ଆନ୍ଧ୍ର ଶିକ୍ଷକଙ୍କୁ ନେଇ ପାତ୍ରପୁରବାସୀ ଆତଙ୍କିତ
9:45 pmMay 3, 2020 / 56

ପାତ୍ରପୁର,୩ା୫(ଡି.ଏନ୍‌.ଏ.)- ପାତ୍ରପୁର ବ୍ଲକର ବିଭିନ୍ନ ବିଦ୍ୟାଳୟରେ ଆନ୍ଧ୍ର ପ୍ରଦେଶର ଶ୍ରୀକାକୁଲମ୍‌ ଜିଲାର ବ୍ୟକ୍ତି ଶିକ୍ଷକତା କରୁଛନ୍ତି। ଲକ୍‌ଡାଉନ ଯୋଗୁ ଛୁଟି ଘୋଷଣା ପରେ ସେମାନେ ଘରକୁ ପଳାଇଥିଲେ। ଏବେ ଦରମା ବନ୍ଦ ହେବା ଖବର ପାଇ ପାତ୍ରପୁର ଫେରିଛନ୍ତି। କେତେଜଣ ସମ୍ପର୍କୀୟଙ୍କ ଘରେ ଓ ଆଉ କେତେଜଣ ଭଡାଘରେ ରହିଛନ୍ତି। ଶ୍ରୀକାକୁଲମ ଜିଲାରେ ୩ ଜଣ କରୋନା ପଜିଟିଭି ଚିହ୍ନଟ ହୋଇଥିବାରୁ ପାତ୍ରପୁରବାସୀ ଏବେ ଆନ୍ଧ୍ର ଶିକ୍ଷକଙ୍କୁ ନେଇ ଆତଙ୍କିତ ହୋଇ ପଡିଛନ୍ତି। ଚିଡିପୁଡି ବିଦ୍ୟାଳୟର ଜଣେ ଆନ୍ଧ୍ର ବାସିନ୍ଦା ଶିକ୍ଷୟିତ୍ରୀ ପାତ୍ରପୁରସ୍ଥିତ ନିଜ ଭଡ଼ା ଘରକୁ ଆସିଥିବାବେଳେ ସାହିଲୋକେ ପୁରାଇ ଦେଇ ନ ଥିଲେ। ପରେ ବିଡ଼ିଓ ପହଞ୍ଚତ୍ ଭଡ଼ାଘରେ ସଙ୍ଗରୋଧରେ ରହିବାକୁ କହିବାରୁ ପରିସ୍ଥିତି ଶାନ୍ତ ପଡିଥିଲା। ଆଉଜଣେ ଶିକ୍ଷକ ସପଙ୍ଗ ଗ୍ରାମର ଜଣେ ବ୍ୟକ୍ତିଙ୍କ ଘରେ ରହୁଥିବାବେଳେ ବୁରାତାଲ, ତୁମ୍ବା, ପାତ୍ରପୁର ଆଦି ବିଦ୍ୟାଳୟରେ ମଧ୍ୟ କେତେଜଣ ଶିକ୍ଷକ ରହୁଛନ୍ତି। ଏନେଇ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ଦେଖା ଦେଇଛି। ବିଇଓ କୁରେଶୁ ସେଠୀଙ୍କୁ ପଚାରିବାରୁ, ଆମ ନଜରରେ ୧୦ ଜଣ ଆସିଛନ୍ତି। ଆମେ ସେମାନଙ୍କ ଦରମା ବନ୍ଦ କରିଛୁ, କେତେଜଣ ଶିକ୍ଷୟିତ୍ରୀ ଶିକ୍ଷକଙ୍କୁ ହୋମ୍‌ କ୍ବାରାଣ୍ଟାଇନ ଓ ସଙ୍ଗରୋଧ ଗୃହରେ ରଖାଯାଇଛି। ନିଜଆଡୁ କ୍ୱାରାଣ୍ଟାଇନରେ ନ ରହିଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ ସୂଚନା ଦେଇଛନ୍ତି।