ଭଞ୍ଜନଗର,୩୦ା୩(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର କେନ୍ଦ୍ରୀୟ ବିଦ୍ୟାଳୟ ଆଜକୁ ୧୬ ବର୍ଷ ହେବ ସ୍ଥାନୀୟ କବି ସମ୍ରାଟ ଉପେନ୍ଦ୍ର ଭଞ୍ଜ ମହାବିଦ୍ୟାଳୟର ଅବ୍ୟବହୃତ ହଷ୍ଟେଲ କୋଠାରେ ଚାଲିଛି। ବିଦ୍ୟାଳୟ ଖୋଲିବାର ୧୬ ବର୍ଷ ବିତିଗଲାଣି କିନ୍ତୁ ସ୍ଥାୟୀ କୋଠା ହୋଇପାରୁ ନ ଥିଲା। ଯୁକ୍ତ ୨ ମଧ୍ୟ ଖୋଲି ପାରୁ ନ ଥିଲା। ଯାହାକୁ ନେଇ ଅଞ୍ଚଳବାସୀଙ୍କ ମଧ୍ୟରେ କ୍ଷୋଭ ଭରି ରହିଥିଲା। ଗତବର୍ଷ ଅଧ୍ୟକ୍ଷ ଭାବେ ଯୋଗ ଦେଇଥିବା ପ୍ରଦୀପ କମାନୁଙ୍କ ପ୍ରଚେଷ୍ଟାରେ ବିଦ୍ୟାଳୟର ଅନେକ କିଛି ଉନ୍ନତି ଧିରେ ଧିରେ ହେଉଛି। ଅଧ୍ୟକ୍ଷ କମାନୁଙ୍କ ପ୍ରଚେଷ୍ଟା ଏବଂ ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକ, ଭଞ୍ଜନଗର ଉପଜିଲାପାଳ ଉମାଶଙ୍କର ବେହେରା, ଗଞ୍ଜାମ ଜିଲା ପ୍ରଶାସନ ଏବଂ କେଏସୟୁବି କଲେଜ ଅଧ୍ୟକ୍ଷଙ୍କ ସହଯୋଗରେ ୨୦୨୬-୨୭ ଶିକ୍ଷାବର୍ଷରେ ଯୁକ୍ତ ୨ ବିଜ୍ଞାନ ଖୋଲିବାକୁ ଯାଉଛି।
ଇତିମଧ୍ୟରେ କେନ୍ଦ୍ରୀୟ ବିଦ୍ୟାଳୟ ସଂଗଠନ ଦିଲ୍ଲୀ ପକ୍ଷରୁ ଯୁକ୍ତ ୨ ଖୋଲିବା ପାଇଁ ୭ ଜଣ ପିଜିଟି ଶିକ୍ଷକ ପଦବୀକୁ ଅନୁମୋଦନ ଦେଇଛନ୍ତି। ଖୁବ୍ଶୀଘ୍ର ଉକ୍ତ ନୂତନ ଶିକ୍ଷକମାନେ କାର୍ଯ୍ୟରେ ଯୋଗଦେବେ। ସେଗୁଡ଼ିକ ହେଲା (ପଦାର୍ଥ ବିଜ୍ଞାନ, ରସାୟନ ବିଜ୍ଞାନ, ଗଣିତ, ଜୀବ ବିଜ୍ଞାନ, କମ୍ପ୍ୟୁଟର ସାଇନ୍ସ, ଇଂରାଜୀ ଓ ହିନ୍ଦୀ)। ବିଦ୍ୟାଳୟ ସ୍ଥାପିତ ହେବାର ୧୬ ବର୍ଷ ପରେ ଏଠାରେ ପ୍ରଥମ ଥର ପାଇଁ ଯୁକ୍ତ ୨ରେ ନାମ ଲେଖା ହେବ। ଯାହାକୁ ନେଇ ଅଭିଭାବକ ଏବଂ ଅଞ୍ଚଳବାସୀ ଖୁସିବ୍ୟକ୍ତ କରିଛନ୍ତି। ଏଥିସହ ଅଭିଭାବକମାନେ ବିଧାୟକ, ଉପଜିଲାପାଳ ଏବଂ ଅଧ୍ୟକ୍ଷଙ୍କୁ କୃତଜ୍ଞତା ଜଣାଇଛନ୍ତି।
ଇତିମଧ୍ୟରେ ବିଦ୍ୟାଳୟର ସ୍ଥାୟୀ କୋଠା ନିର୍ମାଣ ପାଇଁ କେନ୍ଦ୍ର ସରକାର ୩୩ କୋଟି ୧୦ ଲକ୍ଷ ଟଙ୍କା ଅନୁଦାନ ଦେଇଛନ୍ତି। ତାହାର ଟେଣ୍ଡର ପ୍ରକ୍ରିୟା ସରିବା ପରେ କାମ ଆରମ୍ଭ ହେବ। ୨୦୨୮ ଶିକ୍ଷା ବର୍ଷରୁ ସ୍ଥାୟୀ କୋଠାରେ ଶିକ୍ଷାଦାନ ଲକ୍ଷ୍ୟ ରଖାଯାଇଛି। କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଆଗ୍ରହ ଯୋଗୁ ମଧ୍ୟ ଭଞ୍ଜନଗର କେନ୍ଦ୍ରୀୟ ବିଦ୍ୟାଳୟର ଗୁରୁତ୍ୱପୂର୍ଣ୍ଣ ବିକାଶ ବହୁବର୍ଷ ପରେ ହେଉଛି। ଚଳିତ ବର୍ଷ କେନ୍ଦ୍ରୀୟ ବିଦ୍ୟାଳୟ ମାଟ୍ରିକ ପରୀକ୍ଷା ଫଳ ପ୍ରକାଶର ୧୦ ଦିନ ମଧ୍ୟରେ ଯୁକ୍ତ ୨ ପ୍ରଥମ ବର୍ଷ ବିଜ୍ଞାନ ପାଇଁ ନାମଲେଖା ଆରମ୍ଭ ହେବ। ପ୍ରଥମେ ଏଠାରେ ନିଜ
ବିଦ୍ୟାଳୟରେ ପଢୁଥିବା ଛାତ୍ରୀଛାତ୍ରଙ୍କୁ ମେରିଟ୍ ଲିଷ୍ଟ ଅନୁସାରେ ନାମ ଲେଖା ପାଇଁ ସୁଯୋଗ ମିଳିବ। ବଳକା ସିଟ୍ ରହିଲେ ବାହାର ଛାତ୍ରୀଛାତ୍ରଙ୍କୁ ସରକାରଙ୍କ ନୀତି ନିୟମ ଅନୁଯାୟୀ ନାମ ଲେଖାର ସୁଯୋଗ ଦିଆଯିବ। ଏହି ଖବର ଜଣାପଡ଼ିବା ପରେ ଭଞ୍ଜନଗରବାସୀଙ୍କ ପାଇଁ ତାହା ଖୁସି ଓ ଗର୍ବର ବିଷୟ ହୋଇପଡ଼ିଛି।
