ଲକ୍ଷ୍ନୌ, ୨୨ା୩ (ପି.ଟି.)- ଭାରତ ବିପକ୍ଷ ଦ୍ୱିତୀୟ ମହିଳା ଟି୨୦ କ୍ରିକେଟ ମ୍ୟାଚ୍ରେ ଦକ୍ଷିଣ ଆଫ୍ରିକା ୬ଉଇକେଟରେ ବିଜୟ ଲାଭ କରିଛି। ଏଥିସହିତ ଦଳ ୨-୦ରେ ଅଗ୍ରଣୀ ସହ ୩ ମ୍ୟାଚ ବିଶିଷ୍ଟ ସିରିଜକୁ ଆଗୁଆ କବ୍ଜା କରିନେଇଛି। ଅନ୍ତିମ ବଲ୍ରେ ଶେଷ ହୋଇଥିବା ଏହି ମ୍ୟାଚରେ ଭାରତର ୧୫୮/୪ ସ୍କୋରକୁ ଭ୍ରମଣକାରୀ ଦଳ ୨୦ ଓଭରରେ ୪ ଉଇକେଟ ବିନିମୟରେ ଅତିକ୍ରମ କରିଯାଇଥିଲା। ଟପ୍ ସ୍କୋରର ଓପନର ଲିଜେଲ ଲି ୭୦ ଓ ଲାଉରା ଓଲ୍ଭାଡଟ୍-୫୩ ରନ କରି ଅପରାଜିତ ରହିଥିଲେ।
ହାରି ପ୍ରଥମେ ବ୍ୟାଟିଂ କରିଥିବା ଭାରତୀୟ ଦଳର ଓପନର ଶେଫାଳି ବର୍ମା ୪୭ ରନ (୩୧ ବଲ୍, ୬ ଚୌକା ଓ ୨ ଛକା) କରିଥିଲେ। ସେ ଓ ହାର୍ଲିନ ଦେଓଲ (୩୧) ତୃତୀୟ ଉଇକେଟରେ ୭୯ରନ ଯୋଗ କରିଥିଲେ। ରିଚା ଘୋଷ ଦଳର ଫିନିଶିଂ ଟଚ୍ ଦେଇଥିଲେ। ସେ ୨୬ ବଲରୁ ୪୪ ରନ କରି ଅପରାଜିତ ରହିଥିଲେ, ଯାହାଫଳରେ ଭାରତ ୧୫୦ ଅଙ୍କ ଅତିକ୍ରମ କରିପାରିଥିଲା।
ସଂକ୍ଷିପ୍ତ ସ୍କୋର
ଭାରତୀୟ ମହିଳା ଦଳ: ୨୦ ଓଭରରେ ୧୫୮/୪ (ଶେଫାଳି ବର୍ମା-୪୭, ରିଚା ଘୋଷ-୪୪*, ହାର୍ଲିନ ଦେଓଲ-୩୧; ନନ୍କୁଲୁଲେକୋ ମାଲାବା-୧/୨୭)।
ଦକ୍ଷିଣ ଆଫ୍ରିକା ମହିଳା ଦଳ: ୨୦ ଓଭରରେ ୧୫୯/୪ (ଲିଜେଲ ଲି’-୭୦, ଲାଉରା ଓଲ୍ଭାଡଟ୍-୫୩*; ରାଜେଶ୍ୱରୀ ଗାଏକ୍ୱାଡ-୧/୨୦)।
