ଲକ୍ଷ୍ନୌ,୪।୧୦: ଦୀପାବଳି ପୂର୍ବରୁ ଉତ୍ତରପ୍ରଦେଶର ସରକାରୀ କର୍ମଚାରୀ ଓ ପେନ୍ସନର୍ଙ୍କୁ ମିଳିପାରେ ଖୁସି ଖବର। ଯୋଗୀ ଆଦିତ୍ୟନାଥ ସରକାର ରାଜ୍ୟ କର୍ମଚାରୀଙ୍କ ପାଇଁ ବର୍ଦ୍ଧିତ ମହଙ୍ଗା ଭତ୍ତା (DA), ମହଙ୍ଗା ରିଲିଫ୍ (DR) ଏବଂ ବୋନସ୍ ଦେବା ନେଇ ପ୍ରସ୍ତୁତି କରୁଥିବା ଖବର ଆସିଛି। ଏନେଇ ଅର୍ଥ ବିଭାଗ ପକ୍ଷରୁ ପ୍ରକ୍ରିୟା ଆରମ୍ଭ ହୋଇଥିବା କୁହାଯାଉଛି। ପ୍ରସ୍ତାବ ଲାଗୁ ହେଲେ ୧୨ ଲକ୍ଷରୁ ଅଧିକ ସରକାରୀ କର୍ମଚାରୀ ଏବଂ ପ୍ରାୟ ୬ ଲକ୍ଷ ପେନ୍ସନର୍ଙ୍କୁ ମିଶାଇ ୧୮ ଲକ୍ଷରୁ ଅଧିକ ଲୋକ ଉପକୃତ ହେବେ ।
ସୂଚନା ଅନୁସାରେ, ରାଜ୍ୟ ସରକାରୀ କର୍ମଚାରୀ ଓ ପେନ୍ସନର୍ଙ୍କ DA ଏବଂ DRରେ ୩ ପ୍ରତିଶତ ବୃଦ୍ଧି କରାଯିବା ନେଇ ପ୍ରସ୍ତୁତି ଚାଲିଛି । ପ୍ରସ୍ତାବିତ ବୃଦ୍ଧି ଜୁଲାଇ ୨୦୨୬ରୁ ଲାଗୁ ହୋଇପାରେ। ଏହା ସହିତ ଆଉଟ୍ସୋର୍ସ କର୍ମଚାରୀଙ୍କ ପାଇଁ ମଧ୍ୟ ଦୀପାବଳି ବୋନସ୍ ଘୋଷଣା ହୋଇପାରେ । ବିଭିନ୍ନ ବର୍ଗର କର୍ମଚାରୀଙ୍କୁ ପ୍ରାୟ ୩,୪୦୦ରୁ ୭,୦୦୦ ଟଙ୍କା ପର୍ଯ୍ୟନ୍ତ ବୋନସ୍ ମିଳିବାର ସମ୍ଭାବନା ରହିଛି । ତେବେ ଚୂଡ଼ାନ୍ତ ରାଶି ଓ ଟଙ୍କା ପ୍ରଦାନର ତାରିଖ ସରକାରୀ ଆଦେଶ ପରେ ହିଁ ସ୍ପଷ୍ଟ ହେବ ।
ବିଭିନ୍ନ ବିଭାଗରେ ଆଉଟ୍ସୋର୍ସ ବ୍ୟବସ୍ଥାରେ କାମ କରୁଥିବା ପ୍ରାୟ ୨.୭୦ ଲକ୍ଷ କର୍ମଚାରୀଙ୍କ ମାସିକ ପାରିଶ୍ରମିକ ବଢ଼ାଇବା ନେଇ ମଧ୍ୟ ସରକାର ପ୍ରସ୍ତୁତି କରୁଥିବା କୁହାଯାଉଛି । ପ୍ରସ୍ତାବିତ ବ୍ୟବସ୍ଥା ଅନୁସାରେ ସେପ୍ଟେମ୍ବରରୁ ସଂଶୋଧିତ ଦର ଲାଗୁ ହୋଇପାରେ। ଏପରି ହେଲେ ନଭେମ୍ବରରେ ମିଳିବାକୁ ଥିବା ଅକ୍ଟୋବର ମାସର ବର୍ଦ୍ଧିତ ପାରିଶ୍ରମିକ ସହ ସେପ୍ଟେମ୍ବରର ଏରିଅର ମଧ୍ୟ ମିଳିପାରେ।
ସେପ୍ଟେମ୍ବରରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଉତ୍ତରପ୍ରଦେଶ ଆଉଟ୍ସୋର୍ସ ସେବା ନିଗମର ଶୁଭାରମ୍ଭ କରିଥିଲେ । ଏହା ସହ ଏକ ପୋର୍ଟାଲ ଓ ୱେବସାଇଟ୍ ମଧ୍ୟ ଲଞ୍ଚ୍ କରାଯାଇଥିଲା। ସରକାରଙ୍କ ଅନୁସାରେ, ନୂଆ ବ୍ୟବସ୍ଥାର ଉଦ୍ଦେଶ୍ୟ ଆଉଟ୍ସୋର୍ସ କର୍ମଚାରୀଙ୍କ ପାରିଶ୍ରମିକ ପ୍ରଦାନ ଓ ସାମାଜିକ ସୁରକ୍ଷାକୁ ଅଧିକ ସୁବ୍ୟବସ୍ଥିତ କରିବା। ଏହି ବ୍ୟବସ୍ଥାରେ କର୍ମଚାରୀଙ୍କ ପାରିଶ୍ରମିକ ସିଧାସଳଖ ତାଙ୍କ ବ୍ୟାଙ୍କ ଖାତାକୁ ପଠାଇବାର ବ୍ୟବସ୍ଥା ରହିବ। ଦୁର୍ଘଟଣା ଘଟିଲେ ପରିବାରକୁ ବର୍ଗ ଅନୁସାରେ ୨୦ରୁ ୪୦ ଲକ୍ଷ ଟଙ୍କା ପର୍ଯ୍ୟନ୍ତ ବୀମା କଭର୍ ମିଳିପାରିବ। ଅଗ୍ନିକାଣ୍ଡ କ୍ଷେତ୍ରରେ ୧୦ ଲକ୍ଷ ଟଙ୍କା ଏବଂ ଆକସ୍ମିକ ଚିକିତ୍ସା ପାଇଁ ୫ ଲକ୍ଷ ଟଙ୍କା ପର୍ଯ୍ୟନ୍ତ ସହାୟତାର ବ୍ୟବସ୍ଥା ଘୋଷଣା କରାଯାଇଛି।
ଏହାବ୍ୟତୀତ ଜରୁରୀ ପରିସ୍ଥିତିରେ ଏୟାର ଆମ୍ବୁଲାନ୍ସ, ପିଲାଙ୍କ ଶିକ୍ଷା ଏବଂ ଝିଅଙ୍କ ବିବାହ ପାଇଁ ମଧ୍ୟ ନିର୍ଦ୍ଧାରିତ ଆର୍ଥିକ ସହାୟତା ଦେବାର ବ୍ୟବସ୍ଥା ରହିଛି। କର୍ମଚାରୀଙ୍କ ମୃତ୍ୟୁ ହେଲେ ପରିବାରକୁ ତୁରନ୍ତ ୫୦ ହଜାର ଟଙ୍କା ଦେବାର ବ୍ୟବସ୍ଥା ମଧ୍ୟ ରହିଛି। ସରକାରଙ୍କ କହିବା ଅନୁସାରେ, ନୂଆ ବ୍ୟବସ୍ଥା ମାଧ୍ୟମରେ ଆଉଟ୍ସୋର୍ସ କର୍ମଚାରୀଙ୍କୁ ଅଧିକ ସୁରକ୍ଷିତ ଓ ସମ୍ମାନଜନକ କାର୍ଯ୍ୟ ପରିବେଶ ଯୋଗାଇବା ଦିଗରେ ପଦକ୍ଷେପ ନିଆଯାଉଛି।
