ଧାମନଗର,୨୭ା୯(ସନ୍ତୋଷ କୁମାର ମହାପାତ୍ର): ଧାମନଗର ଥାନା ଅନ୍ତର୍ଗତ ଦଳାଙ୍ଗ ପଞ୍ଚାୟତର ଜାହାଙ୍ଗୀର ଗ୍ରାମ (ଭୋଇ ସାହି)ର ପ୍ରଦୀପ ଜେନାଙ୍କ ଝିଅ କ୍ରିଷ୍ଣା ଜେନା (୨୧) ରବିବାର ସକାଳେ ନଦୀରେ ବୁଡ଼ି ମୃତ୍ୟୁ ହୋଇଛି। ଏନେଇ ମୃତ କ୍ରିଷ୍ଣାଙ୍କ ଭାଇ ଧାମନଗର ଥାନାରେ ଅଭିଯୋଗ ଏତଲା ଦେବା ପରେ ପୋଲିସ ଘଟଣାର ତଦନ୍ତ ଚଳାଇଛି। ଅଭିଯୋଗ ମୁତାବକ ରବିବାର ସକାଳେ ମୃତ କ୍ରିଷ୍ଣାରାଣୀ ଶୌଚ ହେବାକୁ ଘର ନିକଟସ୍ଥ ଗେଙ୍ଗୁଟି ନଦୀକୁ ଯାଇଥିଲେ। ଦୀର୍ଘ ସମୟ ପର୍ଯ୍ୟନ୍ତ ଘରକୁ ନ ଫେରିବା ନେଇ ପରିବାର ଓ ଗ୍ରାମବାସୀ ଲୋକେ ଖୋଜାଖୋଜି କରିଥିଲେ। ପରେ ସ୍ଥାନୀୟ ଲୋକେ ଘରଠାରୁ କିଛି ଦୂର ନଦୀର ଯନ୍ତଖାଇ ମାହାରାଠାରେ ଏକ ମୃତଦେହ ଭାସୁଥିବା ନେଇ ଦେଖିବାକୁ ପାଇଥିଲେ। ମୃତକଙ୍କୁ ଉଦ୍ଧାର କରିବା ନେଇ ଧାମନଗର ଅଗ୍ନିଶମ ବିଭାଗକୁ ଖବର ଦିଆଯାଇଥିଲା। ତୁରନ୍ତ ଅଗ୍ନିଶମ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରିବା ପରେ ପରିବାର ଲୋକ କ୍ରିଷ୍ଣା ରାଣୀ ବୋଲି ଚିହ୍ନଟ କରିଥିଲେ। ଅଗ୍ନିଶମ ବିଭାଗ ଦ୍ୱାରା ମୃତଦେହକୁ ଧାମନଗର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଣାଯାଇଥିଲା। ଖବର ପାଇ ଧାମନଗର ପୋଲିସ ମେଡିକାଲରେ ପହଞ୍ଚି ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ଭଦ୍ରକ ମୁଖ୍ୟ ଚିକିତ୍ସାଳୟକୁ ପଠାଇଯାଇଛି।
ପ୍ରକାଶ ଥାଉ କି, ଗତ କିଛିଦିନ ହେବ ଲଘୁଚାପ ଜନିତ ଲଗାଣ ବର୍ଷାରେ ଧାମନଗରର ବିଭିନ୍ନ ଅଞ୍ଚଳ ଜଳମଗ୍ନ ହୋଇ ବନ୍ୟା ସୃଷ୍ଟି ହୋଇଛି। ବନ୍ୟା ଜଳରେ ଉକ୍ତ ଅଞ୍ଚଳର ନଦୀବନ୍ଧ କରରେ ଥିବାରୁ ଲୋକଙ୍କ ଘରେ ପାଣି ପଶି ଯାଇଥିଲା। ଏପରିକି ଘରଦ୍ୱାର, ପାଇଖାନା ବାଡ଼ିଘର ପାଣି ସବୁ ସ୍ଥାନରେ ପାଣି ପଶିଯାଇଥିବାରୁ ଲୋକେ ଶୌଚ ହେବା ନେଇ ନଦୀବନ୍ଧ କଡ଼କୁ ବ୍ୟବହାର କରୁଥିଲେ। ଯାହାକି ମୃତ କ୍ରିଷ୍ଣାରାଣୀ ଶୌଚ ହେବାକୁ ଯାଇ ନଦୀରେ ଗୋଡ଼ ଖସି ଯିବାରୁ ଭାସିଯାଇ ଦୁର୍ଘଟଣା ଘଟିଛି । ଏହି ଖବର ନେଇ ସ୍ଥାନୀୟ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି ହୋଇଛି।
