ପାରାଦୀପ,୭।୧(ଶରତ ରାଉତ):ପାରାଦୀପରେ ଡିସେମ୍ବର ୧୦ରୁ ଅଟକ ଥିବା ୭୮ ବାଂଲାଦେଶୀ ମତ୍ସ୍ୟଜୀବୀ ଓ ୨ ବୋଟ ସୋମବାର ପ୍ରତ୍ୟୁଷରେ ସ୍ବଦେଶ ଫେରିଯାଇଛନ୍ତି। ସେମାନଙ୍କ ସହ ପୂର୍ବରୁ କୋଲକାତାରେ ଅଟକ ଥିବା ୧୨ ମତ୍ସ୍ୟଜୀବୀଙ୍କୁ ମଧ୍ୟ ପଠାଇ ଦିଆଯାଇଛି। ଜବାବରେ ବାଂଲାଦେଶରେ ଅଟକ ଥିବା ୬ ଭାରତୀୟ ମାଛଧରା ବୋଟ ସମେତ ସେଠାକାର ଜଳସୀମାରେ ଧରାପଡ଼ିଥିବା ୯୫ ମତ୍ସ୍ୟଜୀବୀଙ୍କୁ ବାଂଲାଦେଶ କୋଷ୍ଟଗାର୍ଡ ଟିମ୍ ଛାଡ଼ିଦେଇଛି। ଭାରତ-ବାଂଲାଦେଶ ଜଳସୀମା ପାଖରେ ଊଭୟ ପକ୍ଷର କୋଷ୍ଟଗାର୍ଡ ଟିମ୍ ପରସ୍ପର ଦେଶର ନାଗରିକଙ୍କୁ ପ୍ରତ୍ୟର୍ପଣ କରିବା ସହ ଚୁକ୍ତିନାମା ହସ୍ତାନ୍ତର କରିଥିଲେ। ଏହାପରେ ଭାରତୀୟ କୋଷ୍ଟଗାର୍ଡର ପାଟ୍ରୋଲିଂ ଜାହାଜ ସମ୍ପୃକ୍ତ ବୋଟ୍ଗୁଡିକୁ ନେଇ ଧାର୍ଯ୍ୟ ସ୍ଥାନରେ ଛାଡ଼ି ଦେଇଛି।
ସୂଚନାଯୋଗ୍ୟ, ଗତ ଡିସେମ୍ବର ୯ରେ ବାଂଲାଦେଶର ଦୁଇଟି ବଡ଼ ମାଛଧରା ବୋଟ ଭାରତୀୟ ଜଳସୀମାରେ ପ୍ରବେଶ କରି ଫିଶିଂ କରୁଥିଲେ। ସେହି ବୋଟ ଦୁଇଟି ହେଲା ଲୈଲା ଓ ମେଘନା। ସେଥିରେ ୭୮ ମତ୍ସ୍ୟଜୀବୀ ଥିଲେ। ବୋଟରେ ୧୬୦ ଟନ୍ ମାଛ ଥିଲା। ସମ୍ପୃକ୍ତ ୨ ବୋଟକୁ ଭାରତୀୟ କୋଷ୍ଟଗାର୍ଡ ଟିମ୍ କାବୁ କରି ପାରାଦୀପରେ ପହଞ୍ଚତ୍ବା ପରେ ସେଥିରେ ଥିବା ବାଂଲାଦେଶୀ ମତ୍ସ୍ୟଜୀବୀମାନଙ୍କୁ ପାରାଦୀପ ଆଦର୍ଶ ଥାନାକୁ ହସ୍ତାନ୍ତର କରାଯାଇଥିଲା। ଏହାପରେ ପୋଲିସ ବାଂଲାଦେଶୀ ମତ୍ସ୍ୟଜୀବୀମାନଙ୍କୁ ଗିରଫ କରି କୋର୍ଟ ଚାଲାଣ କରିବା ପାଇଁ ସମସ୍ତ ପ୍ରକାର କାଗଜପତ୍ର ପ୍ରସ୍ତୁତ କରିଥିଲା। ମାତ୍ର ଡିସେମ୍ବର ୧୨ରେ ଭାରତ ସରକାର ବାଂଲାଦେଶ ବୋଟ୍ ପ୍ରତ୍ୟର୍ପଣ କରିବାକୁ ଆଲୋଚନା କରିଥିଲେ। ଏଥିସହ ମତ୍ସ୍ୟଜୀବୀମାନଙ୍କୁ ଛାଡ଼ିବାକୁ ନିଷ୍ପତ୍ତି ନେଇଥିଲେ। ସେବେଠାରୁ ଉଭୟ ବୋଟ ପାରାଦୀପ ବନ୍ଦର କୋଷ୍ଟଗାର୍ଡ ବର୍ଥରେ ଥିଲା।
