ଭୁବନେଶ୍ୱର,୩୧ା୭(ବ୍ୟୁରୋ): ଆସନ୍ତା ୫ ତାରିଖରୁ କଣ୍ଟେନ୍ମେଣ୍ଟ ଜୋନ୍ ବାହାରେ ଥିବା ଜିମ୍ ଓ ଯୋଗ ଅନୁଷ୍ଠାନଗୁଡ଼ିକୁ ଗାଇଡ୍ଲାଇନ୍ ଅନୁଯାୟୀ ଖୋଲିବାକୁ କେନ୍ଦ୍ର ସରକାର ଅନୁମତି ଦେଇଛନ୍ତି। ବୁଧବାର ଅନ୍ଲକ୍-୩ରେ ଏ ସମ୍ପର୍କରେ ଘୋଷଣା କରାଯାଇଛି। ଏଭଳିସ୍ଥଳେ ଓଡ଼ିଶା ସରକାର ମଧ୍ୟ କଣ୍ଟେନମେଣ୍ଟ ଜୋନ୍ ବାହାରେ ଥିବା ରାଜ୍ୟର ସମସ୍ତ ଫିଟ୍ନେସ୍ ସେଣ୍ଟର ଜନସାଧାରଣଙ୍କ ପାଇଁ ଖୋଲିବାକୁ ଅନୁମତି ଦିଅନ୍ତୁ ବୋଲି ଗୁରୁବାର ଅଲ୍ ଓଡ଼ିଶା ଜିମ୍ ଆସୋସିଏଶନ ଦାବିକରିଛି।
କରୋନା କଟକଣା ଯୋଗୁ ମାର୍ଚ୍ଚ ୨୨ରୁ ରାଜ୍ୟର ଜିମ୍ ଏବଂ ଫିଟ୍ନେସ୍ ସେଣ୍ଟର ବନ୍ଦ ରହିଛି। ଏଥିଯୋଗୁ ଜିମ୍ ମାଲିକ, ଟ୍ରେନର୍ ଓ କର୍ମଚାରୀମାନେ ଘୋର ଆର୍ଥିକ ସମସ୍ୟା ମଧ୍ୟଦେଇ ଗତି କରୁଛନ୍ତି। ସେମାନଙ୍କ ଜୀବିକା ବଞ୍ଚାଇବାକୁ ରାଜ୍ୟ ସରକାର ଜିମ୍ଗୁଡ଼ିକ ଖୋଲିବାକୁ ଅନୁମତି ଦିଅନ୍ତୁ ବୋଲି ଆସୋସିଏଶନ କହିଛି। ଗାଇଡ୍ଲାଇନ୍କୁ କଡ଼ାକଡ଼ି ପାଳନ କରାଯିବ। ମାସ୍କ ଓ ଗ୍ଲୋଭ୍ସ ବାଧ୍ୟତାମୂଳକ କରିବା ସହ ଜିମ୍ ଭିତରେ ସାମାଜିକ ଦୂରତା ରକ୍ଷା ଓ ସାନିଟେଶନକୁ ଗୁରୁତ୍ୱ ଦେବେ। ଭିଡ଼ ଏଡ଼ାଇବାକୁ ସ୍ଲଟ୍ ବୁକିଂ କରାଯିବ। ଜିମ୍ର ଆକାରକୁ ଦେଖି ସଦସ୍ୟ ସଂଖ୍ୟାକୁ ସୀମିତ ରଖାଯିବ। ପ୍ରବେଶପଥରେ ଥର୍ମାଲ ସ୍କ୍ରିନିଂ ବାଧ୍ୟତାମୂଳକ କରିବାକୁ ମଧ୍ୟ ଆସୋସିଏଶନ ପ୍ରତିଶ୍ରୁତି ଦେଇ କହିଛି, କରୋନା ଭାଇରସ୍ ବିରୋଧରେ ଲଢେଇ ପାଇଁ ଲୋକଙ୍କ ମଧ୍ୟରେ ଇମ୍ୟୁନିଟି ବା ରୋଗ ପ୍ରତିରୋଧକ ଶକ୍ତି ବୃଦ୍ଧି ହେବା ନିହାତି ଜରୁରୀ। ପ୍ରତ୍ୟହ ଏକ୍ସରସାଇଜ୍ ଓ ଓ୍ବାର୍କଆଉଟ୍ କରିବା ଦ୍ୱାରା ରୋଗ ପ୍ରତିରୋଧକ ଶକ୍ତି ବୃଦ୍ଧିପାଇବା ସହ କରୋନା ବିରୋଧରେ ଲଢେଇ କରିବାର ଶକ୍ତି ଆସିଥାଏ। ରାଜ୍ୟ ସରକାର ଏହାକୁ ଅନୁଭବ କରି ଜିମ୍ଗୁଡ଼ିକ ଖୋଲିବାକୁ ଅନୁମତି ପ୍ରଦାନ କରିବେ ବୋଲି ଆସୋସିଏଶନ ସଭାପତି ସତ୍ୟଜିତ୍ ଆଶାବ୍ୟକ୍ତ କରିଛନ୍ତି।
