ଲକ୍ଷ୍ନୌ,୫।୧୨: ଉତ୍ତରପ୍ରଦେଶରେ ଛୁଟି ପାଇଁ ପ୍ରାଥମିକ ଶିକ୍ଷୟତ୍ରୀ ଏବଂ ଶିକ୍ଷକଙ୍କୁ ଲାଞ୍ଚ ଦେବାକୁ ପଡୁଥିବା ଦୁର୍ନୀତିର ପର୍ଦ୍ଦାଫାଶ୍ ହୋଇଛି। ରାଜ୍ୟ ଶିକ୍ଷା ବିଭାଗ ପକ୍ଷରୁ ଏହାର ତଦନ୍ତ କରାଯାଇଥିଲା। ପରେ ସତକଥା ପଦାକୁ ଆସିଥିଲା। ଶିକ୍ଷା ବିଭାଗ ପକ୍ଷରୁ ଆଇଭିଆର୍ଏସ୍ (ଇଣ୍ଟ୍ରାକ୍ଟିଭ୍ ଭଏସ୍ ରେସପନ୍ସ୍ ସିଷ୍ଟମ୍) କଲ୍ କରାଯାଇ ରାଜ୍ୟର ୧୨ ହଜାର ୭୩୩ ଜଣ ପ୍ରାଥମିକ ଶିକ୍ଷୟତ୍ରୀ-ଶିକ୍ଷକଙ୍କ ସହିତ କଥାବାର୍ତ୍ତା କରାଯାଇଥିଲା। ସେମାନେ ଛୁଟି ପାଇଁ ଲାଞ୍ଚ ଦେଉଥିବା ପ୍ରକାଶ କରିଥିଲେ। ଶିକ୍ଷା ଅଧିକାରୀମାନେ ଲାଞ୍ଚ ବିନା ଛୁଟି ମଞ୍ଜୁର କରୁ ନ ଥିବା ୧୫୪୮ ଶିକ୍ଷୟତ୍ରୀ-ଶିକ୍ଷକ ପ୍ରକାଶ କରିଛନ୍ତି। ମେଡିକାଲ୍ ଲିଭ୍ ଅଥବା ପିଲାଙ୍କ ଯତ୍ନ ନେବା ଲାଗି କରାଯାଉଥିବା ଛୁଟି ଆବେଦନରେ ଲାଞ୍ଚ ଦେବାକୁ ପଡୁଥିବା ସେମାନେ ସ୍ବୀକାର କରିଛନ୍ତି। ବିବାହ ପାଇଁ ଦୁଇଗୁଣା ଲାଞ୍ଚ ଦେବାକୁ ପଡୁଥିବା ସେମାନେ କହିଛନ୍ତି। ସାଧାରଣ ଛୁଟି ପାଇଁ ଦିନ ପିଛା ୫୦୦ରୁ ୧୦୦୦ଟଙ୍କା ଦେବାକୁ ପଡୁଥିବାବେଳେ ବିବାହ କ୍ଷେତ୍ରରେ ଏହା ୨ ହଜାର ଟଙ୍କା ଶିକ୍ଷା ଅଧିକାରୀଙ୍କୁ ଦେବାକୁ ପଡ଼ିଥାଏ ବୋଲି ଶିକ୍ଷୟତ୍ରୀ-ଶିକ୍ଷକମାନେ ଅଭିଯୋଗ କରିଛନ୍ତି। ଘଟଣା ସମ୍ପର୍କରେ ଜଣାପଡ଼ିବା ପରେ ଏବେ ଶିକ୍ଷା ବିଭାଗ ପକ୍ଷରୁ ଖୋଳତାଡ଼ ଆରମ୍ଭ ହୋଇଛି।
