ନୂଆଦିଲ୍ଲୀ: ଲକ୍ଷ୍ମୀବିଳାସ ବ୍ୟାଙ୍କର ଆର୍ଥତ୍କ ସ୍ଥିତି ବିଗିଡ଼ିବା ଯୋଗୁ ଏହା ଉପରେ ରିଜର୍ଭ ବ୍ୟାଙ୍କ ମୋରାଟୋରିୟମ କଟକଣା ଲାଗୁ କରିଛି। ଆଗାମୀ ଗୋଟିଏ ମାସ ଯାଏ ଏହି ବ୍ୟାଙ୍କର ଜମାକାରୀ କେବଳ ୨୫ ହଜାର ଟଙ୍କା ଉଠାଣ କରିପାରିବେ। କେତେକ ନିର୍ଦ୍ଦିଷ୍ଟ କ୍ଷେତ୍ରରେ ରିଜର୍ଭ ବ୍ୟାଙ୍କ ଅନୁମତି ନେଇ ଏହି ସୀମାଠାରୁ ଅଧିକ ଉଠାଣ କରିହେବ। ବ୍ୟାଙ୍କର ସ୍ଥିତିକୁ ନେଇ ବର୍ତ୍ତମାନ ଲୋକମାନେ ଆଶଙ୍କାରେ ରହିଛନ୍ତି। ଜମା ଅର୍ଥ କ’ଣ ହେବ ବୋଲି ଲୋକଙ୍କ ମନରେ ପ୍ରଶ୍ନ ରହିଛି। ଏଭଳି ସ୍ଥିତିରେ ରିଜର୍ଭ ବ୍ୟାଙ୍କ ପକ୍ଷରୁ ବ୍ୟାଙ୍କ ପରିଚାଳନା ଲାଗି ନିଯୁକ୍ତ ଆଡମିନିଷ୍ଟ୍ରେଟର ଟି.ଏନ୍. ମୋହନ ଜମାକାରୀଙ୍କୁ ଆଶ୍ୱାସନା ଦେଇଛନ୍ତି। ସେ କହିଛନ୍ତି, ଲକ୍ଷ୍ମୀବିଳାସ ବ୍ୟାଙ୍କରେ ଜମାକାରୀଙ୍କ ଅର୍ଥ ସମ୍ପୂର୍ଣ୍ଣ ସୁରକ୍ଷିତ ରହିଛି। ବ୍ୟାଙ୍କ ନିକଟରେ ନଗଦ ଅର୍ଥ ରହିଛି। ବ୍ୟାଙ୍କ ଲୋକଙ୍କ ଟଙ୍କା ଫେରାଇବାକୁ ସମର୍ଥ।
ଏହି ବ୍ୟାଙ୍କକୁ ସିଙ୍ଗାପୁର ଭିତ୍ତିକ ଡିବିଏସ୍ ଇଣ୍ଡିଆ ବ୍ୟାଙ୍କ ସହ ମିଶ୍ରଣ ନେଇ ରିଜର୍ଭ ବ୍ୟାଙ୍କ ସରକାରଙ୍କୁ ସୁପାରିସ କରିଛି। ଏହି ପ୍ରକ୍ରିୟା ଧାର୍ଯ୍ୟ ସମୟସୀମା ମଧ୍ୟରେ ଶେଷ ହେବ ବୋଲି ମୋହନ ସ୍ପଷ୍ଟ କରିଛନ୍ତି। ବ୍ୟାଙ୍କରେ ୨୦ ହଜାର କୋଟି ଟଙ୍କା ଜମା ରହିଥିବା ବେଳେ ଅଗ୍ରିମ ଭାବେ ଏହା ପ୍ରାୟ ୧୭ ହଜାର କୋଟି ଟଙ୍କା ପ୍ରଦାନ କରିଛି। ଲକ୍ଷ୍ମୀବିଳାସ ବ୍ୟାଙ୍କର ପୁନରୁଦ୍ଧାର ଲାଗି ଡିବିଏସ୍ ବ୍ୟାଙ୍କକୁ ଚୟନ କରାଯାଇଛି। ଏହି କାମ ଲାଗି କୌଣସି ରାଷ୍ଟ୍ରାୟତ୍ତ ବ୍ୟାଙ୍କକୁ ବଛାଯାଇନାହିଁ। ଲକ୍ଷ୍ମୀବିଳାସ ବ୍ୟାଙ୍କର କାର୍ଯ୍ୟାଳୟ ଚେନ୍ନାଇରେ ରହିଛି। ତାମିଲନାଡୁର କୁରୁରରେ ଏହା ପ୍ରଥମେ କାର୍ଯ୍ୟ ଆରମ୍ଭ କରିଥିଲା। ବ୍ୟାଙ୍କର ଏନ୍ପିଏ ବଢିବା ଯୋଗୁ ଏହା ଉପରେ ଚାପ ସୃଷ୍ଟି ହୋଇଛି। କ୍ଷୁଦ୍ର ବାଣିଜ୍ୟକୁ ଋଣ ପ୍ରଦାନ କରିବା ଉପରେ ଏହା ପ୍ରଥମେ ଧ୍ୟାନ କେନ୍ଦ୍ରିତ କରିଥିଲା। ମାତ୍ର ଏହା ବଡ ସଂସ୍ଥାଗୁଡିକ ଋଣ ପ୍ରଦାନ କରିବାରୁ ସଙ୍କଟର ସମ୍ମୁଖୀନ ହୋଇଛି।
୨୦୧୬-୧୭ରେ ର଼୍ୟାନ୍ବାକ୍ସିର ପୂର୍ବତନ ପ୍ରମୋଟର ମାଲବିନ୍ଦର ସିଂ ଏବଂ ସିବିନ୍ଦର ସିଂଙ୍କୁ ୭୨୦ କୋଟି ଟଙ୍କାର ଋଣ ପ୍ରଦାନ କରିବା ପରେ ବ୍ୟାଙ୍କର ଅସୁବିଧା ଆରମ୍ଭ ହୋଇଯାଇଥିଲା। ମାର୍ଚ୍ଚରେ ସରକାର ୟେସ୍ ବ୍ୟାଙ୍କକୁ ମୋରାଟୋରିୟମ ପରିସରରେ ରଖିଥିଲେ। ଦ୍ୱିତୀୟ ବ୍ୟାଙ୍କ ଭାବେ ବର୍ତ୍ତମାନ ଆର୍ବିଆଇ ଲକ୍ଷ୍ମୀବିଳାସ ବ୍ୟାଙ୍କ କ୍ଷେତ୍ରରେ ହସ୍ତକ୍ଷେପ କରିଥିବା ଜଣାପଡିଛି। ୨୦୧୯ ସେପ୍ଟେମ୍ବରରେ ଏହି ବ୍ୟାଙ୍କର ସ୍ଥିତି ବେଶି ବିଗିଡିଥିଲା। ସ୍ଥିତିକୁ ସମ୍ଭାଳିବା ଲାଗି ରିଜର୍ଭ ବ୍ୟାଙ୍କ ଏହି ବ୍ୟାଙ୍କ ବିରୋଧରେ ପ୍ରମ୍ପଟ କରେକ୍ଟିଭ ଆକ୍ସନ ଫ୍ରେମ୍ଓ୍ବାର୍କ ଲାଗୁ କରିଥିଲା।
