ଭୁବନେଶ୍ୱର,୭ା୩(ବ୍ୟୁରୋ): ଦିନଥିଲା ପ୍ରକୃତିର ବିଭିନ୍ନ ରଙ୍ଗକୁ ବ୍ୟବହାର କରି ଲୋକେ ହୋଲି ଖେଳୁଥିଲେ। କିନ୍ତୁ କିଛିବର୍ଷ ହେଲା ହୋଲିରେ ରାସାୟନିକ ରଙ୍ଗର ବହୁଳ ବ୍ୟବହାର ହେଉଛି। ସ୍ବାସ୍ଥ୍ୟ ପ୍ରତି ଏହା ହାନିକାରକ ହେଉଥିବାରୁ ଲୋକେ ଏଥିପ୍ରତି ଧୀରେ ଧୀରେ ସଚେତନ ହେଲେଣି। ବିଶେଷ କରି ଚାଇନା ବିଭିନ୍ନ ପ୍ରକାର ରଙ୍ଗ ଭାରତୀୟ ବଜାରକୁ ଛାଡ଼ୁଥିବାରୁ ଏବେ ଲୋକେ ଭୟଭୀତ ହୋଇପଡ଼ିଛନ୍ତି। କାରଣ ଚାଇନାରୁ କରୋନା ଭାଇରସ ବିଭିନ୍ନ ଦେଶକୁ ବ୍ୟାପୁଛି। ଏହା ନିୟନ୍ତ୍ରଣାଧୀନ ନ ଥିବାରୁ ପ୍ରତ୍ୟହ ବହୁସଂଖ୍ୟାରେ ଜୀବନ ନେଉଛି। ତେଣୁ ଚଳିତବର୍ଷ ହୋଲି ନ ଖେଳିବାକୁ ଅନେକେ ଭାବୁଥିବାବେଳେ ବହୁ ଲୋକ ହର୍ବାଲ ହୋଲିକୁ ପ୍ରସନ୍ଦ କରୁଛନ୍ତି। ବର୍ତ୍ତମାନ ଗ୍ରୀନ୍ ଦିଓ୍ବାଲି ଭଳି ଗ୍ରୀନ୍ ହୋଲି ଏକ ଭିନ୍ନ ଚିନ୍ତାଧାରା ହୋଇଥିବାବେଳେ ଏବେ ସବୁଠାରୁ ଆଗରେ ରହିଛି ହର୍ବାଲ ହୋଲିର ଆୟୋଜନ। ଗତ କିଛିବର୍ଷ ଭଳି ଚଳିତବର୍ଷ ମଧ୍ୟ ଭୁବନେଶ୍ୱରରେ ହର୍ବାଲ ହୋଲି ଟ୍ରେଣ୍ଡ୍ରେ ଅଛି। ଏଭଳିସ୍ଥଳେ ଗତ ୮ବର୍ଷ ଧରି ଭୁବନେଶ୍ୱରରେ ହର୍ବାଲ ହୋଲି ଉତ୍ସବର ଆୟୋଜନ କରିଆସୁଥିବା ସ୍ବପ୍ନା ପତି ଫାଉଣ୍ଡେଶନ ପକ୍ଷରୁ ଚଳିତବର୍ଷ ଜାତୀୟ ସ୍ତରରେ ହର୍ବାଲ ହୋଲି କାର୍ଯ୍ୟକ୍ରମ ଆୟୋଜନ କରାଯିବାକୁ ଘୋଷଣା ହୋଇଛି।
ଶୁକ୍ରବାର ଆୟୋଜିତ ଖବରଦାତା ସମ୍ମିଳନୀରେ ଏନେଇ ଫାଉଣ୍ଡେଶନ୍ର ମୁଖ୍ୟ ତଥା ଅଭିନେତ୍ରୀ ସ୍ବପ୍ନା ପତି କହିଛନ୍ତି, ଆସନ୍ତା ୮ତାରିଖ ସନ୍ଧ୍ୟାରେ ସ୍ଥାନୀୟ ହୋଟେଲ କଳିଙ୍ଗ ଅଶୋକାରେ ହର୍ବାଲ ହୋଲି ଉତ୍ସବର ଆୟୋଜନ କରାଯିବ। ଏହାସହିତ ପ୍ରଥମଥର ପାଇଁ ଓଡ଼ିଶା ବାହାରେ ତଥା ପୁଣେରେ ଆସନ୍ତା ୧୦ ତାରିଖରେ ହର୍ବାଲ ହୋଲି ଉତ୍ସବ ଆୟୋଜିତ ହେବ। ସମସ୍ତ ପ୍ରକାରର ପ୍ରାକୃତିକ ରଙ୍ଗ ବ୍ୟବହାର କରାଯାଇ ଏହା ପାଳନ ହେବ। ୮ ତାରିଖରେ ଅନ୍ତର୍ଜାତୀୟ ମହିଳା ଦିବସ ପଡୁଥିବାରୁ ସଂଘର୍ଷ ଓ ସଂଗ୍ରାମ କରି ଜୀବନରେ ସଫଳ ହୋଇଥିବା ୩ ଜଣ ମହିଳାଙ୍କୁ ସମ୍ମାନିତ କରାଯିବ। ଏଥିସହିତ ଫୁଟବଲ ଖେଳି ଗୋଲ୍ଡ ମେଡାଲ ଜିତିଥିବା ୪୦ବର୍ଷରୁ ଅଧିକ ବୟସର ମହିଳା ଦଳଙ୍କୁ ସମ୍ବର୍ଦ୍ଧିତ କରାଯିବ। ସେହିପରି ସାଂସ୍କୃତିକ କାର୍ଯ୍ୟକ୍ରମ ଅନ୍ୟତମ ଆକର୍ଷଣ ରହିବ। ଉତ୍ସବରେ ଓଡ଼ିଆ ଚଳଚ୍ଚିତ୍ର ଜଗତର କଳାକାରମାନେ ଯୋଗଦେଇ ହର୍ବାଲ ହୋଲିକୁ ଅଧିକ ରଙ୍ଗିନ ଏବଂ ଆକର୍ଷଣୀୟ କରିବେ। ଭାଇଚାରାର ଏହି ପର୍ବରେ କେବଳ ନିଜେ ନୁହେଁ, ବରଂ ଅନ୍ୟମାନଙ୍କୁ ରସାୟନ ରଙ୍ଗ ପ୍ରତି ସଚେତନ କରିବାକୁ ଯାଇ ହର୍ବାଲ ହୋଲି ପାଳନ କରିବାକୁ ସ୍ବପ୍ନା ପରାମର୍ଶ ଦେଇଥିଲେ।
ବଜାରରେ ମିଳୁଥିବା ରଙ୍ଗରେ ହାନିକାରକ ରାସାୟନିକ ପଦାର୍ଥ ମିଶ୍ରିତ ହୋଇଥାଏ। ଯଦ୍ଦ୍ବାରା ଅନେକ ଜୀବନହାନି ହେବା ସହ ମାରାତ୍ମକ ଦୁର୍ଘଟଣା ଘଟିଥାଏ। ଏହିସବୁ ରଙ୍ଗଠାରୁ ଦୂରେଇ ରହି ଗାଜର, ବିଟ୍, ଟମାଟୋ, ପୁଦିନା, ହଳଦୀ, ଚନ୍ଦନ, ନିମ୍ବପତ୍ର, ମୁଲତାନୀ ମାଟି ଆଦି ପ୍ରାକୃତିକ ଓ ଘରୋଇ ସାମଗ୍ରୀକୁ ବ୍ୟବହାର କରି ହର୍ବାଲ ହୋଲି ପାଳନ କରିବାକୁ ସ୍ବାସ୍ଥ୍ୟ ବିଶେଷଜ୍ଞମାନେ ମତ ଦେଇଛନ୍ତି।
ବଜାରରେ ମିଳୁଥିବା ରାସାୟନିକ ଦ୍ରବ୍ୟ ମିଶା ରଙ୍ଗର ଦାମ୍ ଅପେକ୍ଷାକୃତ କମ୍ ରହୁଛି। ଗ୍ରାହକଙ୍କୁ ଆକୃଷ୍ଟ କରିବା ସହ ବେପାରରେ ଲାଭ କରିବାକୁ ଯାଇ ରଙ୍ଗ ତିଆରି କରୁଥିବା କମ୍ପାନୀମାନେ ରଙ୍ଗରେ ଅଧିକ ରସାୟନ ମିଶାଇ ବିକ୍ରି କରୁଛନ୍ତି। ପ୍ରଚୁର ରାସାୟନିକ ପଦାର୍ଥ ମିଶା ଏହି ରଙ୍ଗର କିଲୋ ପିଛା ମୂଲ୍ୟ ମାତ୍ର ୩୦୦ଟଙ୍କା ରହୁଛି। ତେଣୁ ଗ୍ରାହକମାନେ ସ୍ବାସ୍ଥ୍ୟ କଥା ଚିନ୍ତା ନ କରି ବହୁଳ ମାତ୍ରାରେ ଏଭଳି ଶସ୍ତା ରଙ୍ଗ କିଣି ନେଉଥିବା ଦେଖାଯାଉଛି। ଏନେଇ ଚର୍ମରୋଗ ବିଶେଷଜ୍ଞଙ୍କ କହିବାନୁଯାୟୀ, ରସାୟନ ରଙ୍ଗ ତିଆରି ପାଇଁ କପର ସଲଫେଟ୍, କ୍ରୋମିୟମ ଆୟୋଡାଇଡ, ଆଲୁମିନିୟମ ବ୍ରୋମାଇଡ୍, ଲେଡ୍ ଅକ୍ସାଇଡ, ମରକ୍ୟୁରି ସଲଫେଟ୍ ଭଳି ହାନିକାରକ କେମିକାଲ ବ୍ୟବହାର କରାଯାଇଥାଏ। ଏହାଛଡା କେତେକସ୍ଥଳେ ଇଞ୍ଜିନ ଅଏଲ, ଟକ୍ସିକ୍ ଏବଂ ଆଲକାଲାଇନ ପଦାର୍ଥ ମଧ୍ୟ ବ୍ୟବହୃତ ହୋଇଥାଏ। ଏସବୁ ହାନିକାରକ କେମିକାଲ ଦ୍ବାରା ଚର୍ମରୋଗ, ଆଲର୍ଜି, କିଡ୍ନୀ ରୋଗ, ପକ୍ଷାଘାତ ଏବଂ ଅନ୍ଧତ୍ବ ହେବାର ଆଶଙ୍କା ରହିଥାଏ। ତେଣୁ ଯେତେ ସମ୍ଭବ ଏହାଠାରୁ ଦୂରେଇ ରହି ସାଧାରଣ ଫଗୁରେ ହୋଲି ଖେଳିବା ଉଚିତ।
