ଭୁବନେଶ୍ୱର,୧୫।୮(ବ୍ୟୁରୋ): ବନ୍ଦ ହେବ ହୀରାକୁଦ ଡ୍ୟାମର କିଛି ଗେଟ୍। ତଳ ମୁଣ୍ଡରେ ବନ୍ୟାସ୍ଥିତିକୁ ନିୟନ୍ତ୍ରଣକୁ ଆଣିବା ଲାଗି ଖୋଲାଥିବା ୩୪ ଗେଟରୁ ୮ ଗେଟ୍ ବନ୍ଦ କରାଯିବ। ମଙ୍ଗଳବାର ସକାଳ ୯ଟା ପର୍ଯ୍ୟନ୍ତ ଗେଟ ବନ୍ଦ କରିବାକୁ ନିଷ୍ପତ୍ତି ନିଆଯାଇଥିବା ସୋମବାର ସ୍ବତନ୍ତ୍ର ରିଲିଫ କମିଶନର (ଏସ୍ଆରସି) ପ୍ରଦୀପ ଜେନା ସୂଚନା ଦେଇଛନ୍ତି।
ଏସ୍ଆର୍ସି କହିଛନ୍ତି, ବର୍ତ୍ତମାନ ତେଲ ନଦୀ ଚିନ୍ତା ବଢ଼ାଇଛି। ଛତିଶଗଡ଼ରେ ବର୍ଷା ହେଉଥିବା ବେଳେ ଡ୍ୟାମ ତଳମୁଣ୍ଡରେ ଥିବା ମହାନଦୀ ପାଣିରେ ତେଲ ନଦୀର ପାଣି ଆସି ମିଶୁଛି। ରବିବାର ସୁଦ୍ଧା ତେଲ ନଦୀରୁ ଦେଢ଼ ଲକ୍ଷ କ୍ୟୁସେକ ଜଳ ମହାନଦୀରେ ମିଶୁଥିଲା। କିନ୍ତୁ ଆଜି ତାହା ୫ ଲକ୍ଷ କ୍ୟୁସେକ ହୋଇସାରିଲାଣି। ଉପରମୁଣ୍ଡରୁ ୯ ଲକ୍ଷ କ୍ୟୁସେକ ଜଳ ଆସୁଥିବା ବେଳେ ତେଲ ନଦୀର ଏହି ୫ ଲକ୍ଷ କ୍ୟୁସେକ ଜଳ ଚିନ୍ତାର କାରଣ ପାଲଟିଛି। କାରଣ ଏସବୁ ପାଣି ମିଶିଗଲେ ପ୍ରବଳ ବନ୍ୟା ହୋଇପାରେ। ଏହାକୁ ଦୃଷ୍ଟିରେ ରଖି ହୀରାକୁଦ ଡ୍ୟାମର ୮ଟି ଗେଟ ବନ୍ଦ କରିବାକୁ ନିଷ୍ପତ୍ତି ହୋଇଛି। ଏହାଦ୍ୱାରା ପ୍ରାୟ ୧.୨୦ ଲକ୍ଷ କ୍ୟୁସେକ କମିଯିବ। ମଙ୍ଗଳବାର ସକାଳ ୯ଟା ଯାଏ ୮ଟି ଗେଟ ବନ୍ଦ କରି ଆମେ ସ୍ଥିତି ପରଖିବୁ। ଏବେ ଡ୍ୟାମ ଜଳସ୍ତର ପାଖାପାଖି ୬୨୧ ଫୁଟ ରହିଛି। ୮ଟି ଗେଟ ବନ୍ଦ କରିଦେଲେ ମୁଣ୍ଡଳିରେ ୧୦.୫/୧୧ ଲକ୍ଷ କ୍ୟୁସେକ ଜଳ ପ୍ରବାହିତ ହେବ। ନହେଲେ ୧୨.୫ ଲକ୍ଷ କ୍ୟୁସେକ ଜଳ ପ୍ରବାହିତ ହେବ। ମଙ୍ଗଳବାର ସଧ୍ୟା ବେଳକୁ ମୁଣ୍ଡଳିକୁ ୧୧ ଲକ୍ଷ କ୍ୟୁସେକ ଜଳ ପ୍ରବେଶ କରିପାରେ ବୋଲି ଏସ୍ଆରସି କହିଛନ୍ତି। ତେବେ ହୀରାକୁଦ ଜଳସ୍ତର ବଢ଼ିବା ସତ୍ତ୍ୱେ ଗେଟ ବନ୍ଦ ନିଷ୍ପତ୍ତି ପଛରେ ଛତିଶଗଡ଼ର କୌଣସି ସମ୍ପର୍କ ନାହିଁ ବୋଲି ସେ ସ୍ପଷ୍ଟ କରିଛନ୍ତି। ଗେଟ ବନ୍ଦ ନିଷ୍ପତ୍ତି ପ୍ରଶାସନିକ ନିଷ୍ପତ୍ତି ନୁହେଁ। ଏହା ସମ୍ପୂର୍ଣ୍ଣ ଭାବେ ଟେକ୍ନିକାଲ। ଗେଟ ବନ୍ଦ ହେଲେ ଏହାର ପ୍ରଭାବ ୮ରୁ ୯ ଘଣ୍ଟା ପରେ ପଡ଼ିବ ବୋଲି ସେ କହିଛନ୍ତି।
