ପାଟଣା,୧୦।୩: ବିହାରର ହାଜିପୁର ଥାନାରେ ଆଜି ଦିନତମାମ ଏକ ହାଇଭୋଲଟେଜ୍ ଡ୍ରାମା ଦେଖିବାକୁ ମିଳିଛି। ଯୁବତୀ ଫେସବୁକ୍ରେ ଜଣେ ଯୁବକଙ୍କ ପ୍ରେମରେ ପଡ଼ିଥିଲେ। ମାତ୍ର ବିବାହ କରିବାକୁ ଯୁବକ ଜଣକ ମନା କରିବାରୁ ଯୁବତୀ ଥାନାରେ ପହଞ୍ଚିଥିଲେ। ଏହା ଦେଖିବା ପାଇଁ ଥାନା ବାହାରେ ପ୍ରବଳ ଜନଗହଳି ହୋଇଥିଲା।
ବୁଧବାର ସକାଳେ ଯୁବତୀ ଜଣକ ହାଜିପୁର ମହିଳା ଥାନାରେ ପହଞ୍ଚିଥିଲେ। ସେ ଜଣେ କନଷ୍ଟେବଳଙ୍କୁ ପ୍ରେମ କରୁଥିବା ଏବଂ ବିବାହ ପାଇଁ ସେ ମନା କରୁଥିବା ଅଭିଯୋଗ କରିଥିଲେ। ଥାନାର ଏସ୍ଏଚ୍ଓ ତୁରନ୍ତ ଅଭିଯୁକ୍ତ କନଷ୍ଟେବଳଙ୍କୁ ଥାନାକୁ ଡାକିଥିଲେ।
ପାଟଣାରେ ରହୁଥିବା ଏହି ଯୁବତୀ ଜଣକ ଅଭିଯୋଗ କରିଥିଲେ ଯେ, ହାଜିପୁର ପୋଲିସ ଲାଇନ୍ରେ ରହୁଥିବା କନଷ୍ଟେବଳଙ୍କ ସହ ତାଙ୍କର ଫେସ୍ବୁକ୍ରେ ପରିଚୟ ହୋଇଥିଲା। ପରେ ଏହି ସମ୍ପର୍କ ପ୍ରେମରେ ରୂପାନ୍ତରିତ ହୋଇଥିଲା। ଏପରିକି ଦୁଇଜଣ ଲିଭ୍ ଇନ୍ ରିଲେସନଶିପ୍ରେ ମଧ୍ୟ ରହୁଥିଲେ। ଯୁବତୀ ଜଣକ କନଷ୍ଟେବଳଙ୍କୁ ବିବାହ କରିବାକୁ କହିବାରୁ ଏଥିରେ ରାଜି ହୋଇ ନ ଥିଲେ କନଷ୍ଟେବଳ। ପରେ ମାମଲା ଥାନାରେ ପହଞ୍ଚିଥିଲା। ପୋଲିସ ଅଭିଯୁକ୍ତ ନାମରେ ମାମଲା ରୁଜୁ କରିବାକୁ କହିବାରୁ ଯୁବତୀ କହିଥିଲେ ବଳାତ୍କାର ହୋଇନାହିଁ। ମାତ୍ର ମୁଁ ତାଙ୍କୁ ବିବାହ କରିବାକୁ ଚାହୁଁଛି। ଏହା ପରେ ପୋଲିସ ଉଭୟ ପରିବାର ଲୋକଙ୍କୁ ଡାକି ସର୍ତ୍ତନାମା ଅନୁଯାୟୀ ବୁଝାଶୁଝା କରି ଘରକୁ ପଠାଇ ଦେଇଛି।
