ଭୁବନେଶ୍ୱର,୨୫।୯: ରାଜ୍ୟରେ କୃଷି ଓ କୃଷକଙ୍କ ବିକାଶ ପାଇଁ ସମବାୟ କ୍ଷେତ୍ରରେ ଏକ ନୂତନ ଯୁଗର ଆରମ୍ଭ ହୋଇଛି। ମୁଖ୍ୟମନ୍ତ୍ରୀ ସମବାୟ ସଦସ୍ୟତା ମହାଅଭିଯାନ ‘ସମ୍ବନ୍ଧ’ର ଆନୁଷ୍ଠାନିକ ଶୁଭାରମ୍ଭ କରିଛନ୍ତି। ଏହି ଅବସରରେ ରାଜ୍ୟର କୃଷକମାନଙ୍କୁ ପ୍ରାଥମିକ କୃଷି ସମବାୟ ସମିତି (PACS) ଏବଂ ଆଦିବାସୀ ବହୁମୁଖୀ ସମବାୟ ସମିତି (LAMPCS) ସହ ଯୋଡ଼ି ହେବା ପାଇଁ ସେ ଆହ୍ୱାନ ଜଣାଇଛନ୍ତି।
କୃଷିର ସର୍ବାଙ୍ଗୀନ ଉନ୍ନତି ପାଇଁ ମୁଖ୍ୟମନ୍ତ୍ରୀ ‘ଆଖୁ ଚାଷ ପ୍ରୋତ୍ସାହନ ଯୋଜନା’ର ବି ଶୁଭାରମ୍ଭ କରିଛନ୍ତି। ଏହି ଯୋଜନା ଅଧୀନରେ ବଡ଼ମ୍ବା ଏବଂ ଆସିକା ଅଞ୍ଚଳର ଆଖୁ ଚାଷୀଙ୍କ ପାଇଁ ହେକ୍ଟର ପିଛା ₹୧୫,୦୦୦ ଇନପୁଟ୍ ସବସିଡି ଘୋଷଣା କରାଯାଇଛି। ଏହାଦ୍ୱାରା ଅଞ୍ଚଳର ଆଖୁ ଚାଷୀମାନେ ବେଶ୍ ଲାଭବାନ ହେବେ।
ସମବାୟ ବ୍ୟବସ୍ଥାକୁ ଅଧିକ ସୁଦୃଢ଼ କରିବା ପାଇଁ ମୁଖ୍ୟମନ୍ତ୍ରୀ ୧୮୫ଟି ରୂପାନ୍ତରିତ ମଣ୍ଡି ଏବଂ ୫୦ଟି ‘କଷ୍ଟମ୍ ହାୟାରିଂ ସେଣ୍ଟର’ର ଘୋଷଣା କରିଛନ୍ତି। ଏହାସହ ଗ୍ରାମାଞ୍ଚଳରେ ସେବା ଯୋଗାଇଦେବା ପାଇଁ ୨୫୦ଟି ଜନସେବା କେନ୍ଦ୍ର (CSC) ଏବଂ ୬୦ଟି ନୂତନ ‘Consumer Store’ (ଉପଭୋକ୍ତା ଭଣ୍ଡାର) ପ୍ରତିଷ୍ଠା ହେବା ନେଇ ଘୋଷଣା କରାଯାଇଛି।
ସମବାୟ କ୍ଷେତ୍ରରେ ସ୍ୱଚ୍ଛତା ଓ ସ୍ମାର୍ଟ ସେବା ପ୍ରଦାନ ଲକ୍ଷ୍ୟରେ ୩୦୦ଟି ପ୍ୟାକ୍ସ (PACS)ରେ ଅନ୍ଲାଇନ୍ ବ୍ୟବସ୍ଥାର ଶୁଭାରମ୍ଭ କରାଯାଇଛି। ଏହାସହିତ ମୁଖ୍ୟମନ୍ତ୍ରୀ ୮ ଲକ୍ଷରୁ ଅଧିକ ଚାଷୀଙ୍କୁ ସେମାନଙ୍କର ଲାଭାଂଶ ଆକାଉଣ୍ଟକୁ ହସ୍ତାନ୍ତର କରିଛନ୍ତି, ଯାହା ରାଜ୍ୟର ଚାଷୀ ମୋର୍ଚ୍ଚାକୁ ଆହୁରି ସଶକ୍ତ କରିବ।
