ଭୁବନେଶ୍ୱର,୨୩ା୮ (ବ୍ୟୁରୋ):ଭୁବନେଶ୍ୱର ରେଳଷ୍ଟେଶନଠାରୁ ମାତ୍ର ୧୦୦ ମିଟର ଦୂରରେ ସୋମବାର ରାତି ୮.୩୫ରେ ଏକ ମାଲବାହୀ ଟ୍ରେନ ଲାଇନ୍ଚ୍ୟୁତ ହୋଇଛି। ଝାଡ଼ଖଣ୍ଡର ଚକ୍ରଧରପୁରରୁ ଆନ୍ଧ୍ରପ୍ରଦେଶର ବିଜୟନଗରମ୍ ଅଭିମୁଖେ ଯାଉଥିବା ଏକ ସିମେଣ୍ଟ ବୋଝେଇ ମାଲବାହୀ ଟ୍ରେନ୍ ଭୁବନେଶ୍ୱର ଷ୍ଟେଶନ ନିକଟରେ ୫ ବଗିକୁ ଛାଡ଼ି ଆଗକୁ ଚାଲିଯାଇଥିଲା। ତାହା ଲାଇନ୍ଚ୍ୟୁତ୍ ହୋଇ ରେଳଧାରଣାର କିଛି ଅଂଶ ନଷ୍ଟ ହୋଇଛି। ଏହାସହ ୨ଟି ଲାଇନ୍ରେ ଟ୍ରେନ ଚଳାଚଳ ବ୍ୟାହତ ହୋଇଛି। ଲାଇନ୍ଚ୍ୟୁତର ସ୍ପଷ୍ଟ କାରଣ ଜଣାପଡ଼ି ନାହିଁ। ଘଟଣାସ୍ଥଳରେ ରେଲଓ୍ବେ ବରିଷ୍ଠ ଅଧିକାରୀ ଓ ପୋଲିସ ଯାଞ୍ଚ କରିଛନ୍ତି।
ରିପୋର୍ଟ ପ୍ରସ୍ତୁତ ସୁଦ୍ଧା ରେଳ ଧାରଣାରୁ ଲାଇନ୍ଚ୍ୟୁତ ବଗିକୁ ହଟାଇ ଟ୍ରେନ ଚଳାଚଳ ସ୍ବାଭାବିକ କରିବା ପାଇଁ ଅଧିକାରୀମାନେ ଉଦ୍ୟମ ଚଳାଇଛନ୍ତି। ହୀରାଖଣ୍ଡ, ଜନ ଶତାବ୍ଦୀ, ପୁରୀ-ଦୁର୍ଗ, ତପସ୍ବନୀ, ପୁରୀ-ଗାନ୍ଧିଧାମ ଓ ପୁରୀ-ହାଓଡା ଏକ୍ସପ୍ରେସ୍ ଆଦି ପ୍ରାୟ ୧୦ ଟ୍ରେନର ଯାତ୍ରା ବିଳମ୍ବ ହୋଇଛି। ରାଜଧାନୀ ଏକ୍ସପ୍ରେସ ମଞ୍ଚେଶ୍ୱର ଷ୍ଟେଶନ ନିକଟରେ ଅଟକି ରହିଛି। ରେଳ ଧାରଣାର କ୍ଷତି ହୋଇଥିବାରୁ ମଙ୍ଗଳବାର ସକାଳ ସୁଦ୍ଧା ତାହାକୁ ସଜାଡ଼ିବାକୁ ଉଦ୍ୟମ କରାଯାଉଛି।
