ଖେଳିଯାଇଛି । ଭଞ୍ଜନଗର ପୋଲିସ ଏନେଇ ଏକ ମାମଲା ରୁଜୁ କରି ଘଟଣାର ଅଧିକ ତଦନ୍ତ ଚଳାଇଛି ।
ଭଞ୍ଜନଗର ଦଶପଲ୍ଲା ଜାତୀୟ ରାଜପଥରେ ତ୍ରୁଟିପୂର୍ଣ୍ଣ କଲଭର୍ଟ ନିର୍ମାଣ ପାଇଁ ଏତେବଡ ଦୁର୍ଘଟଣା ଘଟିଲା ବୋଲି ସମ୍ପୃକ୍ତ ଅଞ୍ଚଳବାସୀ ଅଭିଯୋଗ କରିଛନ୍ତି । ଘଟଣାରୁ ପ୍ରକାଶ ଯେ ଗାଲେରୀ ଫାଣ୍ଡି ଅନ୍ତର୍ଗତ ହରିଗଡ ନିକଟସ୍ଥ ଚଢ଼େୟାପଲ୍ଲୀର ସାଗର ମଲିକଙ୍କ ଘରକୁ ବୁଧବାର ଜଗନ୍ନାଥପ୍ରସାଦ ଥାନା ଅନ୍ତର୍ଗତ ବାଉଁଶମଣି ଗ୍ରାମର ସଙ୍ଗାତ ସଞ୍ଜୟ ପ୍ରଧାନ ଯାଇଥିଲେ। ରାତିରେ ସଞ୍ଜୟ ପ୍ରଧାନ, ସାଗର ମଲ୍ଲିକ ଓ ସାଗରଙ୍କ ଭଣଜା ବାବୁ
ମିଶି ଦୁଇଟି ବାଇକରେ ଦଣ୍ଡନାଚ ଦେଖିବାକୁ ଭଞ୍ଜନଗର ନିକଟସ୍ଥ ଉଲୁଦନ ଅଭିମୁଖେ ଆସିଥିଲେ । ନାଚ ଦେଖିବା ପରେ ବାବୁ ଓ ସଞ୍ଜୟ କୁଲାଡ ଅଭିମୁଖେ ଫେରୁଥିଲେ। କୁଲାଡରେ ସଞ୍ଜୟ କାମ କରୁଥିବା ଯୋଗୁଁ ରାତିରେ କ୍ୟାମ୍ପକୁ ଫେରୁଥିବା ବେଳେ ବାଟରେ କୋଟିବିରାଡ଼ି ଗ୍ରାମ ଛକ ନିକଟର ଗୋଲେଇରେ ଥିବା କଳଭର୍ଟରେ ସେମାନଙ୍କ ବାଇକ୍ ଧକ୍କା ହୋଇଥିଲା। ଏହାପରେ ଖବର ପାଇ ନାଚ ଦେଖୁଥିବା ସାଗର ଘଟଣା ସ୍ଥଳରେ ପହଞ୍ଚି ସେମାନଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଚିକିତ୍ସା ପାଇଁ ଭଞ୍ଜନଗର ହସ୍ପିଟାଲ୍ ଆଣିଥିଲେ। ମେଡିକାଲରେ ସଞ୍ଜୟଙ୍କୁ ଡାକ୍ତର ମୃତ ଘୋଷଣା କରିଥିଲେ । ଗୁରୁତର ଆହତ ବାବୁଙ୍କୁ ଅଧିକ ଚିକିତ୍ସା ପାଇଁ ବ୍ରହ୍ମପୁର ନିଆଯାଇଛି । ସେଠାରେ ତାଙ୍କର ଆଇସିୟୁରେ ଚିକିତ୍ସା ଚାଲିଛି ।
