କୋକସରା, ୭।୬ (ଡି.ଏନ.ଏ.) କଳାହାଣ୍ଡି ଜିଲା କୋକସରା ବ୍ଲକ ଲଡୁଗାଁ ପଞ୍ଚାୟତ ଅନ୍ତର୍ଗତ ଭିର୍କାପଡାର ଡମ୍ବରୁଧର ସେଠୀ (୬୩)। ଗତ ୨ମାସ ହେବ ସେ ଖଟରେ ପଡି ରହିଛନ୍ତି। କେଉଁ ରୋଗରେ ସେ ଆକ୍ରାନ୍ତ ତାହା ଜଣାପଡିନାହିଁ। ଚିକିତ୍ସା ଲାଗି ପାଖରେ ଟଙ୍କା ନାହିଁ। ଲକ୍ଡାଉନ ଯୋଗୁ ରୋଜଗାର ନାହିଁ। ଏଥିପାଇଁ ଆର୍ଥିକ ସଙ୍କଟ ଦେଇ ଗତି କରୁଛି ତାଙ୍କ ପରିବାର। ଏପରି ସମୟରେ ତାଙ୍କ ଚିକିତ୍ସା କିପରି ହେବ ସେହି ଚିନ୍ତା ସମସ୍ତଙ୍କୁ ଘାରିଛି।
ଡମ୍ବରୁଧର କୌଳିକ ବୃତ୍ତିକୁ ଆପଣେଇ ପରିବାର ଚଳାଉଥିଲେ। ଗ୍ରାହକଙ୍କ କପଡା ସଫା କରିବା ସହିତ ଆଇରନ କରି ଯାହା ରୋଜଗାର କରୁଥିଲେ ସେଥିରେ ତାଙ୍କ ତେଲଲୁଣର ସଂସାର ଚାଲିଥିଲା। ହେଲେ ଲକ୍ଡାଉନ ଯୋଗୁ ତାଙ୍କ କୌଳିକ ବୃତ୍ତି ଉପରେ ତା’ର ପ୍ରଭାବ ପଡିଲା। କାମଧନ୍ଦା ନ ପାଇ ସେ ଘରେ ବସି ରହିଥିଲେ। କିପରି ପରିବାର ଚଳିବ ସେହି ଚିନ୍ତା ତାଙ୍କୁ ଘାରିଲା। ସେହି ଚିନ୍ତାରେ ସେ ଧୀରେ ଧୀରେ ଅସୁସ୍ଥ ହୋଇପଡିଥିଲେ। ଏ ସଂକ୍ରାନ୍ତରେ ଏକାଧିକ ଡାକ୍ତରଙ୍କ ସହ ତାଙ୍କ ପରିବାର ଲୋକେ ପରାମର୍ଶ କରିଥିଲେ। ଡାକ୍ତରଙ୍କ ଲିଖିତ ଔଷଧ ଖାଇଲେ ମଧ୍ୟ ତାଙ୍କ ସ୍ବାସ୍ଥ୍ୟାବସ୍ଥାରେ କୌଣସି ପରିବର୍ତ୍ତନ ଆସିନାହିଁ। ସ୍ତ୍ରୀ ତାରା ସ୍ବାମୀଙ୍କ ସେବାରେ ଲାଗିଛନ୍ତି। ୨ଝିଅଙ୍କ ବିବାହ ହୋଇସାରିଥିବାରୁ ଆହା ପଦେ କହିବାକୁ ତାଙ୍କ ପାଖରେ କେହିନାହାନ୍ତି । ସରକାରୀ ସହାୟତା କହିଲେ କେବଳ ଖାଦ୍ୟ ସୁରକ୍ଷା ଯୋଜନାର ମିଳୁଥିବା ୧୦ କେଜି ଚାଉଳ ବ୍ୟତୀତ ଏହି ପରିବାରକୁ ଅନ୍ୟ କୌଣସି ସାହାଯ୍ୟ ମିଳିପାରି ନାହିଁ । ଭଙ୍ଗା ଦଦରା ଘରେ ସେ ପଡି ରହିଛନ୍ତି। ଜମିବାଡି କିଛି ନାହିଁ। ଗ୍ରାମୀଣ ଗୃହ ନିର୍ମାଣ ଯୋଜନାରେ ଅନ୍ତର୍ଭୁକ୍ତ ପାଇଁ ୨୦୧୭ରୁ ସେ ଦରଖାସ୍ତ କରିଥିଲେ ହେଁ ପକ୍କାଘର ଖଣ୍ଡେ ମିଳିପାରି ନାହିଁ । ଏମିତି କି ଭତ୍ତା ପାଇବା ପାଇଁ ସେ ଯୋଗ୍ୟ ହୋଇଥିଲେ ହେଁ ଏଯାଏ ତାଙ୍କୁ ସେହି ସୁବିଧା ମିଳିନାହିଁ । ପରିବାର ଚଳାଇବା ତାଙ୍କ ପକ୍ଷେ କଷ୍ଟସାଧ୍ୟ ହୋଇଛି। ସ୍ବାମୀଙ୍କ ଚିକିତ୍ସା କରାଇବା ତାଙ୍କ ପକ୍ଷେ ସମ୍ଭବ ହେଉ ନ ଥିବା ତାରା କହିଛନ୍ତି। ଏଭଳି ସ୍ଥିତିରେ ସରକାରୀ ସହାୟତା ଯୋଗାଇଦେବା ପାଇଁ ସେ ନିବେଦନ କରିଛନ୍ତି । ଏନେଇ ବିଡିଓ ମନୀଷା ଦାସଙ୍କୁ ପଚାରିବାରୁ ମେଡିକାଲ ଅଫିସରଙ୍କୁ ପଠାଇ ସେ କେଉଁ ରୋଗରେ ଆକ୍ରାନ୍ତ ତାହା ଜଣାପଡିବା ପରେ ଚିକିତ୍ସା ବ୍ୟବସ୍ଥା କରାଯିବ। ଏଥି ସହ ଭତ୍ତା ଓ ଘରର ମଧ୍ୟ ବ୍ୟବସ୍ଥା କରାଯିବ ବୋଲି ସେ କହିଛନ୍ତି।
