ଉଚ୍ଚଶିକ୍ଷା ପାଇଁ ଉଦ୍ଦିଷ୍ଟ ଏଣ୍ଟ୍ରାନ୍ସ ବା ପ୍ରବେଶିକା ପରୀକ୍ଷାରେ ଥରେ କି ଦୁଇଥର ଫେଲ୍ ହୋଇଗଲେ ଯେଉଁଠି ଆଜିକାର ଯୁବପିଢୀମାନେ ନିଜର ଆତ୍ମବିଶ୍ୱାସକୁ ହରାଇ ବସୁଛନ୍ତି, ସେ କ୍ଷେତ୍ରରେ ଲିୟାଙ୍ଗ ଶୀଙ୍କୁ ଏକ ଉଦାହରଣ ଭାବେ ନିଆଯାଇପାରେ। ଚାଇନାର ଏହି ବ୍ୟକ୍ତିଙ୍କୁ ଏବେ ୫୫ ବର୍ଷ। ସେ ଜଣେ ସଫଳ ବିଲ୍ଡିଂ ମାଟେରିଆଲ୍ କମ୍ପାନୀର ମାଲିକ। ତାଙ୍କ ପାଖରେ ଟଙ୍କାପଇସାର ଅଭାବ ନାହିଁ। ଟଙ୍କା ବଳରେ ସେ ଯାହା ଚାହିଁବେ ତାହା କରିପାରିବେ। ତଥାପି ବି ତାଙ୍କର ଏକ ସ୍ବପ୍ନ ଆଜିଯାଏଁ ପୂରଣ ହୋଇପାରୁନାହିଁ। ଲିୟାଙ୍ଗର ପିଲାଟି ଦିନରୁ ସ୍ବପ୍ନ ଥିଲା ଚାଇନାର ପ୍ରସିଦ୍ଧ ସିଚ୍ଚୁଆନ୍ ୟୁନିର୍ଭସିଟିରେ ପାଠ ପଢିବେ। କିନ୍ତୁ ଆଜିଯାଏଁ ତାଙ୍କର ଏହି ସ୍ବପ୍ନ ସାକାର ହୋଇପାରିନାହିଁ। କାରଣ ଚାଇନାରେ କଲେଜ ଶିକ୍ଷା ଗ୍ରହଣ କରିବା ନିମନ୍ତେ ଏକ କମନ୍ ଟେଷ୍ଟ ହୋଇଥାଏ, ଯାହାକୁ ଗାଓକାଓ ଏକ୍ଜାମ୍ କୁହାଯାଏ। ଏହି ପ୍ରବେଶିକା ପରୀକ୍ଷାରେ ପାସ୍ କଲେ ଛାତ୍ରୀଛାତ୍ରଙ୍କୁ କଲେଜରେ ଆଡ୍ମିଶନ ମିଳିଥାଏ। କିନ୍ତୁ ୟା’ଭିତରେ ଲିୟାଙ୍ଗ ଥରେ କି ଦୁଇ ଥର ନୁହେଁ ପ୍ରାୟ ୨୫ ଥର ଉକ୍ତ ପ୍ରବେଶିକା ପରୀକ୍ଷା ଦେଇସାରିଲାଣି ଆଉ ପ୍ରତିଥର ପାସ୍ ବି ହେଉଛନ୍ତି। କିନ୍ତୁ ସେ ଯେତିକି ର଼୍ୟାଙ୍କ୍ ରଖୁଛନ୍ତି, ସେଥିରେ ଅନ୍ୟ ଯେ କୌଣସି ୟୁନିର୍ଭସିଟିରେ ଆଡ୍ମିଶନ୍ ନେଇହେବ ହେଲେ ସିଚ୍ଚୁଆନ୍ ୟୁନିର୍ଭସିଟିରେ ନାଁ ଲେଖେଇ ହେବନାହିଁ। ଯେହେତୁ ତାଙ୍କର ବଡ଼ ସ୍ବପ୍ନ ହେଉଛି ସିଚ୍ଚୁଆନ୍ ୟୁନିର୍ଭସିଟିରେ ପାଠ ପଢିବେ, ସେଥିପାଇଁ ସିଏ ଆଜିଯାଏଁ ପଢା ଜାରି ରଖିଛନ୍ତି ଆଉ ନିଜକୁ ପୁଣିଥରେ ପ୍ରବେଶିକା ପରୀକ୍ଷା ପାଇଁ ପ୍ରସ୍ତୁତ କରୁଛନ୍ତି। ସତରେ ଲିୟାଙ୍ଗର ଏହି ଚେଷ୍ଟା ଓ ଆତ୍ମବିଶ୍ୱାସ ଆଜିକାର ଯୁବପିଢୀଙ୍କୁ ନିଶ୍ଚୟ ପ୍ରେରଣା ଯୋଗାଇବ।
