ନୂଆଦିଲ୍ଲୀ,୧୫।୯: ବିସିସିଆଇ ଅଧ୍ୟକ୍ଷ ସୌରଭ ଗାଙ୍ଗୁଲିଙ୍କ ଅଧିନାୟକତ୍ୱରେ ଖେଳାଯାଇଥିବା ନାଟଓ୍ବେଷ୍ଟ ଟ୍ରଫିକୁ ଆଜି ବି ଲୋକେ ମନେ ପକାନ୍ତି। ଭାରତୀୟ ଟିମ୍ ଅନେକ ଫାଇନାଲ ହାରିବା ପରେ ଉକ୍ତ ଟୁର୍ନାମେଣ୍ଟରେ ଜିତିଥିଲା। ୨୦୦୨ରେ ଖେଳାଯାଇଥିବା ଏହି ମ୍ୟାଚ୍ରେ ଭାରତୀୟ ଦଳ ଇଲଂଣ୍ଡକୁ ହରାଇଥିଲା। ଏଥିରେ ପ୍ରମୁଖ ଭୂମିକା ଗ୍ରହଣ କରିଥିଲେ ମହମ୍ମଦ କୈଫ। ଏକ ସାକ୍ଷାତକାରରେ କୈଫ ଉକ୍ତ ମ୍ୟାଚ୍ ସହ ଜଡ଼ିତ କିଛି ସ୍ମୃତିକୁ ପୁନଃ ତାଜା କରିଥିଲେ। ମ୍ୟାଚ୍ରେ ସଚିନ୍ ତେନ୍ଦୁଲକର ଆଉଟ୍ ହୋଇଯିବା ପରେ ଲୋକେ ଷ୍ଟାଡିୟମରୁ ବାହାରକୁ ଚାଲିଯାଇଥିଲେ। କେବଳ ଏତିକି ନୁହେଁ ଲୋକେ ଟିଭି ଦେଖିବା ମଧ୍ୟ ବନ୍ଦ କରିଦେଇଥିଲେ।
ସଚିନ ଆଉଟ୍ ହେବା ପରେ କୈଫ ପଡ଼ିଆକୁ ଯାଇଥିଲେ। ହେଲେ ଦର୍ଶକେ ଷ୍ଟାଡିୟମ ବାହାରକୁ ଯାଉଥିବା ଦେଖିବାକୁ ମିଳିଥିଲା। ସେ ମନେ ମନେ ତାଙ୍କୁ ଦେଖିବାକୁ କହିଥିଲେ। ହେଲେ କେହି ଶୁଣି ନ ଥିଲେ। ଏପରିକି ତାଙ୍କ ବାପାମା’ ମଧ୍ୟ ଫିଲ୍ମ ଦେଖିବାକୁ ଚାଲିଯାଇଥିଲେ। ସେତେବେଳେ ଶାହାରୁଖଙ୍କ ଫିଲ୍ମ ଦେବଦାସ ରିଲିଜ ହୋଇଥିଲା। ଘର ପାଖରେ ସିନେମାହଲ୍ ଥିବାରୁ ଘରଲୋକେ ସେଠାକୁ ଫିଲ୍ମ ଦେଖିବାକୁ ଚାଲିଯାଇଥିଲେ। ହେଲେ ପୁଅର ବ୍ୟାଟିଂ ଦେଖି ନ ଥିଲେ। ଯେତେବେଳେ ଆମେ ଜିତିଗଲୁ ସେତେବେଳେ ପଡୋଶୀ ଘରକୁ ଆସିଥିଲେ। ମାତ୍ର ଘରେ ତାଲା ଝୁଲୁଥିଲା। ସେମାନେ ସିନେମାହଲ ଯାଇଥିବା ଜାଣିବା ପରେ ଲୋକେ ସେଠାରେ ପହଞ୍ଚି ତାଙ୍କୁ ଭାରତ ଜିତିଥିବା ବିଷୟରେ କହିଥିଲେ।
ଉକ୍ତ ମ୍ୟାଚ୍ରେ ୭ନଂ ସ୍ଥାନରେ ଖେଳିବାକୁ ଆସିଥିଲେ କୈଫ। ସବୁବେଳେ ତାଙ୍କୁ ୭ରୁ ୮ ଓଭର ଖେଳିବାକୁ ସୁଯୋଗ ମିଳୁଥିବା ବେଳେ ସେଦିନ ୨୫ ଓଭର ମିଳିଥିଲା। ସେ ଯୁବରାଜଙ୍କ ସହ ମିଶି ଭାରତକୁ ଜିତାଇବାରେ ସଫଳ ହୋଇଥିଲା। ୩୨୬ ରନ୍ର ପିଛା କରୁଥିବା ଦଳ ଇଲଂଣ୍ଡକୁ ହରାଇଥିଲା। ୧୦୯ ବଲ୍ରେ କୈଫ ୮୭ ରନ୍ କରିଥିଲେ। ଯେଉଁଥିରେ ୬ ଚଉକା ଓ ୨ ଛକା ଥିଲା ବୋଲି ସେ କହିଛନ୍ତି। ଏହି ସ୍ମୃତି ସବୁଦିନ ପାଇଁ ତାଙ୍କ ମନେ ରହିବ ବୋଲି ସେ ମଧ୍ୟ କହିଥିଲେ।
