ନୂଆଦିଲ୍ଲୀ,୮।୯: ନିର୍ବାଚନ ରଣନୀତିଜ୍ଞ ଭାବରେ ପରିଚିତି ହାସଲ କରିଥିବା ପ୍ରଶାନ୍ତ କିଶୋର(ପିକେ)ଙ୍କୁ କଂଗ୍ରେସରେ ସାମିଲ କରିବା ପାଇଁ ଦଳରେ ଆଲୋଚନା ଚାଲିଛି। ୨୦୨୪ ନିର୍ବାଚନରେ କଂଗ୍ରେସ ପାଇଁ ପିକେ ଭରସା ସାଜିବେ। ଯଦି ତାଙ୍କ ପ୍ରବେଶକୁ ସହମତି ମିଳେ, ତେବେ ତାଙ୍କୁ ଅଲ ଇଣ୍ଡିଆ କଂଗ୍ରେସ କମିଟିର ସ୍ବତନ୍ତ୍ର ପ୍ୟାନେଲରେ ସାମିଲ କରାଯାଇପାରେ। ଏହି ପ୍ୟାନେଲ ନିର୍ବାଚନର ତଦାରଖ କରିବ।
ସୋନିଆ ଗାନ୍ଧୀ ହିଁ ପ୍ରଶାନ୍ତ କିଶୋରଙ୍କୁ ଦଳରେ ଅନ୍ତର୍ଭୁକ୍ତ କରିବା ଏବଂ ତାଙ୍କ ଭୂମିକା ସ୍ଥିର କରିବାର ଚୂଡ଼ାନ୍ତ ନିଷ୍ପତ୍ତି ନେବେ। ଏପର୍ଯ୍ୟନ୍ତ ଏନେଇ କୌଣସି ନିଷ୍ପତ୍ତି ସେ ନେଇ ନାହାଁନ୍ତି। କଂଗ୍ରେସ ସୂତ୍ରରୁ ପ୍ରକାଶ ଯେ ଜୁଲାଇ ମାସରୁ ଏ ପର୍ଯ୍ୟନ୍ତ ପ୍ରଶାନ୍ତ କିଶୋରଙ୍କୁ ଦଳରେ ସାମିଲ କରିବା ଲାଗି କୌଣସି ଆଲୋଚନା କରାଯାଇ ନାହିଁ।
ଏବେ କଂଗ୍ରେସ ହାଇକମାଣ୍ଡ ପଞ୍ଜାବ, ରାଜସ୍ଥାନ ଏବଂ ଛତିଶଗଡ ଭଳି ଗୁରୁତ୍ୱପୂର୍ଣ୍ଣ ରାଜ୍ୟଗୁଡ଼ିକରେ ଦଳର ସଦସ୍ୟଙ୍କ ମଧ୍ୟରେ ବୃଦ୍ଧି ପାଉଥିବା ଅସନ୍ତୋଷର ସମାଧାନ ପାଇଁ ବ୍ୟସ୍ତ ରହିଛି। କେତେକ ଗଣମାଧ୍ୟମ ଅନୁସାରେ ପ୍ରକାଶ କିଶୋରଙ୍କ କଂଗ୍ରେସରେ ସାମିଲ ସାଧାରଣ ହେବ ନାହିଁ । ତାଙ୍କୁ ନିର୍ବାଚନ ରଣନୀତି ପ୍ରସ୍ତୁତ କରିବା ପାଇଁ ଗଠନ ହେଉଥିବା ସ୍ବତନ୍ତ୍ର ପ୍ୟାନେଲରେ ଗୁରୁତ୍ୱପୂର୍ଣ୍ଣ ଦାୟିତ୍ୱ ପ୍ରଦାନ କରାଯିବାର ଯଥେଷ୍ଟ ସମ୍ଭାବନା ରହିଛି।
ସୂଚନାନୁସାରେ, ପ୍ରଶାନ୍ତ କିଶୋରଙ୍କ ପରାମର୍ଶରେ ଏହି ପ୍ୟାନେଲ ମଧ୍ୟ ଗଠନ କରାଯାଉଛି। ନିର୍ବାଚନ ପ୍ରସଙ୍ଗ ଏବଂ ଦଳର ମୁଖ୍ୟ ରଣନୀତି ଉପରେ ପ୍ୟାନେଲ ଗଠନ କରିବାକୁ ପ୍ରଶାନ୍ତ କିଶୋର ଦଳର ନେତୃତ୍ୱଙ୍କୁ ପରାମର୍ଶ ଦେଇଛନ୍ତି।
୨୦୨୪ ସାଧାରଣ ନିର୍ବାଚନକୁ ଦୃଷ୍ଟିରେ ରଖି ତାଙ୍କୁ ଦଳରେ ସାମିଲ କରାଯିବାର ପ୍ରୟାସ କରାଯାଉଛି। ଏହା ବ୍ୟତୀତ ସେ ରାଜ୍ୟଗୁଡିକରେ ନିର୍ବାଚନର ଦାୟିତ୍ୱ ମଧ୍ୟ ତଦାରଖ କରିବେ। ମଧ୍ୟ ପରିଚାଳନା କରିପାରିବେ। ତେବେ ଆସନ୍ତା ବର୍ଷ ଫେବୃଆରୀ-ମାର୍ଚ୍ଚ ମଧ୍ୟରେ ହେବାକୁ ଯାଉଥିବା ଉତ୍ତରପ୍ରଦେଶ, ପଞ୍ଜାବ, ଉତ୍ତରାଖଣ୍ଡ ଆଦି ୫ ରାଜ୍ୟର ନିର୍ବାଚନ ଠାରୁ ଦୂରେଇ ରହିବେ ବୋଲି ଚର୍ଚ୍ଚା ହେଉଛି।
ପ୍ରଶାନ୍ତଙ୍କୁ ଦଳରେ ସାମିଲ କରାଯିବାକୁ ନେଇ ଜି -୨୩ ଅସନ୍ତୁଷ୍ଟ ଗୋଷ୍ଠୀ ହାଇକମାଣ୍ଡଙ୍କ ସହ ସହମତ ନୁହଁନ୍ତି। ତାଙ୍କ ପ୍ରବେଶକୁ ଭୁଲ ବୋଲି ଗୋଷ୍ଠୀ ବିବେଚନା କରୁଛି। ତଥାପି,ବହୁ କର୍ମକର୍ତ୍ତା ପ୍ରଶାନ୍ତଙ୍କ ଆଗମନ ଦ୍ୱାରା ଦଳକୁ ନୂଆ ଶକ୍ତି ମିଳିବ ଏବଂ ସେ ଏକ ପ୍ରଭାବଶାଳୀ ରଣନୀତି ପ୍ରସ୍ତୁତ କରିବାରେ ସକ୍ଷମ ହେବେ ବୋଲି ସକାରାତ୍ମକ ମତ ପୋଷଣ କରିଛନ୍ତି।
