ନୂଆଦିଲ୍ଲୀ,୨୨।୩: ନୂତନ ଆର୍ଥିକ ବର୍ଷ ଆରମ୍ଭରୁ ସାଧାରଣ ଗ୍ରାହକଙ୍କ ପାଇଁ ବ୍ୟାଙ୍କିଙ୍ଗ ନିୟମରେ ବଡ଼ ପରିବର୍ତ୍ତନ ହେବାକୁ ଯାଉଛି। ଏପ୍ରିଲ ୧ ତାରିଖରୁ ATMରୁ ଟଙ୍କା ଉଠାଣ, ଟ୍ରାଞ୍ଜାକ୍ସନ ଚାର୍ଜ ଏବଂ କ୍ୟାସ ଆକ୍ସେସ ସମ୍ପର୍କିତ କିଛି ନୂଆ ନିୟମ ଲାଗୁ ହେବ। ବିଶେଷ କରି HDFC, PNB ଏବଂ ଜିଓ ପେମେଣ୍ଟସ ବ୍ୟାଙ୍କ ପକ୍ଷରୁ ଏହି ଗୁରୁତ୍ୱପୂର୍ଣ୍ଣ ଘୋଷଣା କରାଯାଇଛି।
ଘରୋଇ କ୍ଷେତ୍ରର ବଡ଼ ବ୍ୟାଙ୍କ HDFC ସ୍ପଷ୍ଟ କରିଛି ଯେ, ଏବେ ATM ରୁ UPI ଜରିଆରେ କରାଯାଉଥିବା କ୍ୟାସ ଉଠାଣକୁ ମାସିକ ମାଗଣା ଟ୍ରାଞ୍ଜାକ୍ସନ ସୀମା (Free Transaction Limit) ମଧ୍ୟରେ ଗଣାଯିବ। ଯଦି ଜଣେ ଗ୍ରାହକ ନିଜର ମାସିକ ଫ୍ରି ଲିମିଟ ଅତିକ୍ରମ କରନ୍ତି, ତେବେ ପ୍ରତି ଟ୍ରାଞ୍ଜାକ୍ସନ ପିଛା ୨୩ ଟଙ୍କା (ସହିତ ଟ୍ୟାକ୍ସ) ଦେବାକୁ ପଡ଼ିବ। ବର୍ତ୍ତମାନ ଗ୍ରାହକଙ୍କୁ ନିଜ ବ୍ୟାଙ୍କ ATM ରେ ୫ଟି ମାଗଣା ଟ୍ରାଞ୍ଜାକ୍ସନ ମିଳୁଥିବା ବେଳେ ଅନ୍ୟ ବ୍ୟାଙ୍କ ATM ରେ ମେଟ୍ରୋ ସହର ପାଇଁ ୩ଟି ଏବଂ ଅଣ-ମେଟ୍ରୋ ସହର ପାଇଁ ୫ଟି ମାଗଣା ସୁବିଧା ରହିଛି।
ପଞ୍ଜାବ ନ୍ୟାସନାଲ ବ୍ୟାଙ୍କ (PNB) ନିଜର କିଛି ର୍ନିଦ୍ଦିଷ୍ଟ ଡେବିଟ କାର୍ଡ ପାଇଁ ଦୈନିକ କ୍ୟାସ ଉଠାଣ ସୀମାରେ ପରିବର୍ତ୍ତନ କରିଛି। କାର୍ଡର ପ୍ରକାର ଅନୁଯାୟୀ ଗ୍ରାହକମାନେ ଏବେ ଦିନକୁ ୫୦,୦୦୦ ରୁ ୭୫,୦୦୦ ଟଙ୍କା ପର୍ଯ୍ୟନ୍ତ ଉଠାଇ ପାରିବେ। ପୂର୍ବରୁ ଯେଉଁ କାର୍ଡଗୁଡ଼ିକରେ ୧ ଲକ୍ଷ ଟଙ୍କା ପର୍ଯ୍ୟନ୍ତ ଉଠାଇବାର ସୁବିଧା ଥିଲା, ରିସ୍କ ମ୍ୟାନେଜମେଣ୍ଟକୁ ଦୃଷ୍ଟିରେ ରଖି ବ୍ୟାଙ୍କ ସେହି ସୀମାକୁ ଏବେ ହ୍ରାସ କରିଛି।
ସେହିଭଳି ଜିଓ ପେମେଣ୍ଟସ ବ୍ୟାଙ୍କ ପକ୍ଷରୁ UPI ଭିତ୍ତିକ କ୍ୟାସ ଉଠାଣ ସେବା ଆରମ୍ଭ କରାଯାଇଛି। ଏହି ସୁବିଧା ଦ୍ୱାରା ଗ୍ରାହକମାନେ ବିନା ଡେବିଟ କାର୍ଡରେ କେବଳ QR କୋଡ ସ୍କାନ କରି ବିଜନେସ କରେସପଣ୍ଡେଣ୍ଟ (BC) ପଏଣ୍ଟରୁ ଟଙ୍କା ଉଠାଇ ପାରିବେ। ଏହା ଡିଜିଟାଲ ବ୍ୟାଙ୍କିଙ୍ଗକୁ ଆହୁରି ସହଜ କରିବ।
ଏଣୁ ଅତିରିକ୍ତ ଶୁଳ୍କରୁ ବଞ୍ଚିବା ପାଇଁ ଗ୍ରାହକମାନେ ନିଜ ନିଜ ବ୍ୟାଙ୍କର ନୂଆ ନିୟମ ଏବଂ ଟ୍ରାଞ୍ଜାକ୍ସନ ସୀମା ବିଷୟରେ ଅପଡେଟ ରହିବା ଜରୁରୀ।
