ଭୋପାଳ,୧୭।୨: ମୁସଲିମ ଛାତ୍ରୀଙ୍କୁ ହିଜାବ ପିନ୍ଧି କ୍ଲାସରେ ବସିବାକୁ ନ ଦିଆଯିବାରୁ କର୍ନାଟକର ଉଡୁପି ଜିଲାରୁ ଆରମ୍ଭ ହୋଇଥିବା ବିବାଦ ଏବେ ବିଭିନ୍ନ ରାଜ୍ୟକୁ ବ୍ୟାପିଛି। କର୍ନାଟକ ହାଇକୋର୍ଟରେ ଏହାର ଶୁଣାଣି ଚାଲିଥିବା ବେଳେ ଭାରତରେ ହିଜାବ ପିନ୍ଧିବାର ଆବଶ୍ୟକତା ନାହିଁ ବୋଲି କହିଛନ୍ତି ଭାଜପାର ବିବାଦୀୟ ଏମ୍ପି ପ୍ରଜ୍ଞା ଠାକୁର।
“ଦେଶରେ କାହାକୁ ହିଜାବ ପିନ୍ଧିବାର ଆବଶ୍ୟକତା ନାହିଁ। କାରଣ ହିନ୍ଦୁମାନେ ମହିଳାଙ୍କୁ ପୂଜା କରନ୍ତି। ଘରେ ଯେଉଁମାନେ ସୁରକ୍ଷିତ ନୁହାନ୍ତି, ସେମାନେ ହିଜାବ ପିନ୍ଧନ୍ତି। ତୁମର ମାଦ୍ରାସା ଅଛି। ଯଦି ତୁମେ ସେଠାରେ ହିଜାବ ପିନ୍ଧ, ତେବେ ଆମର କିଛି କରିବାର ନାହିଁ। କିନ୍ତୁ ‘ହିନ୍ଦୁ ସମାଜ’ରେ ହିଜାବର ଆବଶ୍ୟକତା ନାହଁି” ବୋଲି ଯୋଗଦେଇ ମାଲେଗାଓଁ ବିସ୍ଫୋରଣ ଘଟଣାର ମୁଖ୍ୟ ଅଭିଯୁକ୍ତ ତଥା ଲୋକ ସଭା ଏମ୍ପି କହିଛନ୍ତି।
ମଧ୍ୟପ୍ରଦେଶର ଭୋପାଳରେ ଏକ ମନ୍ଦିରରେ ଆୟୋଜିତ ଇଭେଣ୍ଟରେ ଯୋଗଦେଇ ସେ କହିଛନ୍ତି, ହିଜାବ ହେଉଛି ପରଦା। ଭୁଲ ଦୃଷ୍ଟିରେ ଦେଖୁଥିବା ଲୋକଙ୍କ ବିରୋଧରେ ପରଦା କରାଯିବା ଉଚିତ। କିନ୍ତୁ ହିନ୍ଦୁମାନେ ସେମାନଙ୍କୁ ଭୁଲ ଦୃଷ୍ଟିରେ ଦେଖନ୍ତି ନାହିଁ। କାରଣ ସେମାନେ ମହିଳାଙ୍କୁ ପୂଜା କରନ୍ତି। ତୁମେ ହିଜାବ ଘରେ ପିନ୍ଧିବା ଉଚିତ।
