ଛତ୍ରପୁର,୧୩।୪(ଦିଲୀପ ସାମଲ): ସାରା ଦିନ କଠିନ ପରିଶ୍ରମ କରି ପାଠ ପଢୁଥିବା ଶିଶୁଟିଏ ସଞ୍ଜ ନଇଁଲେ ନିଜକୁ ଖେଳ କୁଦରେ ଲିପ୍ତ କରି ଦେଇଥାଏ। ଆଉ ଯେତେବେଳେ ଖରା ଛୁଟି ଆସେ, ଶିଶୁମାନେ ଅପେକ୍ଷା କରି ବସିଥାଆନ୍ତି ପାର୍କ ବା ଶିଶୁ ଉଦ୍ୟାନ ଯାଇ ସାଙ୍ଗଙ୍କ ସହ କିଛି ସ୍ଵର୍ଣ୍ଣିମ ମୁହୂର୍ତ୍ତ ବିତେଇବା ପାଇଁ । ଆଜି କାଲି ଯୁଗରେ ଯେଉଁଠାରେ ଖଣ୍ଡିଏ ଜାଗାଟିଏ ମିଳିଲେ ସେଠାରେ କୋଠାବାଡି ନିର୍ମାଣ ହୋଇଯାଏ । ଖେଳ ପଡ଼ିଆ ସଂଖ୍ୟା ଖୁବ୍ କମି କମି ଆସିଲାଣି।
ଅନ୍ୟ ସହର ପରି ଗଞ୍ଜାମ ଜିଲା ସଦର ମହକୁମା ଛତ୍ରପୁର ସହର ହୃଦୟରେ ରହିଛି ଏକମାତ୍ର ଶିଶୁ ଉଦ୍ୟାନ । ଯେଉଁଠାରେ ଅନେକ ସଂଖ୍ୟାରେ ଶିଶୁମାନେ ନିଜ ମନୋରଞ୍ଜନ ପାଇଁ ଆସନ୍ତି ଏବଂ ସାଙ୍ଗମାନଙ୍କ ସହ ଖେଳା ଖେଳି କରନ୍ତି। କିନ୍ତୁ ଅତି ଦୁଃଖର ବିଷୟ ଯେ ସୂର୍ଯ୍ୟାସ୍ତ ପରେ ଏହି ଉଦ୍ୟାନରେ ଥିବା ୭ଟି ଆଲୋକ ଖୁଣ୍ଟ ମଧ୍ୟରୁ କେବଳ ୨ଟି ଖୁଣ୍ଟରେ ଲାଗିଥିବା ଲାଇଟ୍ କାର୍ଯ୍ୟ କରୁଛି ଏବଂ ଅନ୍ୟ ସମସ୍ତ ଲାଇଟ୍ ଦୀର୍ଘ ଦିନରୁ ଖରାପ ହୋଇ ପଡ଼ି ରହିଛି। ତାହା ପରେ ଆଉ ସଜଡ଼ା ଯାଉନାହିଁ ବୋଲି ଅଭିଯୋଗ ହୋଇଛି । ଯାହା ଫଳରେ ଉଦ୍ୟାନର ୯୦% ଭାଗ ଅନ୍ଧାର ଭିତରେ ରହୁଛି ଯାହାକି ଅତ୍ୟନ୍ତ ବିପଦ ଜ୍ଜନକ ପରିବେଶ ସୃଷ୍ଟି କରୁଛି ବୋଲି ଅଭିଭାବକମାନେ ପ୍ରକାଶ କରିଛନ୍ତି ।
ଅନାବନା ଘାସ, ଗଛ, ଲଟା, ଶୁଖିଲା ପତ୍ର ଏଣେତେଣେ ପଡ଼ି ରହୁଛି ଯାହାକୁ ନିୟମିତ ସଫା କରାଯାଉନଥିବା ଦେଖା ଯାଇଛି। ଏମିତି ପରିସ୍ଥିତିରେ ପିଲାମାନେ ଅତି ବିପଦ ସଙ୍କୁଳ ପରିବେଶରେ ସମୟ ବ୍ୟତୀତ କରୁଛନ୍ତି ବୋଲି ଚର୍ଚ୍ଚା ଜୋର୍ ଧରିଛି। ସ୍ଥିତି ଏହିପରି ଯେ କୌଣସି ସମୟରେ ସାପ, ବିଛା ଭଳି ବିଷାକ୍ତ ପ୍ରାଣୀ ମଧ୍ୟ ବୁଲୁଥିବା ଭୟ ସୃଷ୍ଟି କରୁଛି । ଅଭିଭାବକମାନେ ଏହାକୁ ନେଇ ଗଭୀର ଚିନ୍ତା ଏବଂ ଅସନ୍ତୋଷ ପ୍ରକାଶ କରିଛନ୍ତି। ଗୋଟେ ପଟେ ସରକାର ବିଭିନ୍ନ କାର୍ଯ୍ୟକ୍ରମରେ ସହରକୁ ଆଲୋକମୟ କରି ଜାକଜମକରେ ସାଜୁଛନ୍ତି କିନ୍ତୁ ଅନ୍ୟପଟେ ଶିଶୁମାନଙ୍କ ମୌଳିକ ସୁବିଧା ଯୋଗାଇଦେବା ପାଇଁ ଅଭିଭାବକମାନେ ଅଭିଯୋଗ କରିଛନ୍ତି।
ଛତ୍ରପୁର ସହର ପୌରପାଳିକା ଘୋଷଣା ହେଲା ପରେ ଅନେକ ପ୍ରକଳ୍ପର ଶିଳାନ୍ୟାସ ଏବଂ ସ୍ଥାପନା ହେବା ଦ୍ୱାରଦେଶରେ ଅଛି ବୋଲି ବୁଦ୍ଧିଜୀବୀ ମହଲରେ ଆଲୋଚନା ହେଉଛି। ତେଣୁ ଶିଶୁ ଉଦ୍ୟାନର ପୁନରୁଦ୍ଧାର ଏବଂ ସୌନ୍ଦର୍ଯ୍ୟକରଣ ଓ ସହରର ବିଭିନ୍ନ ଜାଗାରେ ଷ୍ଟ୍ରିଟଲାଇଟ ଜଳୁ ନଥିବାରୁ ଦେଖିବାକୁ ମିଳୁଛି । ତେଣୁ ଏହା ଉପରେ ତୁରନ୍ତ ପଦକ୍ଷେପ ନେବା ପାଇଁ ନବନିର୍ମିତ ପୌରପାଳିକା ଏବଂ ଜିଲା ପ୍ରଶାସନ କର୍ତ୍ତୃପକ୍ଷଙ୍କ ନିକଟରେ ଅଭିଭାବକ ଓ ବୁଦ୍ଧିଜୀବୀମାନେ ନିବେଦନ କରିଛନ୍ତି ।
