ଅହମଦାବାଦ,୩୧।୧୦: ଗୁଜୁରାଟର ମୋର୍ବି ସ୍ଥିତ କେବୁଲ ବ୍ରିଜ ଦୁର୍ଘଟଣାକୁ ନେଇ ପୋଲିସ ସୋମବାର ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଏହି ଘଟଣାରେ ପୋଲିସ ୯ଜଣଙ୍କୁ ଅଟକ ରଖି ପଚରାଉଚରା କରୁଛି। ଗିରଫ ହୋଇଥିବା ଲୋକଙ୍କ ମଧ୍ୟରେ ପୋଲର ପରିଚାଳକ ତଥା ରକ୍ଷଣାବେକ୍ଷଣ ସୁପରଭାଇଜର ଅଛନ୍ତି। ଏତଦ୍ବ୍ୟତୀତ ପୋଲ ପରିଚାଳନା ସହ ଜଡିତ ସମସ୍ତ ଲୋକଙ୍କୁ ପୋଲିସ ପଚରାଉଚରା କରୁଛି। ଅନ୍ୟପଟେ ଜଣେ ଅଧିକାରୀ ବୟାନ ଦେଇଛନ୍ତି ଯେ, ଉକ୍ତ ପୋଲର ମରାମତିକାରୀ ଏହାକୁ ଖୋଲିବା ପୂର୍ବରୁ ଅଧିକାରୀଙ୍କଠାରୁ ଫିଟ୍ନେସ ସାର୍ଟିଫିକେଟ ନେଇ ନ ଥିଲେ କିମ୍ବା ଏହାକୁ ଖୋଲିବାକୁ ସରକାରଙ୍କଠାରୁ ମଧ୍ୟ ଅନୁମତି ନିଆଯାଇ ନ ଥିଲା। ତେବେ ମୋର୍ବି ଦୁର୍ଘଟଣା ପରେ ପ୍ରଶାସନ ପକ୍ଷରୁ ଧାରା ୩୦୪, ୩୦୮, ୧୧୪ ଅନୁଯାୟୀ ଜୁଲ ବ୍ରିଜ ମ୍ୟାନେଜମେଣ୍ଟ ମ୍ୟାନେଜର, ରକ୍ଷଣାବେକ୍ଷଣ ଦଳର ମ୍ୟାନେଜରଙ୍କ ବିରୋଧରେ ଏକ ଅପରାଧ ମାମଲା ରୁଜୁ କରାଯାଇଛି। ପୋଲର ସଠିକ୍ ରକ୍ଷଣାବେକ୍ଷଣ କରାଯାଇ ନାହିଁ ବୋଲି ଅଭିଯୋଗରେ ଦର୍ଶାଯାଇଛି। ଅନ୍ୟପଟେ ମଙ୍ଗଳବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମୋର୍ବିରେ ପହଞ୍ଚି ପୀଡିତଙ୍କ ପରିବାର ଲୋକଙ୍କୁ ଭେଟିବେ ବୋଲି ଜଣାପଡ଼ିଛି। ଏଥିସହ ମୁଖ୍ୟମନ୍ତ୍ରୀ ଭୁପେନ୍ଦ୍ର ପଟେଲ ମଧ୍ୟ ଉଦ୍ଧାର କାର୍ଯ୍ୟର ସମୀକ୍ଷା କରିଛନ୍ତି।
