ମାଲକାନରି, ୬ା୬ (ସ୍ବ.ପ୍ର.)- ସିଲେରୁ ନଦୀରେ ଡଙ୍ଗାବୁଡି ନିଖୋଜ ଥିବା ୨ ମହିଳାଙ୍କ ମୃତଦେହ ଗୁରୁବାର ଉଦ୍ଧାର ହୋଇଛି। ଫଳରେ ଗତ ୪ ଦିନ ଧରି ଏନେଇ ଲାଗି ରହିଥିବା ଅନିଶ୍ଚିତତା ଦୂର ହୋଇଛି। ଖବରରୁ ଜଣାପଡିଛି ମାଲକାନଗିରି ଜିଲା ଚିତ୍ରକୋଣ୍ଡା ତହସିଲ ଅନ୍ତର୍ଗତ କୁର୍ମାନୁର ପଞ୍ଚାୟତ ବଚଲୁର ଗ୍ରାମର ସତୀ ବାବୁ ତାଙ୍କ ସ୍ତ୍ରୀ ପାର୍ବତୀ ଦୁଇ ବର୍ଷର ଝିଅ ଦିବ୍ୟଶ୍ରୀକୁ ଧରି ଆନ୍ଧ୍ର ପ୍ରଦେଶର ସିଲେରୁ ସାପ୍ତାହିକ ହାଟକୁ ରବିବାର ଆସିଥିଲେ। ଉଭୟେ ହାଟ ସାରି ସନ୍ଧ୍ୟାରେ ବଙ୍ଗଳାକ୍ୟାମ୍ପଠାରୁ ଦେଶୀ ଡଙ୍ଗାରେ ସିଲେରୁ ନଦୀ ପାର ହୋଇ ନିଜ ଗ୍ରାମ ବଚଲୁରକୁ ଫେରୁଥିଲେ। ଏହି ସମୟରେ ଝଡ ତୋଫାନ ହେବାରୁ ପାଙ୍ଗାମପାଡୁଠାରେ ଡଙ୍ଗାଟି ବୁଡି ଯାଇଥିଲା। ସତୀବାବୁ ଓ ତାଙ୍କ ସ୍ତ୍ରୀ ପହଁରି ପହଁରି କୌଣସି ପ୍ରକାରେ କୂଳକୁ ଚାଲି ଆସିଥିଲେ। ମାତ୍ର ଡଙ୍ଗାରେ ଥିବା ଝିଅ ଏବଂ ଅନ୍ୟ ୨ ମହିଳା ପାଣିରେ ବୁଡି ଯାଇଥିଲେ। ରବିବାର ସନ୍ଧ୍ୟାରେ ଦୁଇବର୍ଷର ଝିଅ ଦିବ୍ୟଶ୍ରୀଙ୍କ ମୃତଦେହ ମିଳିଥିଲା। ମାତ୍ର ୨ ମହିଳା ନିଖୋଜ ଥିଲେ। ୪ ଦିନ ଧରି ଅଗ୍ନିଶ୍ରମ ବିଭାଗ ଓ ଓଡ୍ରାଫ ଟିମ ମହିଳାଙ୍କୁ ଉଦ୍ଧାର ପାଇଁ ଉଦ୍ୟମ ଚଳାଇଥିଲେ। ଗୁରୁବାର ଭୋରୁ ପାଙ୍ଗାମପାଡୁ ନଦୀଘାଟଠାରୁ ୨ କିଲୋମିଟର ଦୂର ଏକ ଗଛ ଡାଳରେ ମହିଳାଙ୍କ ମୃତଦେହ ଲାଗିଥିବା ଦେଖିବାକୁ ମିଳିଥିଲା। ଉଭୟ ମୃତଦେହ ଉଦ୍ଧାର କରି କୂଳକୁ ଅଣାଯାଇଛି। ମୃତଦେହ ୨ଟି ପଚି ଯାଇଥିବାରୁ ଏହାକୁ ବ୍ୟବଚ୍ଛେଦ ଲାଗି ଚିତ୍ରକୋଣ୍ଡା ଆଣିବା ସମ୍ଭବ ହୋଇ ନ ଥିଲା। ଫଳରେ ତହସିଲଦାର ଟି.ପଦ୍ମନାଭ ଦୋରାଙ୍କ ଉପସ୍ଥିତିରେ ସେଠାରେ ମୃତଦେହ ଚିହ୍ନ୍ନଟ କରାଯାଇ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ଡଙ୍ଗାବୁଡି ମୃତ୍ୟୁବରଣ କରିଥିବା ପରିବାର ଲୋକଙ୍କୁ ୪ ଲକ୍ଷ ଟଙ୍କା ଲେଖାଏ କ୍ଷତିପୂରଣ ମିଳିବ ବୋଲି ତହସିଲଦାର ଦୋରା କହିଛନ୍ତି।
