ଲେହ (ଲଦାଖ),୧୫ା୯ (ପି.ଟି.)-ନବଗଠିତ କେନ୍ଦ୍ର ଶାସିତ ଅଞ୍ଚଳ ଲଦାଖରେ ବିଭିନ୍ନ କ୍ରୀଡ଼ା ସୁବିଧା ଲାଗି ସୋମବାର ଶିଳାନ୍ୟାସ କରିଛନ୍ତି କେନ୍ଦ୍ର କ୍ରୀଡ଼ାମନ୍ତ୍ରୀ କିରେନ ରିଜିଜୁ। ତନ୍ମଧ୍ୟରେ ଏକ ସିନ୍ଥେଟିକ୍ ଟ୍ରାକ୍, ଫୁଟ୍ବଲ ପାଇଁ ଆଷ୍ଟ୍ରୋଟର୍ଫ ରହିଛି। ଏହି ଅବସରରେ ରାଜ୍ୟପାଳ ତଥା ଲ୍ୟୁଟ୍ନାଣ୍ଟ ଗଭର୍ନର ଆର.କେ. ମାଥୁର ଉପସ୍ଥିତ ଥିଲେ। ଲେହସ୍ଥିତି ଲେହତ୍ ଓପନ ଷ୍ଟାଡିୟମରେ ସିନ୍ଥେଟିକ୍ ଟ୍ରାକ୍ ଓ ଫୁଟ୍ବଲ ପାଇଁ ଆଷ୍ଟ୍ରୋଟର୍ଫ ବିଛାଯିବ। ଏବାବଦରେ ୧୦.୬୮କୋଟି ଟଙ୍କା ଖର୍ଚ୍ଚ ହେବ ବୋଲି ଅଟକଳ କରାଯାଇଛି। ଏହା କାର୍ଯ୍ୟ ୨୦୨୧ ଜାନୁୟାରୀ ସୁଦ୍ଧା ଶେଷ ହେବ ବୋଲି ସ୍ଥିର ହୋଇଥିବା କ୍ରୀଡ଼ାମନ୍ତ୍ରୀ ସୂଚନା ଦେଇଛନ୍ତି। ଏନଡିଏସ୍ ଇନ୍ଡୋର ଷ୍ଟାଡିୟମରେ ୧.୫୨ କୋଟି ଟଙ୍କା ବ୍ୟୟରେ ଏକ ଜିମ୍ନାସିୟମ ହଲ୍ ନିର୍ମାଣ ହେବ। ୨୦୨୧ ମାର୍ଚ୍ଚ ସୁଦ୍ଧା ଏହା କାର୍ଯ୍ୟକାରୀ ହେବ। ଦେଶରେ କ୍ରୀଡ଼ା ସଂସ୍କୃତିର ବିକାଶ କ୍ଷେତ୍ରରେ ସରକାର ପ୍ରତିଶ୍ରୁତିବଦ୍ଧ ବୋଲି ଏହି ଅବସରରେ ଉଦ୍ବୋଧନ ଦେଇ ରିଜିଜୁ କହିଥିଲେ। ସ୍ଥାନୀୟ ପ୍ରତିଭାସମ୍ପନ୍ନ କ୍ରୀଡ଼ାବିତ୍ଙ୍କୁ ଉତ୍ସାହିତ କରିବା ଲାଗି ଲଦାଖ ୟୁଟି ପ୍ରଶାସନ ତରଫରୁ ପୁରସ୍କାର ଏବଂ ଚାକିରି ବ୍ୟବସ୍ଥା କରିବା ଉଚିତ୍ ବୋଲି ସେ କହିଥିଲେ। ଲ୍ୟୁଟନାଣ୍ଟ ଗଭର୍ନର ମାଥୁର କହିଥିଲେ, ଏଠାରେ ଶୀତକାଳୀନ କ୍ରୀଡ଼ାର ଅଭିଜ୍ଞତା ହାସଲ କରିବା ଲାଗି ଦେଶର ଅନ୍ୟାନ୍ୟ ଅଞ୍ଚଳରୁ ଲୋକେ ଏଠାକୁ ଆସିବା ଉଚିତ୍।
