ମୁମ୍ବାଇ,୨୯ା୯: ଆମେରିକୀୟ ଡଲାର ତୁଳନାରେ ଭାରତୀୟ ମୁଦ୍ରାର ଅବମୂଲ୍ୟାୟନ ଧାରା ଜାରି ରହିଛି। ଟଙ୍କା ଦୁର୍ବଳ ହୋଇ ନିମ୍ନ ସ୍ତରକୁ ଖସିବାରେ ରେକର୍ଡ ଭାଙ୍ଗି ଚାଲିଛି। ବୁଧବାର ଟଙ୍କା ମୂଲ୍ୟ ୦.୪% ଦୁର୍ବଳ ହେବା ଯୋଗୁ ଡଲାର ମୂଲ୍ୟ ୮୧.୯୪ ଟଙ୍କାକୁ ବୃଦ୍ଧି ହୋଇଛି। ମଙ୍ଗଳବାର ଟଙ୍କା ତୁଳନାରେ ଡଲାର ମୂଲ୍ୟ ୮୧.୫୮ ଟଙ୍କା ରହିଥିଲା। ଆମେରିକାରେ ଦେଖାଦେଇଥିବା ୪୦ ବର୍ଷର ଉଚ୍ଚ ମୁଦ୍ରାସ୍ଫୀତିକୁ ନିୟନ୍ତ୍ରଣ କରିବା ପାଇଁ କେନ୍ଦ୍ରୀୟ ବ୍ୟାଙ୍କ ‘ଫେଡେରାଲ ରିଜର୍ଭ’ ଗତ ମାର୍ଚ୍ଚ ମାସଠାରୁ ଅଦ୍ୟାବଧି ସୁଧହାର ୩୦୦ ବିପିଏସ୍ ବଢ଼ାଇ ସାରିଲାଣି। ତଥାପି ମୁଦ୍ରାସ୍ଫୀତି ବୃଦ୍ଧି ଉପରେ ଲଗାମ ଲାଗିପାରୁନାହିଁ।
ଏଭଳି ସ୍ଥିତିରେ ଫେଡେରାଲ ରିଜର୍ଭର ଅଧିକାରୀମାନେ ଆସନ୍ତା ଡିସେମ୍ବର ସୁଦ୍ଧା ସୁଧହାର ଆଉ ୧୨୫ ବିପିଏସ୍ ବଢ଼ାଇବା ସପକ୍ଷରେ ମତ ଦେଇଛନ୍ତି। ଏହାକୁ ନେଇ ଅନ୍ତର୍ଜାତୀୟ ବଜାରରେ ଅସ୍ଥିରତା ସୃଷ୍ଟି ହେବା ସହ ଡଲାର ଚାହିଦା ବୃଦ୍ଧି ପାଇଛି। ଫଳରେ ବୁଧବାର ଡଲାର ସୂଚକାଙ୍କ ୨୦ ବର୍ଷର ସର୍ବୋଚ୍ଚ ସ୍ତରରେ ଅର୍ଥାତ୍ ୧୧୪.୭୮ରେ ପହଞ୍ଚତ୍ଛି। ଅନ୍ୟପକ୍ଷରେ ଟଙ୍କାର ମୂଲ୍ୟ ହ୍ରାସ ରୋକିବା ପାଇଁ ଭାରତୀୟ ରିଜର୍ଭ ବ୍ୟାଙ୍କ (ଆର୍ବିଆଇ) ବିପୁଳ ପରିମାଣର ଡଲାର ବିକ୍ରି କରିବାକୁ ବାଧ୍ୟ ହେଉଛି। ଫୋରେକ୍ସ ବ୍ୟବସାୟୀ ଅନୁମାନ କରୁଛନ୍ତି ଯେ, ଆର୍ବିଆଇ ଦୈନିକ ୧ ବିଲିୟନରୁ ୧.୮ ବିଲିୟନ ଡଲାର ବିକ୍ରି କରିପାରେ।
