କ୍ୱିଭ,୨୧।୬: ୟୁକ୍ରେନୀୟ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ଶନିବାର ପୋଲାଣ୍ଡର ସର୍ବୋଚ୍ଚ ନାଗରିକ ସମ୍ମାନ, ହ୍ବାଇଟ ଇଗଲ ଅର୍ଡର ଫେରାଇ ଦେଇଛନ୍ତି। ପୋଲାଣ୍ଡ ଅଧିକାରୀ କାରୋଲ ନାୱରୋକିଙ୍କ ଦ୍ୱାରା ପୁରସ୍କାର ପ୍ରତ୍ୟାହାର ସମ୍ପର୍କରେ ଘୋଷଣା ପରେ ଜେଲେନସ୍କି ଏହି ପଦକ୍ଷେପ ନେଇଥିଲେ।
ରାଷ୍ଟ୍ରପତି ଜେଲେନସ୍କିଙ୍କଠାରୁ ସମ୍ମାନ ପ୍ରତ୍ୟାହାର କରିବାର ଘୋଷଣା ଦ୍ୱିତୀୟ ବିଶ୍ୱଯୁଦ୍ଧ ସମୟର ଏକ ବିବାଦରୁ ଆରମ୍ଭ ହୋଇଥିଲା। ଦ୍ୱିତୀୟ ବିଶ୍ୱଯୁଦ୍ଧ ସମୟରେ ପୋଲାଣ୍ଡରେ ଲୋକଙ୍କ ଗଣହତ୍ୟା ପାଇଁ ଦାୟୀ ଅର୍ଦ୍ଧସାମରିକ ବାହିନୀ ନାମରେ ଏକ ୟୁକ୍ରେନୀୟ ସାମରିକ ୟୁନିଟ ନାମକରଣ କରିବା ପାଇଁ ଜେଲେନସ୍କିଙ୍କ ନିଷ୍ପତ୍ତି ଉପରେ ବିବାଦ କେନ୍ଦ୍ରିତ।
ଜେଲେନସ୍କି ସ୍ବତନ୍ତ୍ର ଅପରେସନ୍ସ ଫୋର୍ସର ନାମ ପରିବର୍ତ୍ତନ କରିବାକୁ ନିଷ୍ପତ୍ତି ନେଇଥିଲେ
୨୬ ମେ’ରେ, ଜେଲେନସ୍କି ୟୁକ୍ରେନୀୟ ସ୍ବତନ୍ତ୍ର ଅପରେଶନ୍ସ ଫୋର୍ସର ଏକ ୟୁନିଟ ‘ୟୁକ୍ରେନୀୟ ବିଦ୍ରୋହୀ ସେନା’ ନାମରେ ନାମିତ କରିବାକୁ ନିଷ୍ପତ୍ତି ନେଇଥିଲେ ଏକ ସଂଗଠନ ଯାହା ଦ୍ୱିତୀୟ ବିଶ୍ୱଯୁଦ୍ଧ ସମୟରେ ପୋଲାଣ୍ଡରେ ବହୁ ସଂଖ୍ୟକ ଲୋକଙ୍କୁ ହତ୍ୟା କରିଥିଲା।
ଉଲ୍ଲେଖନୀୟ ଯେ ୨୦୨୩ ମସିହାରେ ପୋଲାଣ୍ଡର ତତ୍କାଳୀନ ରାଷ୍ଟ୍ରପତି ଆଣ୍ଡ୍ରେଜ ଡୁଡା ମାନବାଧିକାରର ରକ୍ଷା ପାଇଁ ଜେଲେନସ୍କିଙ୍କୁ ଦେଶର ସର୍ବୋଚ୍ଚ ସମ୍ମାନରେ ସମ୍ମାନିତ କରିଥିଲେ। ଦ୍ୱିତୀୟ ବିଶ୍ୱଯୁଦ୍ଧ ସମ୍ବନ୍ଧୀୟ ଏହି ବିବାଦ ଏପରି ଏକ ସମୟରେ ଉପୁଜିଛି ଯେତେବେଳେ ୟୁକ୍ରେନ ଚାରି ବର୍ଷ ଧରି ରୁଷିଆ ସହିତ ଯୁଦ୍ଧରେ ଲିପ୍ତ ରହିଛି ଏବଂ ଏହାର ଲକ୍ଷ ଲକ୍ଷ ଲୋକ ପଡ଼ୋଶୀ ପୋଲାଣ୍ଡରେ ଆଶ୍ରୟ ନେଇଛନ୍ତି।
