କାବୁଲ,୩।୮: ଆଫଗାନିସ୍ତାନରେ ସ୍ଥିତି ସଙ୍କଟ ଜନକ ହେବାରେ ଲାଗିଛି। ତାଲିବାନର ବର୍ବରତା ବୃଦ୍ଧି ପାଉଛି। ଅନ୍ତର୍ଜାତୀୟ ମାନବିକ ଆଇନ ଉଲ୍ଲଂଘନ କରି ତାଲିବାନ ସଦସ୍ୟମାନେ ସାଧାରଣ ନାଗରିକଙ୍କୁ ହତ୍ୟା କରୁଛନ୍ତି। କାନ୍ଧାହାରର ସ୍ପିନ ବୋଲଡାକ ଜିଲାର ପୂର୍ବତନ ତଥା ବର୍ତ୍ତମାନର ସରକାରୀ କର୍ମଚାରୀଙ୍କ ତାଲିବାନ୍ ସଦସ୍ୟମାନେ ସମ୍ପତ୍ତି ଲୁଟି ନେଇଛନ୍ତି।
ତାଲିବାନ ଦ୍ୱାରା ସାଧାରଣ ନାଗରିକଙ୍କୁ ହତ୍ୟା କରାଯାଉଥିବା ଖବର ପ୍ରକାଶ ପାଇବା ପରେ ଆଫଗାନିସ୍ତାନର ସ୍ବତନ୍ତ୍ର ମାନବାଧିକାର ଆୟୋଗ ଏହି ଘଟଣାର ଅନୁସନ୍ଧାନ କରି ତଥ୍ୟ ସଂଗ୍ରହ କରିଥିଲା। କେତେକ ପୀଡିତ ପରିବାରଙ୍କର ସାକ୍ଷାତ୍କାର କରାଯାଇଥିଲା।
ଆୟୋଗର ଅନୁସନ୍ଧାନରୁ ଜଣାପଡିଛି ଯେ, ତାଲିବାନ ଅବସର ଗ୍ରହଣ କରିଥିବା ତଥା ବର୍ତ୍ତମାନର ସରକାରୀ କର୍ମଚାରୀଙ୍କ ଘରେ ଲୁଟ୍ପାଟ୍ କରିଛନ୍ତି। ସମ୍ପୃକ୍ତ କର୍ମଚାରୀମାନେ ସ୍ପିନ ବୋଲଡାକ ଜିଲାକୁ ପୁଣି ଥରେ ସୈନ୍ୟ ବାହିନୀ ଦଖଲ କରିଥିବାରୁ ସୁରକ୍ଷା ବାହିନୀକୁ ଅଭିବାଦନ ଜଣାଇଥିଲେ। ଏଥିରେ ଉତ୍କ୍ଷୀପ୍ତ ହୋଇ ତାଲିବାନ ପକ୍ଷରୁ ଏଭଳି ପ୍ରତିଶୋଧ ନିଆଯାଇଥିବା ସ୍ଥାନୀୟ ଗଣମାଧ୍ୟମ ପକ୍ଷରୁ ସୂଚନା ଦିଆଯାଇଛି। ତାଲିମାନ୍ ସଦସ୍ୟମାନେ ପୂର୍ବତନ ତଥା ବର୍ତ୍ତମାନର ସରକାରୀ କର୍ମଚାରୀଙ୍କ ଘର ସମେତ ବହୁ ସ୍ଥାନୀୟ ଲୋକଙ୍କ ସମ୍ପତ୍ତି ଲୁଟି ନେଇଛନ୍ତି।
ତାଲିବାନ ୧୪ ଜୁଲାଇରେ ସ୍ପିନ ବୋଲଡାକ ନିଜ ଦଖଲକୁ ନେଇଥିଲା। ଜିଲାକୁ ସରକାରୀ ଦଖଲକୁ ଫେରାଇ ଆଣିବା ପାଇଁ ସାମରିକ ଅପରେସନ ଆରମ୍ଭ କରଯାଇଥିଲା। ଏହାକୁ କିଛି ସ୍ଥାନୀୟ ବାସିନ୍ଦା ସ୍ବାଗତ କରିଥିଲେ।
ଏଭଳି ଲୋକଙ୍କୁ ଖୋଜିବା ପରେ ତାଲିବାନ ସେମାନଙ୍କୁ ଘରୁ ବାହାର କରି ହତ୍ୟା କରିଥିଲା। ବର୍ତ୍ତମାନ ସୁଦ୍ଧା କେତେକ ବାସିନ୍ଦାମାନଙ୍କ ମୃତଦେହକୁ ଚିହ୍ନଟ କରାଯାଇଛି। ୧୬ ଜୁଲାଇରୁ ଇତିମଧ୍ୟରେ ତାଲିବାନ ଦ୍ୱାରା ଜିଲାର ୪୦ ଜଣଙ୍କୁ ହତ୍ୟା କରାଯାଇଥିବା ଆୟୋଗ ଚିହ୍ନଟ କରିଛି। ତାଲିବାନ ପକ୍ଷରୁ କୁହାଯାଇଥିଲା ଯେ, ସଂଗଠନର ସଦସ୍ୟମାନେ ସାଧାରଣ ନାଗରିକ କିମ୍ବା ସାଧାରଣ କାର୍ଯ୍ୟ ବ୍ୟବସ୍ଥାର କୌଣସି କ୍ଷତି କରିବେ ନାହିଁ। କିନ୍ତୁ ସାମ୍ପ୍ରତିକ ଘଟଣାରୁ ଜଣାପଡୁଛି ଯେ, ତାଲିବାନର ପ୍ରତିଶ୍ରୁତି ଏବଂ କାର୍ଯ୍ୟରେ ତାଳମେଳ ରହୁନାହିଁ। ଅର୍ଜାତୀୟ ମାନବିକ ଅଧିକାର ଏବଂ ଏହାର ନୀତି ପାଳନ ପ୍ରତି ତାଲିବାନର କୌଣସି ବ୍ୟବହାରିକ ପ୍ରତିବଦ୍ଧତା ନାହିଁ ବୋଲି ସ୍ଥାନୀୟ ଗଣମାଧ୍ୟମ ପକ୍ଷରୁ କୁହାଯାଇଛି।
