ବାରଙ୍ଗ,୧୧।୮(ଡି.ଏନ୍.ଏ.): ନନ୍ଦନକାନନ ପ୍ରାଣୀ ଉଦ୍ୟାନରେ ୧୨ ତାରିଖ ତଥା ସୋମବାର ୫ମ ଥର ପାଳନ ହେବ ବିଶ୍ୱ ହସ୍ତୀ ଦିବସ। ଏହି ଦିନ ନନ୍ଦନକାନନ ବନ୍ଦ ଥିବାରୁ କର୍ମଚାରୀ ଓ ସ୍କୁଲ ଛାତ୍ରୀଛାତ୍ରଙ୍କ ଗହଣରେ ପାଳନ କରାଯିବ। ଏହି ଉପଲକ୍ଷେ କନଫେରନ୍ସ ହଲରେ ପର୍ଯ୍ୟଟନବିଭାଗ ଏସିଏଫ୍ ଅମୂଲ୍ୟ କୁମାର ପରିଡାଙ୍କ ତତ୍ତ୍ୱାବଧାନରେ ଛାତ୍ରୀଛାତ୍ରଙ୍କ ମଧ୍ୟରେ ଚିତ୍ରାଙ୍କନ ପ୍ରତିଯୋଗିତା ଅନୁଷ୍ଠିତ ହୋଇଥିଲା। ଏଥିରେ ୭୮ଜଣ ଛାତ୍ରୀଛାତ୍ର ଅଂଶଗ୍ରହଣ କରିଥିଲେ। ଏହି ଦିବସରେ ପ୍ରତିଯୋଗିତାରେ କୃତିତ୍ୱ ଅର୍ଜନ କରିଥିବା ୧୦ଜଣ ଛାତ୍ରୀଛାତ୍ରଙ୍କ ସହ ମାହୁନ୍ତଙ୍କୁ ସମ୍ମାନିତ କରାଯିବ। ଚଳିତବର୍ଷ ବିଶ୍ୱହସ୍ତୀଦିବସ ନିରାଡମ୍ବରଭାବେ ପାଳନ ହେବାକୁ ଯାଉଛି। ନା ରହିବ ହାତୀଙ୍କ ପିଠିରେ ପିପିଲି ଚାନ୍ଦୁଆ ନା ରହିବ ହାତୀଙ୍କ ଶରୀରରେ ରଙ୍ଗିନ ଚକଖଡିର ଚିତ୍ରିତ। ୩ କିମ୍ବା ୪ ହାତୀକୁ ନେଇ ଏହି ହସ୍ତୀ ଦିବସ ପାଳନ ହେବ। ସୋମବାର ନନ୍ଦନକାନନ ବନ୍ଦ ଥିବାରୁ ୧୧ଟି ବିଦ୍ୟାଳୟର ଛାତ୍ରୀଛାତ୍ର ଯୋଗଦେବାର କାର୍ଯ୍ୟକ୍ରମ ରହିଛି। ନନ୍ଦନକାନନରେ ପ୍ରେମା, ବାସନ୍ତୀ, କମଳା, ଗୌରୀ, ଜୁଲି, ଚନ୍ଦନ, ହୀରା ଓ ମାମାକୁ ମିଶାଇ ୮ଟି ହାତୀ ରହିଛନ୍ତି। ନନ୍ଦନକାନନର ଛୋଟହାତୀ ମାମା ହୋଇଥିବାବେଳେ ସବୁଠାରୁ ବଡ ହାତୀ ପ୍ରେମା। ଛୋଟ ହାତୀ ମାମା ସାଜିବ ହସ୍ତୀ ଦିବସରେ ମୁଖ୍ୟ ଆକର୍ଷଣ ସାଜିବ ବୋଲି ଜଣାପଡ଼ିଛି।
ପର୍ଯ୍ୟଟନ ପରିଚାଳନା ଦାୟିତ୍ୱରେ ଥିବା ସହକାରୀ ବନ ସଂରକ୍ଷକ ଅମୂଲ୍ୟ କୁମାର ପରିଡା କୁହନ୍ତି, ପର୍ଯ୍ୟଟକମାନେ କମିବାର ମୁଖ୍ୟ କାରଣ ବାତ୍ୟା ଫନୀ। ଯେଉଁ ପର୍ଯ୍ୟଟକ ନନ୍ଦନକାନନକୁ ବୁଲିବାକୁ ଆସିଥାନ୍ତି ସେମାନେ ପୁରୀ, କୋଣାର୍କ, ଧଉଳି, ଖଣ୍ଡଗିରି ସହ ନନ୍ଦନକାନନକୁ ବୁଲିବା ତାଲିକାରେ ରଖିଥାନ୍ତି। ବାତ୍ୟାରେ କ୍ଷତି ହୋଇଥିବା ପୁରୀର ପ୍ରାକୃତିକ ପରିବେଶ ଫେରି ନାହିଁ ବୋଲି ପର୍ଯ୍ୟଟକଙ୍କ ଧାରଣା ଥିବାରୁ ସେମାନଙ୍କ ସଂଖ୍ୟା କମଛି। ଏବେ ନନ୍ଦନକାନନ ପକ୍ଷରୁ ନୂଆ ପଶୁପକ୍ଷୀ ଆଣିବାର ପ୍ରକ୍ରିିୟା ଆରମ୍ଭ ହୋଇଛି। ଅଗଷ୍ଟ ଶେଷ ସୁଦ୍ଧା ଆନ୍ନାକୋଣ୍ଡା ନନ୍ଦନକାନନକୁ ଆସିବ। ଏହାପରେ ପର୍ଯ୍ୟଟକଙ୍କ ସଂଖ୍ୟା ବୃଦ୍ଧି ପାଇବ ବୋଲି ସେ କହିଥିଲେ।
