ଯାଜପୁର ଅଫିସ,୫ା୪-ଯାଜପୁର ଜିଲା ରସୁଲପୁର ବ୍ଲକ ଅନ୍ତର୍ଗତ ବ୍ରହ୍ମବରଦାରେ ଜଣେ କରୋନା ଆକ୍ରାନ୍ତ ଚିହ୍ନଟ ହେବା ପରେ ଜିଲା ପ୍ରଶାସନ ପକ୍ଷରୁ ଘୋଷିତ ପ୍ରଥମ ଦିନର ଶଟ୍ଡାଉନ୍ ସୁରୁଖୁରୁରେ ସମ୍ପନ୍ନ ହୋଇଛି। ଶନିବାର ରାତି ୮ଟାରୁ ଜିଲାର ପ୍ରମୁଖ ବଜାର ବ୍ୟାସନଗର ଓ ଯାଜପୁର ସହର ସମେତ କୋରେଇ ବ୍ଲକର ପାଣିକୋଇଲି ଓ ସାଦକପୁର, ବଡ଼ଚଣା ବ୍ଲକର ଚାରିନଙ୍ଗ, ଧର୍ମଶାଳା ବ୍ଲକର ନେଉଳପୁର ଏବଂ ଯାଜପୁର, ବିଞ୍ଝାରପୁର, ଦଶରଥପୁର, ବରୀ, ବଡ଼ଚଣା, ଧର୍ମଶାଳା, ରସୁଲପୁର, କୋରେଇ, ସୁକିନ୍ଦା ଓ ଦାନଗଦି ବ୍ଲକ ମୁଖ୍ୟାଳୟକୁ ଶଟ୍ଡାଉନ ଘୋଷଣା କରାଯାଇଛି। କରୋନା ସଂକ୍ରମିତ ଗ୍ରାମ ବ୍ରହ୍ମବରଦାକୁ ସମ୍ପୂର୍ଣ୍ଣ ଭାବେ ସିଲ୍ କରି ଦିଆଯାଇଛି। ଏହାର ୩ କିମି ପରିଧି ଅଞ୍ଚଳକୁ ଶଟ୍ଡାଉନ୍ ଘୋଷଣା କରିଥିବାରୁ ଲୋକେମାନେ ଘରୁ ବାହାରି ନାହାନ୍ତି। କରୋନା ସଂକ୍ରମିତଙ୍କୁ କଟକର ଅଶ୍ୱିନୀ ହସ୍ପିଟାଲରେ ଭର୍ତ୍ତି କରାଯାଇ ଚିକିତ୍ସା କରାଯାଉଛି। ତାଙ୍କ ପରିବାରବର୍ଗଙ୍କୁ ସରକାରୀ କ୍ବାରାଣ୍ଟାଇନ୍ରେ ରଖାଯାଇଛି। ରବିବାର ସନ୍ଧ୍ୟା ସୁଦ୍ଧା କେବଳ ଔଷଧ ଦୋକାନକୁ ଛାଡ଼ିଦେଲେ ସବୁ ଦୋକାନବଜାର ବନ୍ଦ ରହିଛି। ସବୁଆଡ଼େ ଶୂନଶାନ, ଖଁା ଖଁା ପରିବେଶ ଦେଖିବାକୁ ମିଳିଛି। ଅନ୍ୟପକ୍ଷେ ଡିଜିପି ଅଭୟ ଯାଜପୁର ଜିଲା ଗସ୍ତ କରି ଡିଆଇଜି(ସିଆର) ଆଶିଷ ସିଂ ଓ ଏସ୍ପି ଚରଣସିଂ ମୀନାଙ୍କ ସହିତ ଶଟ୍ଡାଉନ୍ ଉପରେ ସମୀକ୍ଷା କରିଛନ୍ତି।
ମିଳିଥିବା ସୂଚନା ମୁତାବକ ଗତ ୨୪ ଘଣ୍ଟା ମଧ୍ୟରେ ଲକ୍ଡାଉନ୍ ଓ ଶଟ୍ଡାଉନ୍କୁ ଉଲ୍ଲଂଘନ କରିଥିବା ଅଭିଯୋଗରେ ଜିଲାର ୧୪ ଜଣଙ୍କ ନାମରେ ୧୨ ମାମଲା ରୁଜୁ ହୋଇଛି। ୫୭ ଗାଡ଼ି ଜବତ କରାଯାଇ ୧,୧୦,୦୦୦ ଟଙ୍କା ଜରିମାନା ଆଦାୟ କରାଯାଇଛି। ଶନିବାର ରାତିରେ ଯାଜପୁର ପ୍ରଶାସନ ପକ୍ଷରୁ ଫ୍ଲାଗମାର୍ଚ୍ଚ କରାଯାଇ ଲୋକଙ୍କୁ ଘରେ ରହିବାକୁ ପରାମର୍ଶ ଦିଆଯାଇଥିଲା। ଯାଜପୁର ଜିଲାପାଳ ରଞ୍ଜନ କୁମାର ଦାସଙ୍କ ନେତୃତ୍ୱରେ ଏକ ପ୍ରଶାସନିକ ଟିମ୍ ଯାଜପୁର ସହରରେ ବୁଲି ବୁଲି ଶଟ୍ଡାଉନ୍ ନିୟମକୁ ମାନିବାକୁ ପରାମର୍ଶ ଦେଇଥିଲେ। ଘରୁ ବାହାରିଲେ ୧୪ ଦିନିଆ କ୍ବାରାଣ୍ଟାଇନ୍ରେ ରହିବାକୁ ବାଧ୍ୟ କରାଯିବ ବୋଲି ଚେତାବନୀ ଦିଆଯାଇଥିଲା। ସୋମବାର ରାତି ୮ ଯାଏ ଶଟ୍ଡାଉନ ବଳବତ୍ତର ରହିବ। ଏହି ସମୟରେ କେବଳ ନିର୍ଦ୍ଦିଷ୍ଟ କେତୋଟି ମେଡିସନ ଦୋକାନ, ପେଟ୍ରୋଲ ପମ୍ପ, ଡାକ୍ତରଖାନା, ପାଣିଯୋଗାଣ, ପୋଲିସ, ଅଗ୍ନିଶମ, ଯୋଗାଣ ବିଭାଗ, ବିଦ୍ୟୁତ ସରବରାହ ଓ ବିତରଣ କେନ୍ଦ୍ର ଆଦି ଖୋଲା ରହିବ।
