ଗଞ୍ଜାମ, ୨୫।୩ (ବିଦ୍ୟାଧର ସାହୁ ): ଗଞ୍ଜାମ ଜିଲା ରମ୍ଭା ଥାନା ହୁମା ଫାଣ୍ଡି ଅନ୍ତର୍ଗତ ନୀଳାଦ୍ରିପୁର ଗ୍ରାମରେ ଜଣେ ମାନସିକ ବିକୃତ ଯୁବତୀ ୬ ମାସ ଗର୍ଭବତୀ ହେବା ଜଣାପଡ଼ିବା ପରେ ତାଙ୍କ ଦାଦା ପୁଅ ଭାଇ ହୁମା ଫାଣ୍ଡିରେ ଅଭିଯୋଗ କରିଥିଲେ। ସେ ଏତଲାରେ ୨ ଜଣଙ୍କ ନାଁ ଉଲ୍ଲେଖ କରିଥିଲେ। ଏତଲାକୁ ଭିତ୍ତିକରି ପୋଲିସ ନଂ. ୧୯୩/୨୬ ଓ ୧୯୪/୨୬ରେ ୨ଟି ମାମଲା ରୁଜୁ କରିଛି। ଏହାର ତଦନ୍ତ ପରେ ଘଟଣାରେ ସମ୍ପୃକ୍ତ ଶିକ୍ଷକ ଶେଷଦେବ ପ୍ରଧାନଙ୍କୁ ଗିରଫ କରାଯାଇ ମଙ୍ଗଳବାର କୋର୍ଟଚାଲାଣ କରାଯାଇଛି ବୋଲି ଫାଣ୍ଡି ଅଧିକାରୀ ସତ୍ୟଜିତ ବେଣିଆ କହିଛନ୍ତି।
ହୁମା ଫାଣ୍ଡି ପୋଲିସ ମଙ୍ଗଳବାର ବ୍ରହ୍ମପୁରରେ ପୀଡିତାଙ୍କ ଡାକ୍ତରୀ ମାଇନା କରିଛି। ରମ୍ଭା ଥାନା ଆଇଆଇସି ମୁଦୁଲି ମଧ୍ୟ ପୀଡିତାଙ୍କ ଗାଁକୁ ଯାଇ ବିଭିନ୍ନ ଦିଗକୁ ନେଇ ତଦନ୍ତ କରିଛନ୍ତି। ଏତଲାରେ ନାମ ଥିବା ବ୍ୟକ୍ତିମାନେ ଫେରାର ଥିବା ଜଣାପଡିଛି। ସେହି ଗ୍ରାମର ଜଣେ ବ୍ୟକ୍ତିଙ୍କ କହିବା ଅନୁସାରେ ଶିକ୍ଷକ ପ୍ରଧାନ ପୀଡିତାଙ୍କ ଗର୍ଭପାତ କରାଇବାକୁ ମେଡିକାଲ ନେଇଥିଲେ। ସେଠାରେ ପୀଡିତାଙ୍କ ସ୍ବାମୀ କିଏ ବୋଲି ମେଡିକାଲ କର୍ତ୍ତୃପକ୍ଷ ପଚାରିବାରୁ ସେ ଚାଲି ଆସିଥିଲେ। ଘଟଣା ପ୍ରଘଟ ହେବା ପରେ ଗ୍ରାମବାସୀଙ୍କ ପକ୍ଷରୁ ଘଟଣା ସମ୍ପର୍କରେ ଏକ ବୈଠକ ଡକାଯାଇଥିଲା। ପ୍ରଧାନ ବୈଠକକୁ ନ ଆସିବାରୁ ଗ୍ରାମବାସୀ ସୋମବାର ସାରେ ହୁମା ଫାଣ୍ଡିରେ ଅଭିଯୁକ୍ତଙ୍କ ଗିରଫ ଦାବି କରି ହୋହଲା କରିଥିଲେ l ପୀଡିତାଙ୍କ କେହି ମା’ବାପା ନ ଥିବାରୁ ତାଙ୍କ ଦାଦାପୁଅ ଭାଇ ରାତିରେ ଏତଲା ଦେଇଥିଲେ। ସୂଚନାଯୋଗ୍ୟ, ମାନସିକ ବିକୃତ ଯୁବତୀ ଜଣଙ୍କୁ ବିଭିନ୍ନ ପ୍ରଲୋଭନ ଦେଖାଇ ଜଣେ ବ୍ୟକ୍ତି ବାରମ୍ବାର ବଳାତ୍କାର କରି ଆସୁଥିଲେ। ଯୁବତୀ ଜଣକ କଥା କହି ପାରୁ ନ ଥିବାରୁ ଏହାର ଫାଇଦା ଉଠାଇ ସ୍ଥାନୀୟ ଅଞ୍ଚଳର ସମ୍ପୃକ୍ତ ଶିକ୍ଷକ ମଧ୍ୟ ଏଥିରେ ସାମିଲ ହୋଇଥିଲେ। ଶିକ୍ଷକ ଜଣକ ଏବେ ଗିରଫ ହୋଇଥିବା ବେଳେ ଅନ୍ୟ ଜଣକ ଫେରାର ଅଛନ୍ତି।
